कश राजबंशी माहारिया ल'क सभा, बिधान सभा बियाबनि मासि संरैखानि दाबि दैखांदों

Guwahati : कश राजबंशी माहारियारि गौथुम सुंदयै (Koch Rajbongshi National Convention) आ गुवाहाटी नोगोरमायाव मोनसे खौरां मेल खुंफुंनायनि गेजेरजों बुङो दि हादोरसानि सिङाव थानाय गुबुन गुबुन हारि हारिसा नि थाखाय सोर सोर हारिया थागिबि सुबुं माहारि आरो बिसोरनि मोन्थाय थामोनथाखौ रैखाथि इयुनखौ सान्नानै मोनसे समसिमानि काट अफ यार थियारि खालामनो दाबि दैखांङो। लोगोसे आसाम गोरोबथानि द'फा नं 6 नि सायाव दाजानाय गोजौ थाखोनि बिबानगोरा आफादखौ बिसोरनि दाबि दावा आरो आंखाल सुफुंनो थाखाय खोथा रायज्लायदों आरो गांसे गोसोखांलाइ ( Memorandum) बो गथायदों।

दि सेन्टिनेल खौरांलाइजों जानाय मुगा मुगि बुब्लियाव कश राजबंशी माहारियारि गौथुमनि गाहाइ नेहाथारि (General Secretary) बिश्वजित राय बिथाङा बुङो दि भारत उदांस्रिनि आगोलनि समनिफ्राइनो कश राजबंशी माहारिया खुंथाइ गोहोयाव जिरायनाय सोरखारनिफ्राय समाजारि, राजखान्थियारि मोनथाय आरो रांखान्थियारि नासयनाय आरो हारिमुवारि बिथिङाव अरायबो बिमा बाथुलनि मेगनजों नायफैदों, लोगोसे दानि सोरखारनि मासियाव गाखोनाय दोलोआ बिसायख'रि फोसावदिंनाय जथुम हाबाफारियाव बायदि बायदि गोसो मुहिथाव राजखान्थियारि स्ल'गानजों खम समसिमानि गेजेरावनो दिन्दां जानानै थानांनाय जेंना जेंगोनाखौ सुस्रांनाय एबा बोखारनायनि खोथा होदोंमोन, नाथाय दासिम हालागै जेंनाया अरायबो जेंना महरैनो थालांबाय जाफुंसार महर मोनासै होन्ना दुखुजों फोरमायना बुङो। आथिखालनि सम थासारिखौ बुजिनानै जोंनि हारिनि राजखान्थियारि इयुन रैखाथिनि सोंथिया सिखारदों होन्ना बुंथियो।

बेरा फारसेथिं जाय बै खौरां मेलावनो कश राजबंशी माहारियारि गौथुमनि गाहाइ नेहाथारि (General Secretary) बिश्वजित राय बिथाङा कश राजबंशी माहारिनि सिदिउल ट्राइब मानथाखोनि सायाव सोरखारा थगायना राजखान्थि गेलेफैदों होनना बुंबावो। लोगोसे आसामनि गासै गं 14 ल'क सभानि संसदारि बियाब (House of Parliamentary Constituency) नि गंथाम ल'क सभा बियाबनि मासि फारियै आफां आसामनि धुबुरि,बरपेटा आरो मंगलदै कश राजबंशी माहारिनि थाखाय सिट रिजारभेसननि थाखाय दाबि दैखांङो। बेल' हादोरसानि गं 126 बिधान सभा बियाबनि मोन 26 बिधान सभा मासियाव गावनि हारिनि बिजाथि बादायलायनो हानायनि मोनथाय गथायनांगौ होन्ना बुंथियो। बेफोर बिधान सभा बियाबफोरा जादों फारियै रांङापारा, धेकियाजुलि, बरसला,माजबाट,कलाइगाव, बिजनि, जालुकबारि, सिपाझार, कमलपुर, रंङिया, बरपेटा,तामुलपुर,पाटासारकुसि, भबानीपुर, सेङा, सर'भग, पलासबारि, इष्ट गवालपारा, जलेश्वर, नर्थ अभयापुरि, बङाइगाव, गसाइगाव, इष्ट बिलासिपारा, गौरिपुर आरो गलकगन्ज।

लोगोसे हादोरारि नोगोरारि फारिलाइ सुंद'यै एन आर सि निफ्राय मुं दानजानाय कश राजबंशी माहारिनि थागिबि भारतारि सुबुंफोरखौ हाबसन्नो खावलायो। बेजों लोगोसे कश राजबंशी माहारिनि जारिमिनारि सिनायथि (Historical Identity) रैखाथि खालामनो थाखाय आलादा दोनथुमसालि (Museum) लुफुंनानै होनांगौनि दाबि दैखांङो।

Also Read : आसामनि काजिरङा हादोरारि हाग्रामायाव फेग्रा मुवा बेसाद बाहायनायखौ बेन्द खालामबाय

Also Watch: Two extremists gunned down by security forces under Soraibil BOP in Gossaigaon