कक्राझार जिल्ला ए बि एम सुआ एन आर सि नि गोदान सामलायगिरिखौ हारि बेरेखा बिबुंथियाव सोंखारिदों

कक्राझार जिल्ला ए बि एम सुआ एन आर सि नि गोदान सामलायगिरिखौ हारि बेरेखा बिबुंथियाव सोंखारिदों

Kokrajhar: हादोरसानि बारग' एन आर सि नि गाहाइ सामलायगिरि प्रतीक हाजेला बिथांआ मध्यप्रदेश हादोरसायाव ट्रेनफार जानायनि उनाव आसाम सोरखारनि साखा फारायाव गोदान गाहाइ सामलायगिरि हितेश देब शर्मा बिथाङा माइन'रिटि सुबुं माहारिनि हेंथायै बेरेखा बिबुंथि लाखिदों होन्नानै अ'जद दैखांनानै मैया अदेबानि बुधबार खालि दुलाराय बर'लेण्ड माइन'रिटि फरायसा आफाद (All Bodoland Minority Students Union) नि कक्राझारनि गसाइगाव आरो पर्बतझरा जिल्ला आफादनि दैदेनगिरि मावथिमोना गोख्रों सोमावसारनाय दिन्थिफुंङो। बिथांआ बे एन आर सि खामानिखौ गाहामै गाहाम सामलायनायाव बेले बेजे खालामगोन होन्ना अ'जद दैखांङो।

रायखांनो गोनां दि कक्राझारनि सिल्दरेन पार्कआव सोमावसारनाय दिन्थिफुंनाय हाबाफारियाव बुधबार खालि हादोरनां नोगोरारि फारिलाइ सुंद'यै एन आर सि आव गोबां अन्जिमानि भारतारि नोगोरारिनि मुं हाबसन जायाखै। आरोबाव लोगोसे दुलाराय बर'लेण्ड माइन'रिटि फरायसा आफाद (ABMSU) नि बारग' आफादगिरि (Former President) लाफीकुल इस्लाम बिथाङा सिनायमोनै दुथांनि गुलियाव गावथारजानाय दैदेनगिरिनि नखरा दिनैसिमबो न्याय मोनथ'वाखै। बिथांनि न'खरखौ थाबैनो राहा लामा आखायाव आजावनो खावलायदों।

खौरांगिरिजों जानाय मुगा मुगि बुब्लियाव कक्राझार जिल्ला दुलाराय बर'लेण्ड माइन'रिटि फरायसा आफाद (Kokrajhar Dist Committee , ABMSU) नि आफादगिरि नजरुल इस्लाम बिथाङा बुङो दि जों माइन'रिटि सुबुं राज्यो-राजाया हादोरनि जौसिन बिजिरसालिनि खाथि नोजोराव सोलिबोबाय थानाय एन आर सि खामानिखौ बरायदों आरो बेरेखा खालामाखै। नाथाय दुखुनांथाव खोथाया बेनो दि थांनाय 31 आगष्टआव फोसाव जानाय जोबथा हादोरनां नोगोरारि फारिलाइ सुंद'यै एन आर सि नि खामानियाव नंगुबै भारतारि नोगोरारिनि मुं हाबसन जायाखै। जों बेबादि नासयजानायखौ गुरैयै लाया एबा आजावा होन्ना बुंथियो। ए बि एम सुआ एन आर सि आयदानि सायाव मोजाङै मोजां नायसंनानै माबोरै हादोरनि जौसिन बिजिरसालियाव नुजाथिहैनो हागौ बेनि थाखाय दासिमाव गुबुन गुबुन मेलेम जिबि, गुनगोनां सुबुंनि दिथा सुबुरुन होनायजों मोनसे सांग्रांथि जथुम खुंफुंनायनि हाबाफारिया लानाय जादों।

ए बि एम सु नि दैदेनगिरि मोना गोदानै थिसनजानाय एन आर सि नि गाहाइ सामलायगिरि दाबि खालामफैदों आसामाव गोबां अन्जिमानि आयेन बेरेखायै हाबसन्फैनाय नोगोरारि दं होन्ना बुंथिदों। मुथ'ते गोदान सामलायगिरि हितेश देब शर्मा बिथांनि सायाव जोंनि मोनबो फोथायनाय गैया। राव हारिमु दोहोरोम समाजखान्थि सायख'वालासे हादोराव बे माहारि बेरेखा गोसोनि सान्नाय जों माइन'रिटि सुबुं समाजा गोजोन मोनाखै होन्ना फोरमायबावो। रायखांनो गोनां दि सोमावसारनाय दिन्थिफुंनायनि उनाव आसामाव गोदानै एन आर सि नि गाहाइ सामलायगिरि महरै थिसननाय हितेश देब शर्मा बिथांखौ माइन'रिटि सुबुं समाज बेरेखा बिबुंथि नायनो थाखाय कक्राझारनि जिल्ला बेंगिरि (Deputy Commissioner) पार्थ प्रटिम मजुमदारनि गेजेरजों हादोरनि गाहाइ बिजिरगिरि (CJI) निसिम गांसे गोसोखां लाइ गथायनाय जायो।

logo
Sentinal Assam
bodo.sentinelassam.com