Kokrajhar : आसामनि गिबि मन्थ्रि सर्बानन्द सन'वाल बिथांआ मैया बर'लेण्ड हायुंआरि गौथुम नि सिङाव थानाय चिरां जिलानि बेंन्दोंनि सापागुरियाव गोदानै लुफुंजानाय गोजौ सोलोंथाइ फसंथान डन बस्क' फरायसालिमा (Don Bosco College) बेखेवना होयो।
गिबि मन्थ्रि सन'वाल बिथांआ गावनि बेखेवथि बिबुंथियाव बुंथियो दि 21 थि जिथाया जौगाथायनि सम, बिगियान बिरोंदामिननि गेजेरजों फोजौखांनाय आरो जांख्रिखांनायनि मुगा , गोगो आरो गुनगोनां सोलोंथाइ नाजावनायाव गुबुन गुबुन सोलोंथाइ फसंथाननि बादि डन बस्क' फरायसालिमानि सोलोंथाय लाग्रोनायाव फरायसाफोरखौ गोगो सोलोंथायनि आबहावा सोरजिदों। गुनगोनां सोलोंथाइ फरायसाफोरखौ जगायनायनि बेलायाव डन बस्क'फरायसालिमानि मुंआ सिगाङाव लाथारनांगोननो। सुबुं समाजाव गियाननि सोरां सारफावनायाव डन बस्क' सोलोंथायनि जर'खा बिहोमा होदों।
मख'जाथावदि आसामाव कार्बि आंलंनि डिफु आरो गुवाहाटीनि आजारा नि उनाव चिरां जिलानि सापागुरियाव गोदानै लुफुंजानाय डन बस्क'सोलोंथाय फसंथाना थामथि गोजौ फरायसालिमा। समबाराव बिथाङा बुङो दि डन बस्क' सोलोंथाया गोगो आरो गुनगोनां सोलोंथाय गोसारहोनायाव 100 बोसोरनि बारा सम फरायसाफोरखौ बिहोमा होलांदों।
डन बस्क' सोलोंथायारि फसंथाना गासैबो थाखोनि मानसिखौ गियान सारफावदों। जर'खायै उन गोग्लैसोनाय गैजारोङि सुबुं समाजनि फरायसाफोरखौ गियान होदों, सेइन्ट डन बस्क'नि गोथार सानस्रि आरो सान्थौजों थुलुंगाखां होदों, सोलोंथाइनि गेजेरजों सासे गुनगोनां फरायसाफोरखौ निदाननि समाव हेफाजाब होनाय जारिमिनारि गाहाम बिदिन्थि होन्ना बुंहरो।
बिथांआ डिब्रुगर नि डन बस्क' फरायसालियाव फरायनाय समखौ गोसोखांनानै बुङो दि आदर्श गोनां आरो गुन गोनां सोलोंथाइ आवग्रिनायनि
गेजेरजों जिउआव गोगो नोगोरारि जानायनि गियान आर्जिनो हादोंमोन। बे सोलोंथाय फसंथाननि गेजेरजों बि टि सि हालाम लोगोसे आफां आसामाव गोगो गियान आर्जिनानै फरायसाफोरा गावखौनो गाव गुन गोनां नोगोरारि फसंनो हागोन। ओनसोलाव गोगो सोलोंथाइनि आबहावाया मोनसे जौगाखांनाय नि लामायाव गायसंजागोन।
हादोरनि गाहाइ मन्थ्रि नरेन्द्र मडि दैदेननाय लामायाव ष्टार्ट आप इन्डिया, डिजिटेल इन्डिया आरो ष्टेन आप इन्डिया बायदि मावबिथांखिखौ मख'लांनानै गिबि मन्थ्रि सर्बानन्द सन'वाल बिथांआ बुंथियो दि डन बस्क' फरायसालिमाया बेफोर बादि मावबिथांखि गाहामै मावफुंनायाव जर'खा बिफाव लानांगोन आरो सुबुं सम्पद दाफुंनायनि आबहावा सोरजिनानै हादोर जौगाखांनायाव गोनांथार बिहोमा होलांनांगोन होन्ना बिबुंथि लाखियो।
रायखांनो गोनां दि फादार थमास फुलपिल्लिनि मासि सामलायनाय हाबाफारियाव गिबि मन्थ्रि सर्बानन्द सन'वाल बिथांजों लोगोसे बर'लेण्ड जारखुंथाइ गौथुमनि गाहाइ मावफुं सोद्रोमा हाग्रामा महिलारि, मन्थ्रि प्रमिला रानी ब्रह्म आरो चन्दन ब्रह्म, बर'लेण्ड मुलुग सोलोंसालिनि भाइस चेन्सेलर लाइस्रम लादुसिं, चिरांनि जिला बेंगिरि गौतम तालुकदार बिथांजों लोगोसे गोबां गुनगोनां सुबुंफोरा बाहागो लायो
Also Read : बर’लेण्ड मुलुगसोलोंसालिया 12 बि मानदान्दा मोननायाव बर’ थुनलाइ आफाद आरो इउ बि पि अ आ गोजोनदों
Also Watch: CITU staged protest rally against State Education Minister Siddhartha Bhattacharya