New Delhi : दुलाराय आसाम फरायसा आफाद (All Assam Students Union) नि मोनसे गोजौ थाखोनि दैदेनगिरिनि थान्दै हान्जाया मैया अदेबानि मंग'लबार खालि हादोरनि न'खर बिफाननि मन्थ्रि (Union Home Minister) अमित चाह बिथांखौ नोगोरारि सोदांनाय बिल (Citizenship Amendment Bill) नि सायाव मोनसे गोनांथार सावराय जथुमाव जिरायो। जेराव आसुनि दैदेनगिरि मोना बुंथियो दि जों माब्लाबाबो केब (CAB) माब्लाबो आजावना लानो हाया। गोबां सुबुंआ जिउ गोमालांनाय , बेंगुरा ,नोरजिया गावनि जिउ बावसोमनांनायनि बिथायाव जारिमिनारि आसाम गोरोबथा बेरेखा बिलखौ जायखिजाया बेसेनावनो मदद खालामनो हाया होन्ना गोदान दिल्लीयाव मंग'लबारनि हराव न'खर बिफाननि मन्थ्रिनि सिगाङाव दुलाराय आसाम फरायसा आफादनि गाहाइ बोसोनगिरि (Chief Adviser, AASU) समुज्जल भट्टाचार्यीआ फोरमायो।
दि सेन्टिनेल खौरांलाइजों जानाय मुगा मुगि बुब्लियाव भट्टाचार्यी बिथाङा बुङो दि मिरुआव खुंथाइ गोहोयाव जिरायनाय भारतीय जनता पार्ति सुंद'यै बि जे पि नि सोरखारा (BJP Government) थांनाय बिधान सभा बिसायख'थि (Last Assembly Election) याव सदबांसा होनायखौ फोथायनानै लैहोर लैहोर बाहागो लानानै राज्यो-राजाया बि जे पि नि फार्से भ'ट होदोंमोन। नाथाय दुखुनांथाव खोथाया बेनो दि बिसायखथियाव होनाय गुबुनारि उदां खालामनायनि मोन्थोर आवरायनानै सोरखार दाफुंनाय दोलोनि दैदेनगिरि मोना गासै सदबांसा (Promises) खौ बावगारलांजोब्बाय।
रायखांनो गोनां दि थांनाय बिधान सभा बिसायख'थिनि सिगां बि जे पि दोलोआ थियारि खालामनाय भिसन डकुमेन्टनि खोथाखौ गोसोखांनानै खौरांगिरिनि सिगाङाव दैदेनगिरि मोना बुंथियो दि आसाम गोरोबथानि गासै द'फाफोरखौ मावफुं लांनायनि खोथा होदोंमोन नाथाय बेनि मोगथां महर होनायनि सोलायै राव , हारिमु, दोहोरोम , समाजखान्थिनि रैखाथि थामोन्थाखौ फोजोबस्रांनो हाथाव बिलखौ संसदाव पास खालामनाय थांखियै सिगांलांदों होन्ना गोख्रों रावजों सोंखारियो।
दुलाराय आसाम फरायसा आफाद (AASU) नि गोजौ थाखोनि दैदेनगिरि मोना (Core Leader's Delegations) बुंथियो दि नोगोरारि सोदांनाय बिलखौ संसदाव लाबोयोब्ला सोलिबोबाय थानाय गोजां बोथोरनि जथुम्मा (Winter Session) नि गेजेरावनो गोख्रोंनिफ्राय गोख्रों बेरेखा सोमावसारनाय हाबाफारि दिन्थिफुंनाय जागोन। आसाम गोरोबथानि द'फा नं 6 खौ मावफुं हराब्ला जायखिजाया जाहोननि बेसेनाव बिलखौ मानिनानै लानो हाया।
लोगोसे बे बिलखौ संसदाव पास जायोब्ला सा-सानजा हादोरसानि थागिबि सुबुं समाजाव गोख्रों खहा खालामगोन। बेयो संबिजिद बेरेखा, सुबुं बेरेखा। मख'जाथावदि बै गोनांथार गोजौ थाखोनि सावराय जथुमाव असम जातीयताबादि युव सात्र परिषद, नागा फरायसा गौथुम आरो गुबुन गुबुन दोलो गौथुमनि दैदेनगिरि मोनाबो बाहागो लादोंमोन।
Also Read : आसाम गोजौ सोलोंथाइ गौथुमा फोसावबाय मेट्रिक आन्जादनि फारिलाइ, 10 निफ्राय 29 फेब्रुवारिसिम आन्जाद सोलिगोन
Also Watch: Protester catches fire while staging a protest against CAB in Nagaon