हादोरसानि गंब्रै बिधान सभा बियाबाव बाय इलेक्सन: बि जे पि या गंनै उरां दिङा बाहायगोन

हादोरसानि गंब्रै बिधान सभा बियाबाव बाय इलेक्सन: बि जे पि या गंनै उरां दिङा बाहायगोन

हादोरसायाव सोलिफु दाननि गेजेराव बिसायख'थिनि गोबारै बार नांदों। गाहायै राज्योनि गंब्रै बिधान सभा बियाब (Legislative Assembly Constituency) आव खुंथाइ गोहोआव थानाय राजखान्थि दोलो भारतीय जनता पार्ति जों लोगोसे गाहाइ बेरेखा राजखान्थि गोहो कंग्रेस आरो ए आइ उ डि एफ नि दैदेनगिरि मावथि मददगिरिनि गोसोयाव बिसायख'थिनि बार नांनायखौ नुनो मोननाय जादों। देग्लाय गंब्रै बिधान सभा बियाबाव गासै सा 6,78,898 भ'ट होगिरि राज्यो-राजाया गावनि राजखान्थियारि मोनथाइखौ रोखा खालामगोन। बे गंब्रै बिधान सभा बियाबाव सा 20 बिजाथिफोरा बिसायख'थियाव गसंथेदों। बे बाइ इलेक्सना फैगो 21 अक्ट'बराव खुंफुं जागोन आरो 24 अक्ट'बराव बिसायख'थि दावहानि फिथायखौ फोसावगोन होनना खौरां बिजोंनि गेजेरजों फोरमाय जादों। मख'जाथावदि फैगो 2021 माइथायनि गेजेराव आसाम बिधान सभा बिसायख'थि खुंफुं जासिगोन।

राज्योनि खुंथाइ गोहोआव थानाय राजखान्थि दोलो बि जे पि या दासिमाव गंब्रै बिधान सभा बियाबाव फोसावदिंनायनि थाखाय गंनै उरां दिङा (Helicopter) बाहायगोन होन्ना मिथिहोदों। दोलोनि जानानै दोलोनि गोजौ थाखोनि साथाम दैदेनगिरिया बाहायगोन , बेफोरनि गेजेराव गंसेखौ गिबि मन्थ्रि (Chief Minister) सर्बानन्द सन'वाल आरो गुबुन गंसेखौ सा-सानजा सुबुंदारारि गौथुम (North East Democratic Alliance) नि लिंथुमगिरि हिमन्त बिश्व शर्मा आरो आसाम प्रदेश भारतीय जनता पार्ति नि आफादगिरि रन्जित कुमार दास सानैया गाखोगोन होन्ना मिथिनो मोननाय जादों। आसाम बि जे पि आफादगिरि दास बिथाङा राङापारा बिधान सभा बियाबाव 15 अक्ट'बर , राटाबारि बियाबनि थाखाय 18 अक्ट'बराव गावनि फोसावदिंनाय हाबाफारिखौ लादों।

बेरा फारसेथिं सन'वाला आसामनि गिबि मन्थ्रि सर्बानन्द सन'वाल बिथांआ गंब्रै बिधान सभा बियाबाव फारियै करिमगन्जनि राताबारिनि थाखाय 14 अक्ट'बर, जनिया बियाबाव 15 अक्ट'बर, सुनितपुरनि राङापारा बियाबनि थाखाय 16 अक्ट'बर आरो सराइदेउ जिलानि सनारि बिधान सभा बियाबनि थाखाय 17 अक्ट'बर , बै सानब्रै साननि गोलाव हाबाफारिजों फोसावदिंनायखौ जागाय जेन्नसिगोन।

ओरैहाय आसाम प्रदेश भारतीय जनता पार्ति नि सिगां सारिनि दैदेनगिरि आरो देहा सावस्रि बिफाननि मन्थ्रि ड° हिमन्त बिश्व शर्मा बिथाङा बरपेटा जिल्लानि जनिया बिधान सभा बियाबनि थाखाय 14 अक्ट'बर, राटाबारि बियाबाव 15 अक्ट'बर, 17 अक्ट'बर खालाराव सुनितपुरनि राङापारा बियाब आरो सराइदेउ जिलानि सनारि बिधान सभा बियाबनि थाखाय 18 अक्ट'बराव दोलोनि सायख ' जाखानाय बिजाथिखौ देरहा होनो बाय बिसायख'थिनि दावहा फोथाराव ओंखारगोन होन्ना दोलोनि सुलुंनिफ्राय मिथिनो मोननाय जादों।

बेरा फारसेथिं राज्योनि गाहाइ बेरेखा राजखान्थि गोहो कंग्रेस दोलोआ गंसेबो उरां दिङा गंब्रै बिधान सभा बियाबाव जानो गोनां बिसायख'थियाव बाहायफिना होन्ना दोलोनि सुलुंङाव फोरमाय जादों। आसाम प्रदेश कंग्रेस कमिटि (Assam Prodesh Congress Committee ) नि आफादगिरि रिपुन बरा आरो दोलोनि गुबुन गुबुन सिगां सारिनि दैदेनगिरि मोना गंब्रै बिधान सभा बियाबाव मथर गारि जोंनो गावनि दोलोनिफ्राय गसंथेनाय बिजाथिनि मददाव फोसावदिंनाय (Campaigning) खालामगोन होन्ना मिथिनो मोनदों। गुबुन फारसेथिं ए आइ उ डि एफ नि आफादगिरि आरो धुबुरिनि सांसद बदरुद्दीन आजमल दैदेननाय राजखान्थि गोहोआ बरपेटा जिल्लानि जनिया बियाबाव ल' गावनि हान्जानि बिजाथिखौ गसंथेदों।

Related Stories

No stories found.
logo
Sentinal Assam
bodo.sentinelassam.com