Guwahati: आसाम बिधान सभानि गोजां बोथोरनि जथुम्मा जागायजेन्नायनि गिबि सान अदेबानि 28 नबेम्बरावनो गुबुन गुबुन दोलो गौथुमखौ एसेमब्लिनि सिंआव बायजोआव गोख्रों सोमावसारनाय नुनो मोनबाय। मख'जाथावदि मैया बबेखानि बृहस्पतिबाराव दिसपुरनि लाष्टगेटाव गावसोरनि दाबि दावाफोरखौ लानानै सोरखारनि हेंथायै खुद्रिसारबाय दैदेनगिरि मावथिमोना।
प्रतिबन्धि सुरक्षा संन्था आसाम मुंनि गावसोरनि मोन 21 दाबिफोरखौ लानानै सोहैबाय दिसपुरनि लाष्टगेटाव। बिसोरो दैखांनाय गुबै दाबिफोरनि गेजेराव दं फारियै गं 4419 लान्दां मासियाव सोलेरारि हेंथागोनां बिजाथि (Persons with Disabilities)खौ सोरखारनि बायदिसिना बिफान (Government Department) आव थिसन्थायनि राहा खालामना होनांगौ।
नाथाय सोरखारा मोन 863 मासियावल' थिसनथाइनि राहा खालामदों। बेफोर दाबिजों लोगोसे सोलेरारि हेंथागोनां (Persons with Disabilities) सुबुंनि गावसोरनि गांनाय उखैनायखौ सुफुंसारनो थाखाय आलादा जौगाखां गौथुम (Development Council) दाफुंना होनांगौ। जोंनि थाखाय लान्दां जाना थानाय मासियाव थाबैनो जर'खा आन्जादनि गेजेरजों थिसन्थाइ होनांगौ। लोगोसे समाज अनसाइ जौगाखां बिफाननि सिङाव सोलिबाय थानाय दिन दयाल उपाध्याय पेनसनखौ दानफ्रोमाव रां 1000 निफ्राय 3000 सिम बारायनो नांगोन होन्ना बुंथियो।
थिग बिदिनो दुलाराय आसाम गुदि आरो गेजेर फरायसालि (All Assam Primary/ UP School) नि आदार संग्रा आयजोनि गौथुमा गावसोरनि दाबि दावाफोरखौ लानानै थाबैनो जेंनाखौ सुस्रांनायनि लामा आनदायनो सोरखारखौ खोनासं होयो।
बेराफारसे थिं जाय बि टि सि नि फ्राय गोगोमै अबर' राज्यो-राजाखौ दैदेनलांनाय अबर' सुरक्षा समिति मुंनि मोनसे गौथुमाबो सोरखारनि हेंथायै सोमावसारनाय हाबाफारि दिन्थिफुंनाय नुनो मोनो। जेराव बिसोरनि दैखांनाय दाबिया मोन 10 नि गेजेराव दं फारियै अबर' सुरक्षा समितिनि दैदेनगिरि मोना बुंथिनाय बादिब्ला मिरु सोरखारा दानि बर'लेण्ड हायुंआरि गौथुम सुंद'यै बि टि सि खौ मिरु खुंथाइ हालाम (Union Territorial Council) महरै गायसंलांनो आवगायदों। नाथाय जों बेनि गोख्रों बेरेखा खालामो। लोगोसे 2003 माइथायाव बर' गोरोबथा (BTC Accord) नि द'फाफोरखौ सोदांफिन्नागौनि दाबि दैखाङो। गौथुमनि सिङाव थानाय गं 50 जौखोन्दो (%) निबो बारा गामि दानख'नाय बायदि बायदिखौ लानानै सोमावसारनाय थिलिखौ गोमखां होयो।
थिग बिदिनो राभा हासं गावखुंथाइ गौथुमनि बायजोआव थानाय थागिबि राभा सुबुं माहारिनि थाखाय आलादा राभा जौगाखां गौथुम ( Rabha Development Council) दाफुंनायनि दाबियाव राभा जौगाखां गौथुम दाबिग्रा आफादा गोख्रों सोमावसारनाय हाबाफारि लायो। बिसोरनि दैखांनाय दाबि दावाफोरखौ दावखोलांनायाव सोरखारा गोनांथि होआबोला फैबाय थानाय समफोराव गोख्रों सुबुंदारारि सोमावसारनाय (Democratic Movement) नि हुमखि होयो। आसाम बिधान सभानि गोजां बोथोरनि जथुम्मा जागायजेन्नायनि गिबि सानावनो हादोरसानि दाब दाब जायगानिफ्राय दोलो आफादा गावसोरनि गांनाय उखैनायखौ सुफुंनो थाखाय दाबि खालामनायखौ नुनो मोननाय जादों। मुथते सोरबाया जुदि नोगोरारि सोदांनाय बिल खौ पास जानायाव हेंथा खालामदों आरो गुबुन आफादा एस टि गनायथि होनांगौ नि दाबियाव जांख्रिखांनायखौ नुनो मोनबाय राज्यो-राजाया ।
Also Read : जों गासैबो फोरमानथिखौ बिधान सभायाव दैखांगोन : मन्थ्रि हिमन्त बिश्व शर्मा
Also Watch: Hardcore Dacoit arrested by Nagaon Police from Khutiktiyar, One .22 mm Pistol seized