आसामनि मन्थ्रि हान्जाया आजावनाय थांखियाव राज्योआव फिनजाथाय सोमजिदों

Guwahati : आसामनि गिबि मन्थ्रि सर्बानन्द सन'वाल दैदेननाय हादोरसा सोरखारानि केबिनेट जथुमा थांनाय सनिबार खालि हादोरसानि जौगाखांनाय आयदायाव माखासे राहा लामा आजावनायखौ लानानै फरायसा आफादनि फिनजाथाय सोमजिदों। दुलाराय आसाम फरायसा आफाद ( All Assam Students Union) आ सोरखारखौ सोंखारिनायनि सोलायै कर्डिनेसन कमिटि अफ ट्राइबेल अर्गेनाइजेसन अफ आसाम (CCTOA) मुंनि आफादा बरायनायखौ नुनो मोननाय जादों।

बेराफारसे थिं जाय दुलाराय आसाम फरायसा आफाद (AASU) नि गाहाइ बोसोनगिरि ड° समुज्जल भट्टाचार्य बिथांआ खौरांगिरिजों जानाय मुगा मुगि बुब्लियाव बुङो दि नोगोरारि सोदांनाय आइन आरो सोरखारनि हेंथायै राज्यो-राजानि सोमावसारनायखौ बन्द' खालामनो फाव फान्दायदों। सोरखारनि केबिनेट जथुमा आजावनाय थांखिफोरा गोदान नङा। जोंनि गोबां बोसोरनिफ्राय दाबि खालामनाय जेंना। दासान्दि बेयो दाबि दावाया मोगथां महराव जाफुंसार जाबाय। लोगोसे बिसोरो बावहायहरनाङा दि नोगोरारि सोदांफिन्नाय आइन बोखारहरा लासे जोंनि सुबुंदारारि खान्थि मानिनानै सोमावसारनाय हाबाफारि सोलिलांबाय थागोन होन्ना बुंथियो।

दुलाराय आसाम फरायसा आफादनि आफादगिरि दिपांक कुमार नाथ आरो गाहाइ नेहाथारि लुरिन ज्योति गगै बिथांमोना सानैबो गावनि बिबुंथियाव बुंथियो दि दिनैनि हादोरसा सोरखारनि मन्थ्रि हान्जाया लानाय थिरांथाया गोबां बोसोरनिफ्राय राज्यो-राजाया दाबि खालामनाय जेंनायाव भुगिगासिनो दंमोन। गमामायैनो नोगोरारि सोदांनाय आइन 2019 आ आबुङै मोगथाङाव जाफुंसार जायोब्ला आसामनि थागिबि सुबुं माहारिनि गांनाय उखैनायखौ फोजोबस्रांगोन। राव दोहोरोम, समाज खान्थि, मोनथाय थामोन्था , सिनायथि गासैबो बिथिङाव थेर बेथेर महर मोनगोनखौ सान्नानै सोमजिनाय अहिंसा जाथायखौ होबथानो थाखाय सोरखारा बे थांखि (Proposal) लादों होन्ना बुंथियो।

गुबुन फारसेथिं जाय कर्डिनेसन कमिटि अफ ट्राइबेल अर्गेनाइजेसन अफ आसाम (CCTOA) मुंनि आफादनि दैदेनगिरि, गाहाइ लिंथुमगिरि आदित्य खाख्लारि बिथाङा खौरांगिरिनि सिगाङाव फोरमाय हरनानै बुङो दि सोरखारा संबिजिदनि‌ दफा नं 345 खौ सोदांफिन्नानैबो अस'मियाखौ हादोरसायारि राव महरै अरायजोर गायसननायनि थाखाय मिरु सोरखारनिसिम थांखि दैथाय हरनाय आयदायाव जोंनि आफादनिफ्राय बरायनाय जादों। लोगोसे हादोरसानि सिङाव थानाय गुबुन गुबुन हारि हारिसा मरान,मटक ,कच राजबंचीनि थाखाय आलादा गावखुंथाइ गौथुम (Autonomous Council) सोरजिनायनि थिरांथाखौ गोसो गोर्बोजों बरायदों। लोगोसे मरान मटक आहोम सुबुं माहारि (Community) नि गांनाय उखैनाय, जारिमिनारि बायखोन्दा नेरसोनखौ बुरखांनाय आरो जौगाखांहोनायनि थाखाय एखुथा राहा लानायखौ सोरखारखौ गोजोन्नाय फोरमायदों। बेजों लोगोसे आरोबाव थागिबि ट्राइबेल माहारिनि गांनाय उखैनायखौ नोजोर होनानै सोरखारा जौगाखांहोनो आरो थामोन्थाखौ रैखाथि होलांनो गावखुंथाइ गौथुम दाफुंना होनांगौ। बर' कसारि , टाइ फाके,टांचा बायदि माहारिनि रांखान्थियारि , राजखान्थियारि समाजारि, मोनथायनि थाखाय खामानि मावलांनो नांगौ होन्ना बुंथियो।

Also Read : गोलाव 20 बोसोरनि उनाव 2000 नि चिरांनि बुथारनाय जाथायाव 20 सुबुंखौ दायनिगिरिनि जिउ जोब्जा साजा फोसावदों

Also Read: Prime Accused in Twin Train Murder-Rape Case sentenced to Life Imprisonment