गुवाहाटी गोजौ बिजिरसालिनि बिथोनखौ मानिनानै रैखाथि बादा लुफुंदोंमोन : तरुन गगै

Guwahati : दा बावैसो साननि सिगां भारतीय जनता पार्ति सुंद'यै बि जे पि दोलोनि दैदेननायाव गोदान दिल्लियाव खुंफुंजानाय मोनसे गेदेर सुबुं थुबुरमायाव भारतनि गाहाइ मन्थ्रि नरेन्द्र मडिया हादोरनि दाबसेबो खनायाव रैखाथि बादा (Detention Camp) गैया होन्ना फोरमाय हरनाय लोगो लोगोनो गोख्रों फिनजाथाय सोमजिनाय नुनो मोननाय जादों। बेनि बाहागो महरै आसामनि बारग' गिबि मन्थ्रि (State Ex Chief Minister) तरुन गगैया बुङो दि मडिया नंखाय खोथानि आश्रय लादों। जोंनि समाव रैखाथि बादा थानायनि समखौ गोसोखांनानै बुङो दि 2009 माइथायनि गुवाहाटी गोजौ बिजिरसालिनि बिजिरगिरि बि के शर्मानि बेन्सा होनाय बिथोन बादियै आसामनि कंग्रेस सोरखारा रैखाथि बादा (Detention Camp) लुफुंदोंमोन।

गुवाहाटी नोगोरमायाव थानाय आसाम प्रदेश कंग्रेस कमिटिनि गाहाइ मावख'वाव खुंफुंजानाय मोनसे खौरांगिरि मेलनि गेजेरजों बारग' गिबि मन्थ्रि आरो गागि कंग्रेस दैदेनगिरि तरुन गगै बिथाङा गावनि बिबुंथियाव बुंथियो दि नरेन्द्र मडिया हादोरनि राज्यो-राजाखौ नंखाय लामाजों आनदायहोदों। आसामावनो नङा गुबुन गुबुन जायगाफोराव डिटेनसन केम्प दं। बै समाव आसामाव गुवाहाटी गोजौ बिजिरसालिनि बिथोनखौ मानिनानै फसंनाय जादोंमोन। जेखिजाया जादोला मानो दासान्दि बि जे पि दैदेननाय मिरु सोरखारा मानि थाखाय 46 कौटि रां खरसा खालामनानै आफां आसामनि गवालपारा जिलानि सिङाव थानाय माटियाआव हादोरनि मादाव बयनिख्रुइबो गिदिर गोलावसिन रैखाथि बादा (Detention Camp) लुफुंगासिनो दं। जेराव गासै सा 3,000 सर'नार्थि सुबुंफोरा थाहैनो हागोन। मख'जाथावदि 1998 माइथायाव हादोरनि बारग' गाहाइ मन्थ्रि अटल बिहारी बाजपेयीनि बोसोन होनाय बादियै रैखाथि बादाखौ लुफुंनाय जादों।

होदोरनां नोगोरारि फारिलाइखौ दुलाराय हादोरावनो जाबसिन्नाय जागोन होन्ना फोरमाय हरनाय खोथाखौ कंग्रेसनि गागि दैदेनगिरि गगैया एन आर सि नि सायाव जेबो सावराय लायनाय जायाखै। गुबुन फारसेथिं जाय पारलियामेन्टनि जथुम्मायाव न'खर बिफाननि मन्थ्रि अमित चाह बिथाङा हादोरावनो हादोरनां नोगोरारि फारिलाइखौ जाबसिन्नाय जासिगोन। बिसोरो एन आर सि खौ लानानै राज्यो-राजाखौ बेले बेजे खालामदों। बेराफारसे थिं जाय आसामनि गिबि मन्थ्रि (State Chief Minister) सर्बानन्द सन'वाल आरो रांखान्थि बिफाननि मन्थ्रि (Finance Minister ) ड° हिमन्त बिश्व शर्मा मोना दिल्ली सोलो बादियै मानिनानै सोलिनाय थाखाय आसामाव दुंहाव एबा गुलुं गुजुं थासारि सोमजिदों होन्ना अ'जद दैखाङो।

Also Read : मन्थ्रि हिमन्त आ समुज्जल भट्टाचार्यखौ का & एन आर सि सायाव डिबेटाव बाहागो लानो सेलेन्ज होदों

Also Watch: Public meeting on Protection of the indigenous communities held in Tinsukia