हिन्दु गुबुनारिया भारतारि नोगोरारिनि गनायथि मोन्नायाव जिंगासिदों: प्रफुल्ल कुमार महन्तआ

Guwahati: असम गण परिषद दोलोनि बारग' आफादगिरि आरो बै समनि जारिमिनारि आसाम गोरोबथानि मुंसाइ होगिरि प्रफुल्ल कुमार महन्त बिथांआ नोगोरारि सोदांनाय आइनखौ लानानै गोख्रों रागा जोंखांनायखौ नुनो मोननाय जादों। बिथांआ बुंदों दि नसुङारि हादोर बांलादेशाव थानाय हिन्दु सुबुंफोरखौ काट अफ यार 2014 माइथायनि 31 डिसेम्बर बादियै भारतारि नोगोरारिनि मानदान्दा गनायथि होनाय जागोन। मख'जाथावदि बांलादेश आरो गुबुन गुबुन हादोराव थानाय हिन्दु सुबुंफोरखौ दोहोरोम बेलायाव सेरखाय बेरखाय थासारिजों भुगिनांनो गोनां थासारिखौ रैखाथि होनो थाखाय सोरखारा बे थिरांथाखौ आजावदों होन्ना बुंथियो। भारतनि अनगायै गुबुन गुबुन जायगाफोराव थानांनाय हिन्दु सुबुंफोरखौ रैखाथि होनाया जोंनि मावनां बिबान।

नोगोरारि सोदांनाय आइननि बादिब्ला 2014 माइथायनि 31 डिसेम्बर नि समसिमानि गेजेराव भारत हादोराव हाबफैनाय मुस्लिम नङै सुबुंफोरखौ भारतारि नोगोरारिनि मानदान्दा गनायथि होगोन। नाथाय गोनांथार खोथाया बेनो दि काट अफ यार नि सिगां नि समाव भारताव हाबफैनाय सुबुंखौ भारतारि नोगोरारिनि मानदान्दा गनायथि होनाय बिथिंआव सिरि थादों। बेबादि जिंगासिनांगौ हालोदाव 2014 माइथायनि 31 डिसेम्बर समाव भारताव हाबफैनाय गोबां हिन्दु सुबुंआ नोगोरारि मानदान्दा गनायथिनि थाखाय आर'ज गाबहरनो हागोन।

आसामनि बारग' गिबि मन्थ्रि आरो दानि एम एल ए प्रफुल्ल कुमार महन्तआ खुंफुंनाय मोनसे खौरां मेलनि गेजेरजों फोरमाय हरनानै बुङो दि हादोरनि खुंथाइ गोहोयाव जिरायनाय भारतीय जनता पार्ति सुंद'यै बि जे पि नि दैदेनगिरि मोना बायदिसिना सुबुं थुबुरमायाव सोरखार दाफुंनाय लोगो लोगोनो 2014 माइथायनि 16 मे आव आयेन बेरेखायै हाबसनफैग्रा गुबुनारिखौ बोख्लायहरनायनि समायखिरा होदोंमोन। नाथाय दुखुनांथाव खोथाया बेनो दि सोरखारनि दाफुंनायनि उनाव बोखारहरनायनि उलथायै हिन्दु बांलादेशी गुबुनारिखौ गोगोमै बरायबायनोसो सिगांलांबाय होन्ना सोंखारियो।

बेरा फारसेथिं जाय नोगोरारि सोदांनाय आइनखौ लानानै असम गण परिषद दोलोनि आफादगिरि (AGP President) अतुल बराया आंखौ सोंखारिनायनि सायाव बुङो दि आं सानफ्रोमबो नोगोरारि सोदांनाय आइन नि हेंथायै बेरेखा खालामदों। नाथाय आंखौ दोलोनि दैदेनगिरि मोना सावराय जथुमाव लिंहरनाय जाया। बरा बिथांआ (Former CM) प्रफुल्ल कुमार महन्तखौ फिन सोंखारिनानै बुंथियो दि आसामनि गिबि मन्थ्रि थानाय समाव साबेसे गुबुनारिखौ बोख्लायहरनो हाखो होन्ना सोंखारियो।

Also Read: नोगोरारि सोदांनाय आइन: बुधबाराव जौसिन बिजिरसालिया हियारिं फोसावनायनि साखा फारा

Also Watch: RD Junior College Students Stage Massive Protest against CAB