Guwahati : नोगोरारि सोदांनाय बिल (Citizenship Amendment Bill) खौ लानानै राज्योनि सोरबिथिं दुंहाव थासारि सोमजिदों। राज्योनि गोबां जिल्लायाव कार्फिउ जाबसिन्नाय समावनो आइन आब्रुथि (Law&Order) खौ नेवसिनानै नुजाफैयो बयबो।
नोगोरमायाव माखासे सानफ्रोमबो गोनांथार जानाय मैगं थाइगंनि गला दुखानफोरखौ खुलिनाय लोगो लोगोनो जाग्रा मुवा बेसाद बायहरनो थाखाय गोबां राज्यो-राजाया सुक्रबार खालि फुंनि समाव जमा जाहैयो। जाग्रा मुवा बेसादनि थाखाय अल'खद (Scarcity of Essential Food Commodities) सोमजिदों। गुवाहाटी नोगोरमायाव 12 धन्टा दुंहाव थासारि सोमजिनायनि उनाव कार्फिउ जाबसिन्नायनि बोखारहरनाय जादोंमोन होन्ना कामरुप मेट्रपलिटान जिला खुंथाइनि सुलुंआव फोरमाय जादोंमोन। बेजों लोगोसे जिल्ला खुंथाइ बिफाननि सुलुंआव मेजिस्ट्रेटनि नायबिजिरनायाव नोगोरमानि गुबुन गुबुन जायगाफोराव थानाय पेट्रल पाम्पफोरखौ खुलिनायनि बिथोन हरनाय जादोंमोन।
गुवाहाटी मेट्रपलिटान जिलानि गुबुन गुबुन जायगानि जि एस रड राजा लामायाव थांनाय साननै सानाव नोगोरारि सोदांनाय बिल पास जानायनि हेंथायै माखासे सुबुंआ राज्योआरि दोहोन (Public Property) फोरखौ जालाखार बिलाखार खालामनायखौ बोखारनायनि हाबाफारि लायो। दासिम हालागै हादोरसायारि हान्था मेला सामलाय बिफान (State Transport Department) आ राज्यो-राजा हान्थियारिनि सुबिदाखौ नोजोर लाखिनानै माखासे राहा लादों, बरझाराव थानाय लक'प्रिय गपीनाथ बरदलै हादोर गेजेरारि बिरखं गाथोननिफ्राय गं 30 पाब्लिक बास सिबिथाय थांलाय-फैलायनि थाखाय होनाय जादों। सुक्रबार खालि फ्लाइड पेजेन्जारफोरखौ पल्टन बाजाराव ओंखारना होनाय जादोंमोन। लोगोसे पल्टन बाजारनि पइन्टाव थानाय रेलवे ष्टेसन आरो खामाख्या रेलवे ष्टेसनसिम दोनहरनाय जादोंमोन। लोगोसे हान्था मेला बिफाना निउ जलपाइगुरि आरो बङाइगाव रेलवे ष्टेसनाव थाब थानानै थानांनाय गोबां हान्थियारि राज्यो-राजाफोरखौ थि जायगायाव दोनहरनो थाखाय जर'खा बास गारिनि राहा लायो।
मख'जाथावदि हादोरसानि गुबुन गुबुन जायगाफोराव थानांनाय ए टि एम फोरा बेंक बन्द' थानायनि थाखाय थांनाय 10 डिसेम्बर निफ्राय ड्राइ जाना थायो। सोरखारि आरो बे-सोरखारि मावखुलि, रांखान्थियारि फसंथान, बेफार फालांगियारि खामानिफोरजों लोगोसे सोलोंथायारि फसंथानफोराव नोगोरारि सोदांनाय बिलनिफ्राय मानाव गेदेर हादोरगिरि राम नाथ कबिन्द बिथांआ बिलखौ मुंसाइ होनायनि उनाव आयेनाव महर लानायनि हेंथायै फोसावनायाव बन्द' थानायनि थाखाय गिख्रंथाव लादोंमोन। बेरा फारसेथिं जाय केबनि हेंथायै जांख्रिखांनायाव थांनानै सानै लाइमोन सेंग्राया सुक्रबार खालि मुंख्लं जालांदोंमोन। आरो गुबुन सा 24 सुबुंआ गोब्राब जोखोम जानानै फाहामसालिनि बिसनायाव थिसन जाना दं। सोरखारि सुलुंनिफ्राइ मोनथिनो मोननाय खौरांनि बादिब्ला बृहस्पतिबारनि सम हालागै थैनायनि अन्जिमाया सा 3 जिउ गोमालांदों।
मख'जाथावदि बन्द'नि समाव हालाय हाफाय थासारिजों भुगिनांनाय सुबुंफोरखौ नोजोर लाखिनानै राज्यो-राजानि मदद होनाय आरो सरासनस्रा जिउ खुंनाय राहाखौ आवगायलांनायनि थाखाय माखासे आगान लादों खुंथाइ बिफाना। राज्यो सोरखारनि हेल्पालाइन नाम्बार जादों 1079 आरो 9401044617। दासिम हालागै कामरुप मेट्रपलिटान जिला खुंथाइ बिफाना मोननै इमारजेनसि नाम्बार खुलिनानै होदों ,बेयो जादों 1077 आरो 0361/2733052.
Also Read : जुबिन गार्गआ राजखान्थि दोलो दाफुंनायजों बि जे पि खौ सेलेन्ज होगोन
Also Watch: CITU, SFI, AIKS, AIDWA,DYFI among others stage protest against BJP Government in Assam