Guwahati : राज्योनि गोदानै आइन आब्रुथिनि उफ्रा गाहाइ पुलिस सामलायगिरिनि बिबान मोन्नाय ग्यानेन्द्र प्रताप सिं बिथाङा बुंदों दि नोगोरारि सोदांनाय आइनखौ बेरेखा खालामनायनि असिला लानानै माखासे दुथां आखल आखुनि सुबुंआ दुंहाव थासारि सोमजिनायाव थुलुंगाखां होनाय दायनिगिरि आरो दायनां खामानिफोरखौ नायबिजिरगासिनो दं होन्ना रोखा खालामदों। बेवहाय मोनबो रोखोमनि थार्ड पार्टि लोब्बा गैया होन्ना फोरमायहरदों सिं बिथाङा। मख'जाथावदि आसामाव नोगोरारि सोदांनाय बिलनि हेंथायै गोख्रों सोमावसारनायखौ दबथायनो थाखाय आसाम मेधालय केडारनि गोजौ थाखोनि पुलिस बिबानगोरा (Senior IPS Officer) खौ थिसननाय जादोंमोन।
दि सेन्टिनेल खौरांलाइजों जानाय मुगा मुगि बुब्लियाव उफ्रा गाहाइ पुलिस सामलायगिरि (Additional Director General Of Police) ग्यानेन्द्र प्रताप सिं बिथाङा बुंदों दि नोगोरारि सोदांनाय आइनखौ लानानै सानसेनि उनाव सानसे गिख्रंथाव महर मोन्नाय बेरेखा खालामना थोंजोङै थार्ड पार्टि लोब्बा थानायनि मोनबो सुलुं गैया।
गुवाहाटी नोगोरमाजों लोगोसे राज्योनि दाब दाब जायगाफोराव अहिंसा लामाजों बेरेखा हाबाफारियाव बाहागो लाफैनाय गोसो गुदुं सोमावसारगिरिफोरा दोहोन सम्फथि (Public Property) फोरखौ खहा खालामदों। दासिम हालागै दोहोन सम्फथिफोरखौ सेरखाय बेरखाय खालामनायाव लोब्बा थानायनि दायाव 1,406 सुबुंफोरखौ दिखांनाय जादों आरो सा 175 सुबुंफोरखौ ग्रेप्तार खालामनाय जादों।
बेजों लोगोसे कामरुप मेट्रपलिटान जिलानि अनगायैबो राज्योनि गुबुन गुबुन जायगाफोराव इन्टारनेट सिबिथायखौ दानस'नाय एबा बन्द' खालामनाय आयदानि सायाव ए डि जि पि बिथाङा बुङो दि दासिमाव सोलिबाय थानाय आइन आब्रुथिनि थासारिखौ गाहामै गाहाम नायबिजिरनानै दं। बे थासारिया गोजोन फारसे सिगांलाङोब्ला बिफानारि मावबिबानगोरा (Stakeholders) मोनजों थाबैनो सावराय जथुमाव जिरायगोन। राज्यो-राजाया गोनो गोथो थासारिजों भुगिनांनाय सुबुंफोरखौ गाहाम सान्नानै इन्टारनेट सिबिथाय (Internet Service) खौ फिन जागायजेन्नायनि राहा लानाय जागोन होनना फोरमायो।
रायखांनो गोनां दि गुवाहाटी नोगोरमाखौ लानानै राज्योनि दाब दाब जायगायाव कार्फिउ जाबसिन्नायखौ रिलेक्स खालामनायनि सायाव बुङो दि जों आइन आब्रुथिखौ नोजोर लाखिनानै फरायसंनायनि उनाव कारफिउ फोनांनायखौ रिलेक्स खालामनाय जागोन।
बेराफारसे थिं जाय उफ्रा रैखाथि गोहो थिसन्नाय बेलायाव रादाब बुथुमगिरि नि सोंनायनि फिन्नायाव बुङो दि राज्योनि गोनांथार जायगाफोराव थोजासे अन्जिमानि पुलिस रैखाथि हान्जाखौ दबथायनो थाखाय थिसन्नाय जादों।
