Kokrajhar : आफां आसामनि गंसे गोजौ सोलोंथायारि फसंथान बर'लेण्ड मुलुग सोलोंसालि (Bodoland University) गोबां बोसोरनिफ्राय दाबि खालामफैनाय जेंनाया जोबथायाव जाफुंसार जाबाय। मख'जाथावदि बर'लेण्ड हायुंआरि गौथुम नि गाहाइ सदर थावनि कक्राझारनि बिखायाव जारिमिनारि बर' गोरोबथा (Bodo Accord) नाजावनानै 2009 मायथायाव गायसन जानाय बर'लेण्ड मुलुग सोलोंसालि इउ जि सि 12 बि मानदान्दा (Status) मोनहैनो हाबाय। प्रफेसार पि पि आयानिनि मासि सामलायनाय जथुमनाय आफादा मुलुग सोलोंसालि अनसुंथाइ आयोग (University Grant Commission) नि साब्रै सोद्रोमा गोनां जर'खा आफादनि थान्दै हान्जाया बर'लेण्ड मुलुग सोलोंसालि नायगिदिंनायनि उनाव सुक्रबार खालि सोलोंसालि अनसुंथाइ आयोगा (University Grant Commission) हादोरनि राजथावनि गोदान दिल्लीआव जथुमनाय मिथिंआव 12 बि नि मानदान्दा आवथेनो हानायाव आफां आसामजों लोगोसे बै गोजौ सोलोंथाइ लांगोनायाव गोजोन्नाय लाबोदों।
बर'लेण्ड हायुंआरि गौथुम नि गाहाइ मावफुं सोद्रोमा हाग्रामा महिलारि बिथाङा गावनि बिबुंथियाव बुंथियो दि 12 बि मानदान्दा मोनहैनाया गोलाव बोसोरनिफ्राय भुगिनानै थानांनाय मोनसे गोनांथार जेंना। जेराव आफां आसाम आरो बि टि सि हालाम (BTC Region) नि गंसेल' नायल' जाल' गोजौ सोलोंथाइ फसंथानाव गोदान मिजिंनि सोलोंथायारि आबहावाया जौगाखांनायनि जांख्लायाव गाखोगोन होन्ना मिजिंथिनाय जादों। बे मानदान्दानि गेजेरजों हालामाव सुबुं फुंखा गायसंलांनायजों गोजौ थाखोनि सान्नायजों ओनसोलाव गोजोन थासारि आरो खौसेथि सोमजिनायनि थांखिजों बर'लेण्ड हालामा गोख्रै खारथायनि मासियाव जाफुंसार जानो हागोन।
बर'लेण्ड हायुंआरि गौथुम नि गाहाइ मावफुं सोद्रोमा (CEM) हाग्रामा महिलारि , लेङाइ गाहाइ मावफुं सोद्रोमा (Deputy CEM) खाम्फा बरगयारि आरो मुलुग सोलोंसालि अनसुंथाइ आयोग नि सोद्रोमा ड° किरन हाजरिकाजों लोगोसे बर'लेण्ड मुलुग सोलोंसालिनि भाइस चेन्सेलर लाइस्राम लादुसिं, रेजिस्ट्रार प्रहलाद बसुमतारी बिथांमोना बर'लेण्ड मुलुग सोलोंसालिनि 12 बि मानदान्दा गनायथि होनाय हारिमुवारि हाबाफारियाव नुजाथिफैयो।
बर'लेण्ड मुलुग सोलोंसालिया 12 बि स्टेटास मोननायाव बिहोमा होलांनाय मुलुग सोलोंसालि अनसुंथाइ आयोग नि सोद्रोमा ड° किरन हाजरिका, बर'लेण्ड मुलुग सोलोंसालिनि फालांगि बिफाननि बिबुंगोरा गाहाइ राजेश बर्मन, बर'लेण्ड मुलुग सोलोंसालिनि मावफारिया गौथुम, फरायसा आफाद, बर'लेण्ड मुलुग सोलोंसालिया इउ जि सि नि फ्राय 12 बि मानदान्दा मोननायाव फैबाय थानाय समफोराव जौगानायनि जांख्लायाव आगान दावखोलांनो हागोन आरो सिमांआ मोगथाङाव जाफुंसार जाबाय होन्ना बुंथियो।
