Guwahati : नोगोरारि सोदांनाय आइनखौ बेरेखा खालामनानै थांनाय सप्ताहयाव आसामनि सोरबिथिं दुंहाव एबा गुलुं गुजुं थासारिया जोबनानै थाङाखै। नाथाय बेनि असिला लानानै बेरेखा राजखान्थि हान्जा कंग्रेस दोलोनि गेजेराव साखा फारा जानायखौ नुनो मोननाय जादों।
मैया अदेबानि सुक्रबार खालि गुवाहाटी नोगोरमानि आसाम प्रदेश कंग्रेस कमिटि( APCC) नि गाहाइ मावख'वाव खुंफुंजानाय मोनसे खौरांगिरि मेलनि गेजेरजों आफादगिरि रिपुन बरा, ए पि सि सि नि इन्सार्सं हरिश रावाट, गागि दैदेनगिरि भुमिधर बर्मन बिथांआ बि जे पि नि सोरखारखौ गोखै रावजों सोंखारियो। हरिश रावाट बिथाङा मेलाव बुङो दि आसाम सोरखारनि सानै दैदेनगिरिनि गेजेराव बादायलायनाय सोलिगासिनो दं। सासेया गिबि मन्थ्रि आरो गुबुन सासेया सुपार सि एम। नाथाय सोरनाव दिल्लिया बांसिन फोथायनाय दं। जों मोनथिनो हायाखै, आं थारैनो सोमोनांथाव जादों दि सासेया मन्थ्रियानो गासैबो बिथिङाव गोनांथार आगान लायो, बबेयाव रैखाथि गोहो जाबसिन्नगोन , नाङा गासैबो थिरांथा लायो। आसामाव आइन खान्थि गैयै बादि आबहावा सोरजिदों। कंग्रेस दोलोनि थिरांथा रोखा दि फैगो 2021 माइथायाव आसाम हादोरसायाव कंग्रेस दोलोनि दैदेननायाव सोरखार दाफुंनो हायोब्ला नोगोरारि सोदांनाय आइनखौ थाबथाबैनो बोखार हरनाय जागोन। लोगोसे 2024 आव मिरुनि खुंथाइ गोहोआव जिरायोब्ला बेले बेजे गोनां नोगोरारि सोदांनाय आइनखौ बोखारहरनाय जागोन। आसामनि सुबुं माहारिनि गांनाय उखैनायखौ नोजोर लाखिनानै कंग्रेस दोलोआ सोलिगोन। नोगोरारि आइननि हेंथायै कंग्रेस दोलोआ सानफ्रोमबो राज्यो-राजानि गाहाम साननानै सोलिगोन होन्ना फोरमायो।
बेरा फारसेथिं जाय आसामनि गिबि मन्थ्रि सर्बानन्द सन'वाल बिथांआ खुंफुंनाय खौरांगिरि मेलनि उनावनो गुवाहाटीनि राजिब भबनाव खुंनाय खौरां मेलाव गागि कंग्रेस दैदेनगिरि तरुन गगैया बुङो दि गिबि बिबुंथियावनो सर्बानन्द हिमन्त हाताउ आसाम बासाउ, बि जे पि हाताउ देश बासाउ गारांजों जाउरिखांङो। सोद्रोम सुबुं समाज , फरायसा, आबादारि गासैबो थाखोनि राज्यो-राजानि सर्बानन्द सन'वाल दैदेननाय हादोरसा सोरखारनि फार्से फोथायनाय गैया जादों। दिनैनि दुंहाव थासारि सोमजिनायनि थाखाय सर्बानन्द गावनो दायनिगिरि। आसामनि थागिबि सुबुं माहारिनि गोसोयाव गेजेराव दिनै जांख्रिखांनाय फैदों। आथिखालाव दुलाराय हादोरनाङै नोगोरारि सोदांनाय आइन बेरेखा दुंहाव बार बारदों। राव दोहोरोम सायख'वालासे गासैबो थाखोनि राज्यो-राजाया दिनै राजा लामायाव ओंखारफैदों।
बेरा फारसेथिं जाय आसाम प्रदेश कंग्रेस दोलोनि आफादगिरि आरो एम पि रिपुन बरा बिथांआ बुङो दि नोगोरारि सोदांनाय आइननि हेंथायै जों राज्यो-राजानि गाहाम सान्नानै आयेनारि लामाजों जुजिलांबाय थागोन। जेब्ला सिम नोगोरारि सोदांनाय आइनखौ बोखारहरनाय जाया। जोंङो सानफ्रोमबो राज्यो-राजानि जानानै आगान लागोन। बै हाबाफारियाव ए बि भि पि, सोद्रोम समाज, आजिरा लानाय बिबान गिरि , दोलो आफादनि मावथि सोद्रोमामोना कंग्रेस दोलोआव हाबफैयो।
Also Read: हिन्दु गुबुनारिनि मुङै नंखाय खोथाजों अस’मियाखौ दुथां आखुनि सुबुंआ गिखांहोदों: सर्बानन्द सन’वाल
Also Watch: AATASU staged protest against the Citizenship Amendment Act. 2019 in Golaghat