Guwahati: हादोरनि गाहाइ मन्थ्रि नरेन्द्र मडि दैदेननाय बि जे पि सोरखार नोगोरिरि सोदांनाय बिल (Citizenship Amendment Bill) संसदाव लाबोनायखौ बेरेखा खालामनानै सोलिफु 10 डिसेम्बराव 11 घन्टानि बन्द' फोसावदों सा-सानजा फरायसा आफाद (North East Students Union).
मख'जाथावदि नागालेण्डनि अनगायै गासै सा-सानजानि राइजोआव फुंनि 5 निफ्राय 4 रिंगासिम मंग'लबार खालि बन्द' फोसावनाय जादों। सा-सानजानि गुबुन गंसे राइजो नागालेण्डाव दासिमाव सोलिबोबाय थानाय बोथोरारि रंजाथाइ फोर्बो हर्नबिल (Hornbill Festival) खौ नङा नोजोर लाखिनानै बन्द'खौ जानगाराव लाखिनाय जादों। थेवबो नागा फरायसा गौथुम (Naga Student's Federation) आ बन्द' सानखालि नोगोरारि सोदांनाय बिलनि हेंथायै राज भबन लांगोना मोखाङाव खुद्रिसागोन होन्ना फरायसा थान्दै मोना Students Delegation) फोरमायो।
गुवाहाटी नोगोरमायाव मैया खुंफुंनाय मोनसे खौरां गिरि मेलाव सा-सानजा फरायसा आफाद (NESO) नि गोजौ फरायसा दैदेनगिरि (Top Leader's) जों लोगोसे दुलाराय आसाम फरायसा आफाद (AASU) , खासि फरायसा आफाद (KSU) ,गार' फरायसा आफाद (GSU), दुलाराय अरुनाचल प्रदेश फरायसा आफाद (AAPSU ), नागा फरायसा गौथुम (NSF), मनिपुर फरायसा आफाद (AMSU ), मिज' जिरलाइ पाउल (MZP) आरो त्रिपुरा फरायसा गौथुम (TSF)।
मख'जाथावदि सुक्रबार खालिनि मोनायाव
खुंफुंनाय खौरांगिरि मेलाव नेस'नि बोसोनगिरि (Adviser, NESO) ड° समुज्जल भट्टाचार्यी बिथाङा बुङो दि जुदिअ' फरायसा आफादा सरासनस्रायै बन्द' होनायखौ मदद खालामा, थेवबो मिरु सोरखारा बन्द' फोसावनो बाध्य खालामदों होन्ना बुंथियो। मानोना बे बिलनि गोमोराव जोंनि सा-सानजानि थागिबि रावारि सुबुं माहारिनि गांनाय उखैनाय आरो रैखाथि थामोन्थानि खोथा दं।
नोगोरारि सोदांनाय बिल आयेन बेरेखायै हाबसनफैग्रा गुबुनारिखौ रैखा होगोन, संबिजिद बेरेखा आरो जारिमिनारि आसाम गोरोबथाखौ सिफायगोन। नेस'आ खुलायै बे बन्द' फोसावनायखौ मदद खालामदों। फैगो 10 डिसेमबरनि बन्द' फोसावनायखौ साफ्रोमबो सुबुंआ लैहोर लैहोर बाहागो लानानै मदद खालामनांगौ। जों मिजिंथिदों दि बे बन्द' फोसावनायखौ बयबो सुबुङा सोरखारनि हेंथायै ओंखारफैगोन होन्ना बुंथियो दुलाराय आसाम फरायसा आफादनि गाहाइ बोसोनगिरि ड° समुज्जल भट्टाचार्य बिथांआ ।
सा-सानजा फरायसा आफादनि दैदेनगिरि मोना मिरु सोरखारखौ हुमखि फोनांना बुंथियो दि नोगोरारि सोदांनाय बिलनि सायाव गेसाव राजखान्थि गेलेनायनिफ्राय जानगाराव थानो बुंहरो। लोगोसे गासैबो दैदेनगिरि मोना बुंथियो दि जों माब्लाबाबो नोगोरारि सोदांनाय बिलखौ आजावना लानो हाया होन्ना मिथिहोयो।
