गरेस्वरः बाक्सा जिल्लानि गरेस्वर हालामनि तामुलपुर चिभिल साब दिभिजोन सिंआव थायनाय जेराव मैदेरजों गाग्लोबजानाय जायाग आरो भारत भुटान सिमनाफोराव, बाक्सा जिल्लानि अरन बिफाना सुबुंफोरनि गेजेराव एन.जि.अ (NGO Aaranayak) खौ लोगोसे लाफानानै सांग्रांथि फोरसावनायनि हाबाफारिय खुंफुंजादों जायनि थाखाय अरनानि जिबफोरखौ मोजांयै सामलायनो हानाय बादि। फारसेथिं सुबुं माहारि आरो जिब जुनारनि गेजेराव गोरोबज्लायना थानायजों लोगोसे मोनसे समायना आबहावाखौ सोरजिनानै थानो हानाय बादि।
रबिबार खालाराव गाहायै बे सांग्रांथि फोरसावनाय सावरायज्लायना हाबाफारिया बाक्सा जिल्लानि अरन बिफान, गरेस्वारनि इक क्लाब ससाइटि बानजायनायाव उपरखुथि गोजौ फरायसालिआव मानसिनि सायाव मैदेरनि गाग्लोबनाय आरो बेफोर जेंना होबथा राहानि सायाव सावरायनो लोगो लाज्लायो।
हाबाफारिआ उपरखुथि गोजौ फरायसालिनि गाहाय फोरोंगिरि टेख बाहादुर चेत्रि जों दैदेनाजायो। बरायनाय आरो सिनायथि होनाय खामानिखौ बाक्सा जिल्लानि दि.एफ.अ ( DFO) भाबेस दास बिथांआ लायो। बिथांआ हाबाफारिनि गुबै जाहोनखौ फोरमायो दि जायनि थाखाय बे सांग्रांथि फोरासावनाय सावरायमेलनि गाहाय थांखिबादियै सुबुंफोरनो अरनारि जिब जुनारफोखौ रैखा एबा जोथोन लानायनि सायाव सोलोंथाय होनो आरो ओनसोलाव मैदेर मानसिनि गेजेराव जेंना सोमजिनायफोरखौ खमायनायखौ लानानै बे हाबाफारिखौ लानाय जादों होनना फोरमायो।
बाक्सा जिल्लानि जिल्ला बेंगिरि भास्कर पेगु बिथांआबो बे हाबाफारिआव बाहागो लानो मोनना बेखौनो फोरमायदों सुबुं अनजिमाया बांगासिनो दं आरो मानसि मैदेरनि गेजेराव थाथिफोरा गिलु बालु सोमजिनाय नुनो मोन्दों। मैदेरनि थाखाय जानाय आदार, दै थानाय जायगाफोर मोजांयै होनो हायोब्ला एबा जुगायना होनो हायोब्ला जेरै बादि गुबुन सेरजों थानाय जायगाफोराव थाइलित बिफां, औवाफोर गायना दोनब्ला थारैनो मैदेरनिफ्राय रैखाखौ मोननो हागोन होनना फोरमायो।
" बेयो मोनसे गोनां हाबाफारि जायनि गेजेरजों लोगो लाज्लायनानै जिउ राहानि थाखाय खौसे होज्लायनाय मैखोम खामानि बादि। सुबुं बिजों आरो सिमना ओनसोलनि जायगायारि सुबुंनि गेजेराव मोन्थिज्लाय होज्लायनायनि थाखाय। जो गोथौयै फोथायदों बे मावबिथांखिआ थारैनो मोजां लुबैनायखौ जाफुंहोगोन" होनना बिथांआ फोरमायो। बेजों लोगोसे बिथांआ समायना बगा माति लावखार ओंखाम जानाय जायगाखौबो मोनसे जायगा हान्थि बादियै खालामनायजों लोगोसे प्लासटिक बाहायनायनिफ्राय अदेबानि लेथ्रा खालामानायनिफ्रा रैखा खालामना लाखिनांगौनिबो सांग्राथि बिबुंथि होयो।
एन.जि.अ (NGO) आरानायख नि गाहाय मावगिरि आभिजित बारुवा बिथांआबो मैदेर आरो मानसिजों जानाय जेंनानि सायाव सोनारनानै माखासे गोनां गोनां बाथ्राफोरखौ बिबुंथि लाखियो।
टामुलपुर चिभिल साब दिभिजोन एस.दि.अ (SDO) सुजित बाग्लारि बिथांआबो हाबाफारिआव बाहागो लानो मोनना बेखौनो बिबुंथि लाखियो दि भारत भुतान सिमनायाव गोबां समनिफ्रायनो मैदैर आरो मानसिनि गेजेराव दिन दिनै जेंना सोमजिबाय थानायखौ जों माब्लाबो बावनो हानाय नंआ जायनि थाखाय मैदेराफोरा अरन जायगाफोरा लांदां जानायनि जाहोनाव, मैदेर थानो जायगा आंखालनि जाहोन आरो फारसेथिं लामाफोर गैयैनि थाखाय बेफोर जादों। गुबुन मोनसे गोनां साननो गोनां बाथ्राया जाबाय अरनबारि जोबस्रानायलांनायनि जाहोनाव बिसोरनि थाग्रा खुलिफोरा गोमालांदों" होनना बिथांआ फोरमायो।
