कक्राझारनि सेरफांगुरियाव 52थि एबसुनि जथुम्मायाव बर' जेंनाखौ सुस्रांनायनि दाबि दैखांजाबाय

Kokrajhar : कक्राझार जिलानि सिङाव थानाय सेरफांगुरिनि कनकेस्वर नार्जारि जाउरिखां फोथाराव 21 डिसेम्बर निफ्राय खुंफुंजानाय मिरु दुलाराय बर' फरायसा आफाद (All Bodo Students Union) नि 52 थि बोसोरारि जथुम्मानि रंगिना संगिना सानथामनि हाबाफारिया दिनै गोजोनै गोजोन थुंगिबाय। मख'जाथावदि जथुम्मायाव गासै गं 30 जिला आफाद , मुलुग सोलोंसालि आरो बायजोनिफ्रायबो गोबां सुबुं थान्दैफोरा बाहागो लाफैयो। बै बोसोरारि जथुम्मायावनो थान्दै मेलाव आगोमा बर' हारिया भुगिनांनाय जेंना जेंगोनाखौ नोजोर लाखिनानै मोन दाइन (8) थांखि दैखांनाय जायो। बेजों लोगोसे आलादा बर'लेण्ड हादोरसानि जेंनाखौ थाबैनो बोस्रांनायनि दाबि दैखाङो। जेंनाया अरायथायै सुस्रांनाय जायालासे सुबुंदारारि खान्थिजों बर'लेण्ड नि दाबिजों सोमावसारनाय हाबाफारि सोलिलांबाय थागोन होन्ना फोरमायो।

बेरा फारसेथिं जाय 2014 माइथायाव हाथियार दैग्रा उदखारि हान्जानि जेंना जेंगोनाखौ फोजोबस्रांनाय सदबांसा होनाय खोथाखौ गोसोखांहोनानै थाबैनो सोलायथायनि मोन्थोर आवरायनानै सोरखारनि गोहोयाव जिरायनाय भारतीय जनता पार्ति सुंद'यै बि जे पि सोरखारखौ बर'लेण्ड जेंना सुस्रांनायनि दाबि खालामो। जि थाखोसिम अस'मिया आयदाखौ कम्पालस'रि जाबसिन्नायखौ लानानै बुङो दि बि टि ए डि आरो बर' गोगोम हालामाव जाहाथे गोहोम गोग्लैया नोजोर होनो खावलायदों।

गुबुन फारसेथिं जाय खाम सिफुं सेरजा ग्रोम ग्रोम सोदोब रिंनाय गोमखांहोनायजों बोसोरारि जथुम्माखौ दुलाराय बर'फरायसा आफादनि आफादगिरि प्रमद बर'आ मासिगिरिनि मासि लानानै हाबाफारिखौ दैदेनलांङो। जेराव आसाम बिधान सभा बियाबनि बुंथिगिरि हितेन्द्र नाथ गश्वामी बिथाङा बुङो दि राव हारिमु गेलेमु थिलियाव साखा-फारा बर' हारिया भुगिनानै थानांनाय गुदि जेंना जेंगोनाखौ सावराय लायनायनि गेजेरजों बोस्रांनायनि आगान लानाय जागोन। आरोबाव फैगो बिधान सभानि सिङाव बर' जेंना आरो हा खान्थिनि सायाव दाबि दैखांनाय जासिगोन होन्ना फोरमायो।

लोगोसे जरहात आबाद मुलुगसोलोंसालिनि मानाव गेदेर भाइस चेन्सेलर कमल मल्ल बुजरबरुवा बिथाङा गाहाइ आलासि महरै बाहागो लानानै गावनि बिबुंथियाव बुंथियो दि मोनसे हारिया राव हारिमु दोहोरोम समाजखान्थियाव नारा नाथा , थैस' थांस' जुजिनाय , सोमावसारनायनि गेजेरजों दावगानायनि, जौगाखांनायनि जांख्लायाव गाखोलांनो हायो होन्ना फोरमायो।

बर' थुनलाइ आफादनि आफादगिरि तरेन बर', सि सि टि ए अ गाहाइ लिंथुमगिरि आदित्य खाख्लारि बिथांमोना सोरखारनि हेंथायै सोंखारियो। लोगोसे बेवहायनो सेरफांनि देंखो मुंनि गांसे गोसोखां बिजाब बेखेवनाय जायो। बोसोरारि जथुम्मानि सानथामनि हाबाफारिजों खुंफुंजानाय मिरु दुलाराय बर' फरायसा आफादनि जथुम्मायाव गेवलां मेलाव अदेबानि थामथि सानखालि बर'लेण्ड मुलुगसोलोंसालिनि भाइस चेन्सेलर प्रफेसार लाइस्राम लादुसिं,इउ पि एल ए नि आफादगिरि उर्खाव गोरा ब्रह्म, राभा फरायसा आफादनि दैदेनगिरि रमेनसिं राभा, बर' आयजो जास्टिस फरामनि आफादगिरि अन्जालि दैमारि लोगोसे गोबां गुन गोनां, मेलेमजिबि, सानसुमैगिरिफोरा दुंब्रुदजों बाहागो लाफैयो।

Also Read : कुमार सन्जय कृष्णा आसाम सोरखारनि गाहाइ नेहाथारि महरै सायख’ जाबाय

Also Watch: All Assam Lawyers Association staged protest rally against CAA 2019 in Guwahati