हादोरसानि एन आर सि सामलायगोरा मावख'वा बिगोमा गैयि महराव दं

Guwahati : हादोरसायाव एन आर सि नि बारग' गाहाइ सामलायगिरि प्रतीक हाजेला बिथांखौ गावनि जोनोम राज्यो मध्यप्रदेश हादोरसायाव थिसन्नाय एबा त्रेन्सफार जानायनि उनाव हादोरसानि सिङाव थानाय लाख लाख थागिबि भारतारि नोगोरारिया इयुना फारियै खोमसि दोमसि जाना दं। बेनि गेजेरावनो गोदानै सायख' जाखानाय एन आर सि नि हादोरसायारि कर्डिनेटर हितेश देब शर्मा बिथांखौ लानानै ससियेल मिडियाआव सुबुं माहारि बेरेखा बिबुंथि गोसारनाय बायदि बायदिखौ लानानै गुलुं गुजुं थासारि सोमजिनायखौसो नुनो मोननाय जादों।

सोलिफु दाननि 9 खालारखालि हादोरसा सोरखारा नोगोरारि जौगाखां रांखान्थियारि बिफाननि नेहाथारि हितेश देब शर्मा बिथांखौ आसामनि एन आर सि नि सामलायगिरि महरै थिसन्नाय जायो। मख'जाथावदि बिथांखौ आसामनि एन आर सि नि बिबानाव थानाय बारग' सामलायगिरि (Former Coordinator) प्रतीक हाजेला बिथांआ मध्यप्रदेश हादोरसायाव टेन्सफार जानायनि उनाव बे थिरांथाखौ हादोरनि जौसिन बिजिरसालि (Supreme Court ) या आजावो।

हादोरसानि गोदान एन आर सि नि गाहाइ सामलायगिरि (Coordinator) महरै हितेश देब शर्मा बिथांआ थांनाय 11 नबेम्बराव गोदान मासियाव जिरायनांगौमोन नाथाय दासिम हालागै बै गोजौ थाखोनि खुंथायारि बिबानगोरा (Civil Officer) मासियाव जइन जाथ'वाखै। जायनि थाखाय दिनै लाख लाख थागिबि भारतारि नोगोरारिया जोबथा एन आर सि फोसाव जानाय फारिलाइ निफ्राय दानखाजानाय सुबुंफोरा दासिमाव खोमसि दोमसि जानायनि लामायाव। अदेबानि बुंनो थाङोब्ला बिगोमा गैयि एन आर सि नि महराव नुजादों।

हादोरसानि एन आर सि नि सामलायगिरि मावखुलि हितेश देब शर्मा बिथांखौ मावफुं बिथोनगिरि (Executive Director) महरै से नै बोसोरनि थाखायल' थाखाय थिसन्नाय जादों। मानोना बिथांआ बे बिबानाव बानस'नायनि सिगां हादोरसायाव सोलिबोबाय थानाय एन आर सि नि सायाव समाजारि बिजों (Social Media) नि गेजेरजों गोबां बांसावनाय पष्ट लिरनाय, बिबुंथि आरो गुबुन गुबुन बिथिंनि दैदेनगिरि मोना बायदि अ'जद दैखांजानायनि जाउनाव खम समसिमानि थाखाय थिसन्नाय जादों।

बेरा फारसेथिं जाय जेब्ला आसामनि एन आर सि नि अथ'रिथि गेजेरजों 19 लाख थागिबि भारतारि नोगोरारिनि रिजेकसन अर्दार फोसाव जाबाय अब्लानो मुं दानजानाय राज्यो-राजानि इयुना बबे खारगोन बेखौ रावबो हमदांनो हास्लाबाखै।

रायखांनो गोनां दि 2019 माइथायनि 31 आगष्टआव जोबथा हादोरारि नोगोरारि फारिलाइ सुंद'यै एन आर सि फोसाव जानायनिफ्राय दिनै दान मोननैनिबो बारा सम बारबाय। मोनसे जिंगासि नांगौ खोथाया बेनो दि गासै सा 19,06,657 थागिबि भारतारि नोगोरारिया नेसनेल रेजिस्थाराव गावनि मुं सोफादेरनायाव इलिजिबुल सान्नाय जादों। बै मुं दानजाखानाय एबा इलिजिबुल सानजानाय नोगोरारिफोरा जायगायारि फरेनार ट्रिबिउनेलाव थांनानै आर'ज गाबहरनायजों गावनि मुं सोफादेरनो हागोन। गासै 3.29 कौटि अन्जिमानि भारतारि नोगोरारिया एन आर सि आव गावनि मुं सोफादेरनो आरज गाबहरदोंमोन आरो बेनिनो 3.11 कौटि नोगोरारिया जोबथा हादोरारि नोगोरारि फारिलाइ सुंद'यै एन आर सि आव सोफादेरनायाव जाफुंसार जादों।

Also Read : अदालगुरियाव मोसानाय फोरोंगुरु हरि बर’आ लामा जाब्रबथायजों जिउ खहा

Also Watch: Guwahati Mahanagari Unayan Samiti gheraoes Guwahati Jal Board Office