गोदान मोननै जिला आरो महकुमा दाफुंनायनि थिरांथाया दिन्दां जानानै दं

Guwahati : गोलाव बोसोरनिफ्राय गावनि गांनाय उखैनायखौ सुफुंनो थाखाय दाबि खालामना फैनाय जेंनाया जोबथानायाव आबुं जानायनि लामायाव। गाहायै आसामनि कामरुप गामियारि जिल्लानि सिङाव थानाय दरनै खोन्दो खोला कामरुप आरो साहा कामरुप आलादा महरै दाफुंनाय आरो गं 24 महकुमा दाजाबदेरनाया आयदाया केबिनेट दालाइ आफादनि सोद्रोमा मोना बे आयदानि सायाव गोनांथार महरै आखायाव लादों। बे आयदानि सायाव मोजाङै मोजां नायसंनानै बे फोरमायबिदांखौ गथायनाय जागोन। बे से बोसोर आरो ब्रै दान सम नायसंनायजों दिसपुरनि खुंथाइ गोहोआव जिरायनाय भारतीय जनता पार्ति सुंद'यै बि जे पि सोरखारखौ गथायनाय जागोन।

आगोलनि 2016 माइथायनि कंग्रेसनि‌ तरुन गगै दैदेननाय कंग्रेस सोरखारा हादोरसानि‌ गेजेराव आसामाव गं बा गोदान जिला आरो माखासे महकुमा खुंथाइ दाफुंना होदोंमोन। उनाव भारतीय जनता पार्ति सुंद'यै बि जे पि नि सोरखारा खुंथाइ गोहोयाव जिरायनाय लोगो लोगोनो गोनांथि गैया सान्नानै माखासे महकुमाखौ दानस'नाय जादोंमोन।

आरोबाव गोदानै मोननै जिला आरो गं 24 महकुमा खुंथाइ दाफुंना होनांगौनि दाबिखौ लानानै दासिमाव हादोरसा सोरखारा जिला महरै दाफुंनायनि गोनांथिखौ नायबिजिरनो थाखाय मोनसे गोख्रों केबिनेट दालाइ आफाद दानाय जादों। गाहायै केबिनेट दालाइ आफाद (Cabinet Sub Committee) खौ आसामनि देहा सावस्रि आरो रांखान्थियारि बिफाननि मन्थ्रि ड° हिमन्त बिश्व शर्मा बिथांखौ दालाइ आफादनि मासिगिरि महरै दाफुंनाय जादों, जेराव गुबुन गुबुन सानै केबिनेट दालाइ आफाद नि सोद्रोमा फारियै बिगियान बिरोंदामिन बिफाननि मन्थ्रि केशब महन्त आरो सुबुं सावस्रि सोरदिंगोरा बिफाननि मन्थ्रि रिहन दैमारि मोनजों दाजानाय दालाइ आफादा नायबिजिरगोन होनना मिथिनो मोननाय जादों।

नाथाय बयनिख्रुइबो सोमोनांथाव खोथाया बेनो दि दानि भारतीय जनता पार्ति सुंद'यै बि जे पि नि दैदेननाय राज्यो सोरखारनि माव बिबान सम जोबहैनो बे बोसोर ब्रै दानल' आखायाव दं। दासिम हालागै केबिनेट दालाइ आफादनि सोद्रोमा मोना मोनफा मोनफायै गंनै गोदान जिला खोला कामरुप आरो साहा कामरुप आरो हादोरसानि गं 24 महकुमा दाफुंनायनि सायाव सावराय जथुमावबो बाहागो लादों।

नाथाय बयनिख्रुइबो गोनांथार खोथाया बेनो दि 2021 माइथायाव खुंफुंजानो गोनां आसाम बिधान सभानि बिसायख'थिनि सान एबा सम बै बोसोरनि गिबि सप्तायाव हादोरनि बिसायख'थि आयोगा फोसावोब्ला बे गोदान जिला आरो महकुमा दाफुंनायनि थिरांथा नि खाफाला दिन्दां जानानै थागोन।

Also Read : अजैद्धा दान्थे बिदान्थे आयदा: राम जन्मभुमियाव मन्दिर लुजागोन, गुबुन हा खोन्दोखौ मुस्लिमखौ गथायबाय

Also Watch: CM Sonowal inaugurates National Livestock and Poultry Show 2019