DIBRUGARH: मुलुगनि सोरबिथिं इंराजि गोदान बोसोरखौ गाजा गोमजायै खुंफुंनायनि आबहावा। बै समावनो आसामनि दाब दाब जायगायाव राज्यो राजानि बेरेखा हाबाफारिया जोबनानै थाङाखै। दासान्दि नोगोरारि सोदांफिन्नाय आइन (Citizenship Amendment Act) 2019 खौ बेरेखा खालामनानै सोमावसारनाय सोलिगासिनो दं। मैया अदेबानि बृहस्पतिबार खालि खर'सा आसामनि डिब्रुगर जिलानि सिङाव थानाय साबुवाआव जिल्ला फरायसा आफाद (Dibrugarh District AASU ) नि बान्जायनायाव आरो गुबुन गुबुन 30 फरायसा गौथुमनि मददाव गोख्रों बेरेखा सोमावसारनाय हाबाफारि दिन्थिफुंनाय जायो। मख'जाथावदि गिबि मन्थ्रि सर्बानन्द सन'वालनि जोनोम थिलि साबुवा जेराव गासैबो थाखोनि राज्यो-राजाया ओंखारफैयो।
रायखांनो गोनां दि डिब्रुगर जिला दुलाराय आसाम फरायसा आफादा दखरा फरायसा आफाद (Unit AASU) नि बान्जायनायाव मोनसे गिदिर हान्जा सुरनाय हाबाफारि दिन्थियो। बै हाबाफारियाव बाहागो लानानै दुलाराय आसाम फरायसा आफाद (AASU) नि गाहाइ नेहाथारि (General Secretary) लुरिन ज्योति गगैया बुङो दि दानि गिबि मन्थ्रि सर्बानन्द सन'वाल बिथांआ आसुनि आफादगिरि महरै थानाय समाव राज्यो-राजा (Public) आरो मिरु हादोरसा सोरखारखौ बुंदोंमोन दि जारिमिनारि आसाम गोरोबथानि बादियै आयेन बेरेखायै हाबसनफैग्रा गुबुनारिखौ होख्रांजोबनाय जागोन होन्ना। नाथाय दुखुनांथाव खोथाया बेनो दि जेब्ला बियो गिबि मन्थ्रि (Chief Minister) नि मासियाव जिरायफैबाय अब्लानिफ्राइनो मिरु सोरखारनि मुसुखानि महराव गुरस्लायबाय। बिथांआ गासैबो खोथाफोरखौ बावगारलांबाय , राज्यो-राजानि जेंना जेंगोनाखौ नोजोर होयै जाबाय। राज्यो-राजानि गांनाय उखैनायखौ गोजावहोबाय होन्ना गोखै रावजों सोंखारियो।
गुबुन फारसेथिं जाय दुलाराय आसाम फरायसा आफादनि गाहाइ नेहाथारि (GS) लुरिन ज्योति गगैया नोगोरारि सोदांफिन्नाय आइननि सायाव दाजाबदेरनानै बुंथियो दि जोंनि सि ए ए नि सायाव रोखा मोनसे थिरांथा (Stand) । जों माब्लाबाबो मानिनानै लाग्रोनो हानाय नङा। फैबाय थानाय समफोराव राज्यो सोरखारखौ राजखान्थियारि बिथिंनि नंथारगौ फिन्नाय होगोन।
बै गिदिर सुबुं थुबुरमायाव बाहागो लानानै राज्यो-राजाया बुङो दि बि जे पि दैदेननाय मिरु सोरखारा (BJP Government) गावनि गोहो बोलो नारसिन्नानै नोगोरारि सोदांनाय आइन (Citizenship Amendment Act) संबिजिद बेरेखा ल' (Unconstitutional) नङा। बेयो थागिबि सुबुं माहारिनि मोन्थाय थामोन्थाखौ फोजोबस्रांनायबो लाबोगोन।
बेराफारसे थिं जाय आसामनि राज्यो-राजाया बदरुद्दिन आजमल गिबि मन्थ्रिनि मासियाव जिरायहोआ सिलादित्य देबखौबो जिरायनो होआ होन्ना रोखाथार। ओंखायनो आसामाव बि जे पि नि दोहोरोमारि सानथौ गोसारहोनाय सोलोआव सुबुंआ फोथायनानै लाया। असम गण परिषद दोलोखौ सावरायनानै बुङो दि बि जे पि, ए जि पि आरो कंग्रेस गासैबो राज्यो-राजानि सानस्रिजों गेलेबाय। सोरखारा दासान्दि राज्यो-राजाखौ नासयनायाव नांथाबदों, गादबनो नाजादों नाथाय माब्लाबाबो उन फावसायना , जेब्ला हालागै नोगोरारि सोदांफिन्नाय आइन बोखार हरनाय जाया अब्ला हालागै अहिंसा गैयि सोमावसारनाया गोख्रोंनिफ्राय गोख्रोंसिन महर होनाय जागोन होन्ना फोरमायो।
