Kokrajhar : हादोरसायाव असमीया सावथुन मुलुगनि मोजां सान फैफिन्नाय बादियैनो बर' सावथुन मुलुगनि मोजां खौरां लाबोदों। जेराव हादोरसानि खना खनलायाव थानाय सावथुन फैसालियाव असमीया सावथुननि फारसे राज्यो-राजानि मदद होनायखौ नुनो मोननाय जादों, समान समानै बर' सावथुन मुलुगनि राफोद फावखुंगुर, बिथोनगिरि (Noted Producer, Director, Actress) रजनि बसुमतारी नि नाजानायाव दिहुननाय जोलै "The Seed" निसिम गोबां बर' राज्यो राजा, अनसाइ गिरि, मोजां मोनग्रा सुबुंनि नायनो फैनायाव गोसोखौ दुंहोदों होन्ना बुंथियो।
मख'जाथावदि बर' फिसार सावथुन जोलै "The Seed" थांनाय 15 नबेम्बरनिफ्राय कक्राझार जिलानि गंसेल' नायल' जाल' गल्ड डिजिटेल सिनेमा ह'लाव (Gold Cinema Hall ) दिन्थिनाय जादों। जेराव सावथुनखौ नायनो गोबां गासैबो बैसोनि नायगिरि (Audience) या बोजबना लादों होन्ना खौरांगिरिजों जानाय मुगा मुगि बुब्लियाव फोरमायो।
बे सावथुनाव गाहायै उदखारि हान्जा संदान्नायनि मुंआव भारतारि फाइखि एबा रैखाथि हान्जाया बर' न'खरखौ माबादि जालाखार बिलाखार थासारिजों भुगिनांनो गोनां जादोंमोन, बेनि मोगथां सावगारिखौनो बे सावथुनाव रिफिखांदों होन्ना मिथिनो मोननाय जादों। जेराव दाय गैयै सुबुंआ राज्यो-राजाखौ हालाय हाफाय थासारिजों फैसालियाव नुनो मोनदों।
रायखांनो गोनां दि आसामनि समाज अनसाइ जौगाखां बिफान (State Social Welfare Minister ) नि मन्थ्रि प्रमिला रानी ब्रह्मआ बे सावथुनखौ नायनानै खौरांगिरिनि सिगाङाव फोरमायो दि सावथुन बिथोनगिरि रजनि बसुमतारी नि नांथाब नाजानायाव दिहुनजानाय सावथुना गोबां राज्यो-राजानि मदद मोनदों। मन्थ्रि प्रमिला रानी ब्रह्म जों कक्राझारनि जिल्ला बेंगिरि (Deputy Commissioner) पार्थ प्रटिम मजुमदार आरो जिलानि गाहाइ पुलिस सामलायगिरि (Superintendent of Police) राजेन सिं बिथाङा बो सावथुनखौ सादा बुसा राज्यो-राजाजों जयैनो नायो।
कक्राझाराव खौरांगिरि जों जानाय मुगा मुगि बुब्लियाव सावथुननि फावखुंगुर, बिथोनगिरि (Noted Producer, Director, Actress) रजनि बसुमतारी बिथाङा बुङो दि 1990 नि समाव सा-सानजा हादोरसायाव उदखारि हान्जा संदान्नायनि मुंआव भारतारि फाइखि एबा रैखाथि हान्जाया हारासाह्थि खालामदोंमोन। आं गावनि टाउनखौ हगारनानै गोजौ सोलोंथाइ आजावनो थांनायाव आंनि नखरा माबादि खास्रि बिस्रि दुखु जार्लाजों भुगिनांनो गोनां जादोंमोन। बै समनिफ्राइनो आंनि बिदा सासेया दिनैसिम हालागै न'आव नुजाथिफैथ'वाखै आरो आंनि बियादै सासेया अना खानायै गुलि गावजादोंमोन। आंनि बिमा बिफाया सानसे आंगो अ'से नख'राव नुजाफैगोन सानै सानैनो सानसे जोबथा हां गारबोदोंमोन। लोगोसे 1990 माइथायाव माबादियै हालाय हाफाय थासारिजों भुगिदोंमोन बेखौनो बेरखांहोनाय जादों होन्ना फोरमायजादों।
