एन आर एल गावारि खोन्दोआव गथायनायनि हेंथायै कंग्रेस दोलोआ गोख्रों सोमावसारदों

Numligarh : आसामनि गलाधाट जिलानि बेन्दोंआव थानाय नुमलिगड़ थाव सोदांसालि लिमिटेड (Numaligarh Oil Refinery Limited) खौ गावारि खोन्दोनि फसंथानाव गथायनाय आयदाखौ बन्द खालामनो बुधबार खालि हादोरसा गाहाइ बेरेखा राजखान्थि गोहो कंग्रेसा मोनसे गोख्रों सोमावसारनाय हाबाफारि दिन्थिफुंङो। मख'जाथावदि आसाम प्रदेश कंग्रेस कमिटि (Assam Pradesh Congress Committee) नि बान्जायनायाव हादोरसायारि थाखोनि गागि दैदेनगिरि मोनजों लोगोसे गोबां मावथि मददगिरिमोना बेनार पष्टार लानानै 37 आरो 39 नं माहारियारि राजा लामायाव होबथानानै सोरखार बेरेखा रावजों नुमलिगड़ तिनालिनि आबहावा दुंहाव खालामना होयो।

आसामनि बारग' गिबि मन्थ्रि (Former Chief Minister) तरुन गगै जों लोगोसे आसाम प्रदेश कंग्रेस कमिटि (APCC) नि आफादगिरि रिपुन बरा, दोलोनि बेरेखा दैदेनगिरि देबब्रत सइकीया, साम'गुरिनि एम एल ए (Legislator) रकिबुल हुसेन, कंग्रेस नि सांसद प्रद्युत बरदलै आरो गौरब गगै, दोलोनि एम एल ए मोना फारियै रुपज्योति कुर्मि , रेकिबुद्दीन आहमेद, कमलाक्ष्य दे पुरकाइस्थ', अजन्ता नेउग, रजलिना तिर्की, बारग' एम एल ए मोना फारियै राना गश्वामी, अरुन फुकन आरो बिस्मिता गगै जों गोबां दैदेनगिरि मावथि मददगिरिमोना बाहागो लाफैयो।

हादोरसानि सिङाव थानाय राज्योआरि खोन्दोनि फसंथान (Public Sector's Undertaking) फोरखौ गावारि खोन्दोआव सोरखारा गथायनाय थिरांथा खौ हेंथा खालामना हादोरसानि बारग' गिबि मन्थ्रि तरुन गगै बिथांआ बुङो दि कंग्रेस सोरखारनि आमोलाव गायसननाय जानाय सोरखारि फसंथानफोरा भारतीय जनता पार्ति सुंद'यै बि जे पि नि दैदेननाय गाहाइ मन्थ्रि नरेन्द्र मडिआ खुंथाइ गोहोआव जिरायनाय लोगो लोगोनो मोनसे उनाव मोनसे फानहरनायाव दावखोलांदों।

हादोरसानि मोननै पेपार मिल फसंथान बि जे पि दोलोआ बन्द खालामखाबायनो होन्ना गोख्रों अ'जद दैखांङो। जाय कंग्रेस दोलोनि सोरखारनि समाव फसंजादोंमोन। बि पि सि एल आरो एन आर एल गावारि खोन्दोआव गथायनाय उनाव NEEPCO, Oil and Natural Gas Corporation बादि सोरखारि फसंथानफोरखौ फानहरगोन होन्ना गोख्रों रावजों सोंखारियो।

मख'जाथावदि न'गाव ल'क सभा बियाबनि कंग्रेस सांसद आरो आसाम प्रदेश कंग्रेस कमिटि नि लेङाइ आफादगिरि रकिबुल हुसेन आ जथुम जानाय मावथि मददगिरिमोनखौ थांखि नानै बुंथियो दि जों माब्लाबाबो सोरखारा नुमलिगड़ थाव सोदांसालि लिमिटेड (Numaligarh Oil Refinery Limited) खौ गावारि खोन्दोयाव गथायनायनि थिरांथा लानायखौ आजावना लाला होन्ना बुंथियो।

मख'जाथावदि फुंनि 11 रिंगानि फ्राय 1 रिंगासिम खुद्रिसारनाय हाबाफारि दिन्थिफुंनायनि उनाव 37 आरो 39 नं माहारियारि राजा लामायाव मोनसे गिदिर हान्जा सुरनाय हाबाफारि लायो। जाउनाव गोबां लामाजों थांलाय फैलाय राहायाव जेंना नुजाथिफैयो। उनाव पुलिस बिफाना नुजाथिफैनानै सोमावसारारि दैदेनगिरि मावथि मददगिरिमोनजों लोगोसे बारग' गिबि मन्थ्रि तरुन गगै खौबो गावनि आवथायाव लायो।

Also Read : मुंख्लं मनेस्वर बसुमथारिखौ गोसोखांनानै सीआरपिएफनि दोलोआ मान बावदों

Also Watch:One Person Killed in a Road Accident on the NH-38 in Digboi.