Guwahati: हादोरनि खुंथाइ गोहोयाव जिरायनाय भारतीय जनता पार्ति सुंद'यै बि जे पि नि दैदेननाय मिरु सोरखारा हादोरनां नोगोरारि फारिलाइ सुंदयै एन आर सि खौ संसदाव बिलनि गेजेरजों पास खालामनो दलद थिरांथा लानायनि फार्से सिगांलांदों बेयो रोखा। मैयानिफ्राय जागायजेन्नाय आसाम बिधान सभानि गोजां बोथोरनि जथुम्मा सोलिबाय थानाय समाव एन आर सि नि आपडेट खामानिनि बागै फोरमायो राज्योनि रांखान्थियारि बिफाननि मन्थ्रि ड° हिमन्त बिश्व शर्मा बिथाङा।
उनाव खौरांगिरिजों जानाय मुगा मुगि बुब्लियाव मन्थ्रि बिथाङा बुङो दि एन आर सि नि आपडेट खामानि सोलिनायाव गोबां बेले बेजे रां जाख्ल'नायनि जाथाय सोमजिनायखौ एकाउनटेन जेनेरेला उदां खालामनायनि खोथाखौ फोरमायो। बेनि थाखाय कन्ट्रलार आरो अडीटर जेनेरेला थियारि खालामनाय इन्सपेकसन नटआव मख'लांनाय दङ।
खौरांगिरिया एन आर सि नि सोमोन्दै सोंनायनि फिन्नायाव मन्थ्रि हिमन्त बिश्व शर्मा बिथाङा बुङो दि जोबथा हादोरारि नोगोरारि फारिलाइ सुंद'यै एन आर सि फोसाव जानाय खारिथि जौसे जौखोन्दो गोरोन्थि (Faulty) थालांदों होन्ना आसाम एन आर सि नि आगोलनि गाहाइ सामलायगिरिनि बिबानाव थानाय प्रतिक हाजेला बिथांआ गावनो बे फोरमायथिखौ गोबां बेले बेजे एबा गोरोन्थि थालांनायखौ रोखा खालामदों होन्ना अ'जद दैखांङो मन्थ्रि शर्माया। बिथांआ आरोबाव दाजाबदेरनानै बुंथियो दि हादोरनि जौसिन बिजिरसालिनि गोहोमाव प्रतिक हाजेलाया आपडेटजों गुबुन गुबुन सोमोन्दो गोनां खामानिफोरखौ गाहामै गाहाम मावफुंलांदोंमोन।
हादोरसानि रांखान्थियारि मन्थ्रि ड° हिमन्त बिश्व शर्मा बिथाङा बुङो एन आर सि नि हादोरसायारि सामलायगिरि मावख'वाव नायदिंनानै आसाम सि ए जि जों मोनसे साइन खालामनाय जादोंमोन। जेराव मोन 16 सन्देह'गोनां पइन बोखांनो हायो।
बेरा फारसेथिं जाय हादोरसानि गाहाइ बेरेखा राजखान्थि हान्जा भारतीय जातीय कंग्रेस (Indian National Congress) नि एम एल ए मोना सोरखारा एन आर सि खौ फिन गोदानै लाबोनायखौ लानानै मैया बिधान सभानि हाबलांनाय मोखांआव गोख्रों खुद्रिसारनाय दिन्थिफुंङो। गाहायै बिसोरनि दाबिआ जादों गोदानै लाबोनो सिगांलांनाय एन आर सि खौ हेंथा खालामनाय।
बेरेखा राजखान्थि दोलोनि एम एल ए मोना अ'जद दैखांना बुंथियो दि माखासे सुबुंनि गांनाय उखैनायखौ सुफुंनो थाखायसो सोरखारा एन आर सि नागिरदों। मेइनस्ट्रिम थाखोनि असमिया माहारिया जोबथा एन आर सि खौ नुनानै गोजोन्नाय फोरमायाखै। कंग्रेस आरो ए आइ उ डि एफ नि एम एल ए मोना ल' बे एन आर सि खौ बेरेखा खालामदों।
मख'जाथावदि आसामनि दोलो आफाद जेरै दुलाराय आसाम फरायसा आफाद (All Assam Students Union) मोना जोबथा हादोरारि नोगोरारि फारिलाइ खौ फिन गाहामै गाहाम नायबिजिरनो थाखाय जौसिन बिजिरसालियाव आर'ज गाबहरदों।
