हादोरसा सोरखारा गोरों लाइमोनफोरखौ खामानियाव थिसन्नायाव फेलें जादों : ए ए इउ ए

हादोरसानि सिङाव थानाय लाख लाख गोरों गोरा लाइमोन सुबुंफोरखौ साख्रि थिसन्नायाव खुंथाइ गोहोयाव जिरायनाय सोरखारा फेलें जादों होन्ना गोख्रों अ'जद दैखांदों दुलाराय आसाम आनइम्पइलमेन्ट एस'सियेसन।

मोनसे खौरां बिबुंसारनि गेजेरजों दुलाराय आसाम आनइम्पइलमेन्ट एस'सियेसन मिरु आफादनि आफादगिरि धर्मेन्द्र देउरि आरो नेहाथारि जिबन राजख'वा फोरमायहरनाय खौरांनि बादिब्ला खुंथाइ गोहोयाव जिरायनाय लोगो लोगोनो बोसोरफ्रोमबो नै लाख गोरों गोरा लाइमोन सुबुंफोरखौ साख्रि एबा खामानियाव थिसनगोन होन्ना बायदि बायदि बिसायख'थि फोसावदिंनायाव बाहागो लानानै सदबांसा होदोंमोन। बे सदबांसा होनायखौ फोथायनानै हादोरसानि बांसिन बिधान सभा बियाबावनो बि जे पि नि बिजाथि फोरखौ राज्यो-राजाया भ'ट होदोंमोन। नाथाय दासिमाव बिसायख'थियाव होनाय सदबांसा बादियै थिसन्नायनि बेलायाव मोनबो रोखोमनि खामानियाव महर मोनाखै होन्ना बुंथियो। आसाम सोरखारा गुवाहाटी नोगोरमायाव एडभानटेज आसाम खुंफुंनायनि मुंआव नै थाम दान सिगां बुर्जा बिबांनि कौटि कौटि रां खरसा खालामदों होन्ना सोरखारखौ सोंखारियो।

मख'जाथावदि खारिथि फोनांजाब मोनथाइ आइन (Right to Information Act) नि मिथिनाय बादिब्ला राभा हासं गावखुंथाइ गौथुमनि नेहाथारिख'आव सा 197 लाइमोन फोरोंथाइ होनाय जादों, जेराव

आनइम्पइलमेन्ट ट्रेइनिं आरो एनगेस्मेन्ट बिथोनगिरि सिङाव सा 1258 बिजाथिखौ फोरोंथाइ राहा खालामनाय जादों। थिग बिदिनो टिवा गावखुंथाइ गौथुमनि जोहै सा 336 , सा कक्राझारनि Skill Development आरो Enterpreneurship Department नि सिङाव सा 800 गोरों बिजाथि, खानापारानि हर्टिकालसार आरो फुड प्रसेसिं बिफाननि सिङाव सा 110, आसाम पन्सायत आरो गामि जौगाखां फसंथाननि सिङाव सा 12,007 , Assam State Rural Livelihood Mission जोहै सा 39,403 गोरों लाइमोन सुबुं, सिबसागर स्कील इम्पइलमेन्टनि जोहै सा 80 । गासै सा 70,967 गोरों गोरा लाइमोन सुबुंफोरखौ फोरोंथाइ जगायहोयो हादोरसा सोरखारा।

बेराफारसे थिं जाय ASRLM नि जोहै सा 33,456 लाइमोन गोरों-गोरा सुबुंआ नांथाबदोंमोन आरो दासिमाव सा 19,233 सुबुंआ खामानि मावलांगासिनो दं। अजायै सा 10,294 गोरों-गोरा सुबुंआ आसाम पन्सायत आरो गामि जौगाखां फसंथाननि सिङाव गावखौ फसंनो हाबाय, टिवा गावखुंथाइ गौथुमनि जोहै सा 253 सुबुंआ, सा 16,744 सुबुंआ आसाम स्कील डेभेलपमेन्ट मिशननि जोहै, Skill Development आरो Enterpreneurship Department नि जोहै सा 12,58 गोरों गोरा लाइमोन सुबुंआ गावखौनो गाव गायसंलांनो हादों। गाहायै सा हादोरसानि सा 81,238 लाइमोन गोरों गोरा बिजाथि फोरोंथाइनि उनाव खामानि थिसनलांनो हादों होन्ना खौरां बिबुंसाराव फोरमायजादों।

Also Read : पुर्बरंग’ फावथाइ फोर्बोआव ‘बुथुवा थुंग्रि’ दिन्थिफुंदों जयन्त नार्जारिआ

Also Watch: Titabor Model Hospital Inaugurated by Minister of State for Health Pijush Hazarika