Kokrajhar : आफां आसामनि गंसे गोजौ सोलोंथाइनि फसंथान बर'लेण्ड मुलुग सोलोंसालि गोबां बोसोरनिफ्राय दाबि खालामफैनाय जेंनाया जाफुंसार जाबाय। मख'जाथावदि बर'लेण्ड हायुंआरि गौथुम नि गाहाइ सदर थावनि कक्राझार बिखायाव जारिमिनारि बर' गोरोबथा नाजावनानै 2009 मायथायाव गायसन जानाय बर'लेण्ड मुलुग सोलोंसालि इउ जि सि 12 बि मानदान्दा मोनहैनो हाबाय। प्रफेसार पि पि आयानिनि मासि सामलायनाय जथुमनाय आफादा मुलुग सोलोंसालि अनसुंथाइ आयोग (University Grant Commission) नि साब्रै सोद्रोमा गोनां जर'खा आफादनि थान्दै हान्जाया बर'लेण्ड मुलुग सोलोंसालि नायगिदिंनायनि उनाव सुक्रबार खालि सोलोंसालि अनसुंथाइ आयोगा हादोरनि राजथावनि गोदान दिल्लीआव जथुमनाय मिथिंआव 12 बि नि मानदान्दा आवथेनो हानायाव आफां आसामजों लोगोसे बै गोजौ सोलोंथाइ लांगोनायाव गोजोन्नाय लाबोदों।
मख'जाथावदि सोलोंसालि अनसुंथाइ आयोग 12 बि मानथाखोआव सोदेरफालासे बै सोलोंथाइ फसंथान सामलायनायाव गोबां जेंना जेंगोनाजों मुगा मुगि जानांदोंमोन आरो बै मानदान्दा मोनालासे गोलाव 9 बोसोर सम जोबोद गोब्राब थासारिजों जुजिनो गोनां जादोंमोन। बर'लेण्ड हायुंआरि गौथुम नि गाहाइ मावफुं सोद्रोमा हाग्रामा महिलारि आरो लेङाइ गाहाइ मावफुं सोद्रोमा खाम्फा बरगयारि सानैया हादोरसा सोरखार आरो मुलुग सोलोंसालि अनसुंथाइ आयोग (University Grant Commission) बिबाननारि थान्दै हान्जा जों जानाय सावराय जथुम्मायाव गोबां खेब बे आयदानि सायाव गुवारै सावरायदोंमोन आरो 12 मानदान्दा मोननांगौ नि थाखाय बि टि सि खुंथाइ निफ्रायबो लाइजाम गथायदोंमोन।
बे गोलाव दिननिफ्राइनो मिजिंबाय थानाय जेंनाया सुफुंसार जानायाव बर' कसारी गावखुंथाइ गौथुमनि दैदेनगिरि मोना आरो बर' थुनलाइ आफाद सुंद'यै बि एस एस नि दैदेनगिरिमोना दुंब्रुदजों गोजोन्नाय आरो साबायखर बावजेनदों।बर' थुनलाइ आफादनि आफादगिरि तरेन बर' आरो गाहाइ नेहाथारि प्रसान्ट बर' बिथांमोना मुलुग सोलोंसालि अनसुंथाइ आयोग (University Grant Commission) नि जोहै 12 बि मानदान्दा मोनहैनाया थारैनो बरायथाव आरो गोजोनथाव खौरां। बि टि सि साथामजों लोगोसे आफां आसामनि गोजौ सोलोंथाइ फसंथाना उन गोग्लैसोनाय जायगाफोराव गियाननि सोरां सारफैगोन होन्ना बुंथियो।
बेराफारसे थिं जाय खौसेथि बर' सुबुं गौथुम सुंद'यै UBPO आफादाबो गोजोन्नाय फोरमायदों। गोलाव बोसोरनिफ्राय भुगिनानै थानांनाय 12 बि मानदान्दा नि गनायथि होनायाव बरायदों। बेनि जोहै फैगो समाव गोजौ सोलोंथाइ फसंथाना जौगाखांनाय नि गौजौ जांख्लायाव गायसंनो हागोन। बर'लेण्ड। मुलुग सोलोंसालिनि सिङाव थानाय फरायसालिमाफोरखौ दबथायनायाव जाफुंसार जागोन।
बर'लेण्ड मुलुग सोलोंसालिया 12 बि स्टेटास मोननायाव बिहोमा होलांनाय मुलुग सोलोंसालि अनसुंथाइ आयोग नि सोद्रोमा ड° किरन हाजरिका, बर'लेण्ड मुलुग सोलोंसालिनि फालांगि बिफाननि बिबुंगोरा गाहाइ राजेश बर्मन, बर'लेण्ड मुलुग सोलोंसालिनि मावफारिया गौथुम, फरायसा आफाद, बर'लेण्ड मुलुग सोलोंसालिया इउ जि सि नि फ्राय 12 बि मानदान्दा मोननायाव फैबाय थानाय समफोराव जौगानायनि जांख्लायाव आगान दावखोलांनो हागोन आरो सिमांआ मोगथाङाव जाफुंसार जाबाय होन्ना बुंथियो।
