Udalguri: बि टि सि नि अदालगुरि जिला दुलाराय हिन्दी भाषी लाइमोन फरायसा आफादनि बान्जायनायाव थांनाय बोसोरनि गोजौ फरायसालिनि जोबथा आन्जाद (HSLC) आरो गेजेरारि थाखोनि जोबथा आन्जाद (HS) आव साबसिनै उथ्रिसारनो हानाय हिन्दी रावारि गुन गोनां फरायसाफोरखौ लानानै मान बावनाय हाबाफारि लानाय जायो। फरायसाफोरखौ गुनगोनां सोलोंथाइनि सोरां लानानै आवगायलांनाय आरो बादायलु मुगायाव समजों गोरोबलांनानै दावगालांनानै साफा साफा नोगोरारि महरै गायसंनायनि थांखि।जेराव दिनैनि फरायसाफोरानो गाबोननि नोगोरारि। फरायसाफोरा थुलुंगाखांनाय होनाय थांखियै आजावनाय होन्ना बुंथियो बान्जाय आफादा।
रायदावनो गोनांदि गुरुचरन राजधरनि खन्थाइ आवराइनायनि उनाव मान बावनाय हाबाफारिया जागायजेनो। अदालगुरि जिला दुलाराय हिन्दी भाषी लाइमोन फरायसा आफादनि राजेन प्रसाद चौहाना गावनो आफादगिरिनि मासि सामलायनाय हाबाफारियाव लिरगिरि, खन्थाइगिरि बैद'नाथ उपाध्याय बिथांआ जुनियायै हिन्दी रावारि फरायसाफोरखौ थांखिना गावस्रानाय साननायखौ नागारना फरायनायनि हुदाखौ जोबोद खस्थ'यै सहायना गोसो होथाबनो खावलायो।
राज्योनि सुबुं सावस्रि सोरदिंगोरा बिफाननि मन्थ्रि रिहन दैमारि बिथाङा गुन गोनां फरायसाफोरखौ सोलोंथाइनि खाबुखौ लानानै आवग्रिनो खावलायो। अदालगुरि जिला समिति दुलाराय आसाम गर्खा फरायसा आफादनि दैदेनगिरि बुद्धिमान सुब्बाया फरायसाफोरखौ गोसो होथाबनानै फरायसा नारसिन्ना बुंथिहरो। मख'जाथावदि बे मान बावनाय हाबाफारिखौ अदालगुरि दख'रा दुलाराय हिन्दी भाषी लाइमोन फरायसा आफादनि हेफाजाबाव खुंनाय जादोंमोन।
