दुंहाव थासारिनि आन्दोआव मोनसे गोहो दं : मन्थ्रि हिमन्त बिश्व शर्मा

Guwahati : नोगोरारि सोदांनाय आइन (Citizenship Amendment Act) खौ लानानै राज्योनि सोरबिथिं दुंहाव थासारि सोमजिदों। राज्योनि गोबां जिल्लायाव कार्फिउ जाबसिन्नाय समावनो आइन आब्रुथि (Law & Order Situation) खौ नेवसिनानै नुजाफैदों बयबो।

दुलाराय आसाम फरायसा आफाद आरो गुबुन गुबुन आफादनि बान्जायनायाव रोजा रोजा राज्यो-राजाया पद'जात्रा, खुद्रिसारनाय हाबाफारियाव लोब लोब ओंखारफैदों। नोगोरारि सोदांनाय आइनखौ बेरेखा खालामनानै आसामनि सोरबिथिंआव गोख्रों सोमावसारनाय हाबाफारि दिन्थिफुंनाय उनाव हादोरनि खना खनलायाव खुद्रिसारनायनि बार बारदों।

मख'जाथावदि राज्योनि राजथावनि नोगोरमा गुवाहाटीजों लोगोसे गुबुन गुबुन जायगाफोराव नोगोरारि सोदांनाय आइनखौ बेरेखा खालामनायनि मुंआव सोरखारि दोहोन सम्फथिफोराव बायग्लिनाय, फोजोंनाय बायदि अहिंसा जाथायाव थोंजोंङैनो गाहाइ बेरेखा राजखान्थि हान्जा कंग्रेस आरो आफां आसामनि गवालपारा नलबारि आरो बरपेटा जिल्लानि सुबुं लोब्बा दं । मैया दिसपुरनि सोरखारि मावख'वाव खुंफुंनाय मोनसे खौरां मेलनि गेजेरजों फोसावहरना आसाम सोरखारनि बुंथिगिरि आरो मन्थ्रि ड° हिमन्त बिश्व शर्मा बिथाङा बुङो।

रायखांनो गोनां दि गुवाहाटी नोगोरमानि स्री मन्त शंकरदेब कलाक्षेत्र , जनता भबन आरो हातिगाव ओनसोलाव सोमजिनाय अहिंसा जाथायाव लोब्बा थानाय दायाव हमजानाय सुबुं आरो गरचुक,फटासिल,गितानगर, सनापुर,चान्दमारि बायदि पुलिस थानायाव गसर थिसननाय खारिथिनि खौरांनि बादियै पुलिसा ग्रेप्तार खालामनाय सुबुंफोरनि मुंफोरखौ मख'नानै फोरमायो दि गुवाहाटी नि जायगायारि सुबुंआ लोब्बा थानायनि फोरमानथि जोबोद बाङाइ। गुवाहाटी नोगोरमानि राज्यो-राजाया राजा लामायाव नोगोरारि सोदांनाय आइनखौ बेरेखा खालामदोंब्लाबो गोजोनै सोमावसारनाय समाव बाहागो लादोँमोन। नाथाय जायफोरा अहिंसा जाथायनि गेजेरजों दुंहाव थासारि सोमजिहोनाय गोबांआनो गाहायै आफां आसामनि दाब दाब जायगानिफ्राय फैनाय। जायफोरखौ ग्रेप्तार खालामनायनि उनाव बे फोरमानथि बोखांनाय जादों।

गुवाहाटी नोगोरमानि स्री मन्त शंकरदेब कलाक्षेत्र लांगोनायाव बायग्र जिग्र खालामनायाव सा 24 सुबुंआ लोब्बा दं। बिसोरो जादों अलकेश दास, कासिबुद्दीन आहमेद, वासिम आहमेद, साहिल खान, इमरान आलि, जाहांगिर आहमेद बायदिखौ ग्रेप्तार खालामनाय जादों। बे गासैबो जाथायनि आन्दोआव जुबेर आलम मुंनि सासे सुबुंआ लोब्बा दंखायो आरो बियो मोनसे राजखान्थि हानजानि सासे गोख्रों मावथि। थिग बिदिनो गरचुक पुलिस थाना हालाय हाफाय जानाय जाथायाव लोब्बा थानाय दायाव समिर आलि , अंकुर बर्मन, आलाम खानखौ ग्रेप्तार खालामनाय जादों।

दासिमाव नोगोरारि सोदांनाय आइनखौ लानानै सोमजिनाय गुलुं गुजुं थासारिनि हालोदखौ नोजोर लाखिनानै इन्टारनेट सिबिथायखौ थाबैनो फोनांजाबनाय जागोन होन्ना मिथिहोयो। बेराफारसे थिं जाय नोगोरारि सोदांनाय आइनखौ लानानै गोरोन्थि लामा आन्दायदों होन्ना अ'जद दैखांङो।

आसामनि देहा सावस्रि बिफान नि मन्थ्रि ड° हिमन्त बिश्व शर्मा बिथाङा सा 27 नि गेजेराव सा 10 सुबुंखौ गुवाहाटी देहा फाहामसालिमा (Gauhati Medical College & Hospital) याव फाहामनाय सोलिगासिनो दं। गुबुन फारसेथिं जाय खमसिनै जोखोम जानांनाय सा 13 सुबुंफोरखौ देहा फाहामगिरिनि दिथायाव उदां खालामनाय जादों। लोगोसे नोगोरारि सोदांनाय आइनखौ बेरेखा खालामनानै राजा लामायाव होबथानानै ओंखारफैनाय रोजा रोजा सुबुंनि जांख्रिखांनायाव बाहागो लाफैनायाव जिउ गोमालांनाय साब्रै सुबुंखौ फिन सुफुंथाइ राहा होनाय जागोन होन्ना फोरमायदों।

Also Read : नोगोरारि सोदांनाय आइननि हेंथायै साहा लक्षिमपुराव आसुनि बान्जायनायाव पद यात्रा हाबाफारि

Also Watch: RD Junior College Students Stage Massive Protest against CAB