तामुलपुर,मार्च 4: थांनाय रबिबारखालि हादोरसानि गिबि मंत्री सर्बानन्द सनवाल बिथांआ मुंख्लं मनेस्वर बसुमथारि बिथांनि श्राधा एबा जोबथा बिदाय होनाय समाव नुजाथिनानै बसुमथारि बिथांनि फिसाजो दिदोमस्रि बसुमथारि बिथांनो साख्रिनि लाइजामखौ गथायो।
खौरां मोन्नाय बादिब्ला मनेस्वर बसुमथारि बिथांनि फिसाजो दिदोमस्रि बसुमथारि बिथांनो Assistant Tourist Information Officer मासिनि साख्रिआव थिसन्नो थाखाय साख्रि होनायनि लाइजामखौ सनवाल बिथांआ गावनि आखायजों गथायनानै होयो।
मखनो गोनांदि, थांनाय 14 फेब्रुवारि 2019 अक्ट’आव जम्मु आरो काश्मीर हादोरसानि सिङाव थानाय पुलवामा जिल्लायाव पाकिस्तान हादोराव जोनोम मोन्नाय जाइस-इ-महामद इस्लामिक उदखारि हान्जानि सोद्रोमाफोरनि गोहोगोरा सिउसाइद बमा होनानै बेफ्रुहोनायाव सा 45 निबो बांसिन सीआरपीएफ रौनिया हान्जानि सोद्रोमाफोरा मुंख्लं जालांदोंमोन। बेनिनो गेजेराव आसाम हादोरसानि सिङाव थानाय बड’लेन्ड गावखुंथाय काउनसिल ओनसोलनि बाक्सा जिल्ला तामुलपुरनि मनेस्वर बसुमथारि बिथांआबो गावनि आगोमा जिउखौ हादोरनि थाखाय बावनो गोनां जादोंमोन।
