गाहाय रादाब

दिसपुरा सा 221 एफ टि सोद्रोमाखौ थिसनबाय

एफ टि

 

गुवाहाटी , 12 सेप्टेमबर : हादोरारि नोगोरारि फारिलाइ ( एन आर सि) बिबानगिरिया  फोसावजानाय इलिजिबुल गनायजानाय आर’ज गाबगिरिनि फारि दासिमावबो मोननाय जायाखै थेवबो राज्यो सोरखारा गावसोरनि मावनां बिबानखौ जागायजेनदों। दासिम हालागै राज्यो सोरखारा गोदानै गायसन जानाय गं 200 फरेनार ट्रिबिउनेलाव सोद्रोमा आरो आगोलनि थाखानाय गं 100 फरेनार ट्रिबिउनेलावबो मोन 21 उदां मासिखौबो सुफुंजाबाय।

न’खर आरो राजखान्थि बिफाना दासिमाव गोदान उफ्रा आरो आगुनि फ्राय थानाय 200 फरेनार ट्रिबिउनेलाव सोद्रोमा सायख’जानायखौ लानानै नटिफिकेसन फोसावदों। “सेन्टिनेल” नि खौरांगिरिजों  मुगा मुगि जानायाव न’खर आरो राजखान्थि बिफाननि कमिसनार सेक्रेथारि आसुतस अग्निहत्रि आ बुंदोंदि गुवाहाटी गोजौ बिजिरसालिनि सायख’जानायाव सोरखारा बोसोरसेनि थाखाय सा 221 नि सोद्रोमा खौ थिसनदों। गं 220 उफ्रा फरेनार ट्रिबिउनेलनि गेजेराव सा 21 सोद्रोमाखौ सोरखारा उदां मासिखौ सुफुंनायनि थांखियै थिसननाय जादों। बिथांआ दाजाबदेरना बुंबावो दि उफ्रा फरेनार ट्रिबिउनेलनि सा 221 गोदानै थिसनजाखानाय सोद्रोमाखौ दाजाबदेरना होनाय जादों।

आसामनि सोरखारनि न’खर आरो राजखान्थि बिफाननि कमिसनार सेक्रेथारिआ मख’नानै बुंबावोदि उफ्रा फरेनार ट्रिबिउनेलनि 2000 स्टाफखौ थिसनहैनाय जागोन। आसाम पुलिसनि सायख’ जाखानाय बर्डआ दासिमाव  इन्टारभिउ खौ लाखांबाय। बेनि फिथाय खौ थाबैनो फोसावगोन होनना  मिजिंथिनाय जादों।

मख’जाथावदि सोरखारा देग्लायनि गेजेरावनो गं 200 उफ्रा फरेनार ट्रिबिउनेलखौ खामानियाव मावफुंनो थांखि लादों। गासैबो एक्टिभेट जायोब्ला राज्योनाङैनो खामानि सोलिगोन।

जोबथा एन आर सि फोसाव जानायनि सिगां आसाम सोरखारा मिरु सोरखारनि न’खर मिनिस्थ्रिखौ गं 1000 उफ्रा फरेनार ट्रिबिउनेल गायसन्नायखौ मिथिहोनाय जागोन। न’खर मिनिस्थ्रिया गं 400 उफ्रा फरेनार ट्रिबिउनेल फसंनाय खौ गनायथि होदों। सेथि खोन्दोआव गं 200 आरो नैथि खोन्दोआव आद्रा थानायखौ फसंनाय जासिगोन। बै गासिबो फरेनार ट्रिबिउनेलखौ सोरखारा फसंनो लानाय बिबाना जादों  एन आर सि फोसाव जानायनि उनाव सोमजिनाय आबहावाखौ नायसंनाय।

आबुं हादोरारि नोगोरारि फारिलाइ (एन आर सि) आव गावसोरनि मुं थिसननो हायै आर’ज गाबगिरिया एन आर सि बिबानगरि निफ्राय रिजेक्सन बिथोन मोननाय 120 सानाव जमा होनो हायाब्ला जायखिजाया एफ टि आर’ज गाबनो हागोन। एन आर सि आव मुं गैयि सुबुंफोरा एप्लाइ खालामाब्ला जिला खुंथायानो एफ टि नुजानो बुंहरगोन। सोरबा सुबुंनि गोनांथार फोरमानलाइखौ गोथौयै नायबिजिरनाय आरो हेयारिं फोसाव जानाय नि उनाव एफ टि सोद्रोमायानो मतथाइ होगोन।

 

Also Read: गुवाहाटी नोगोरमायाव दुथांनि गुलि गावनायाव सासेनि जिउ खहा

Also Watch: Bir Lachit Sena in Doomdooma staged 2-hr sit in demonstration | The Sentinel News