कक्रझारः बर' थुनलाइ आफादजों लोगोसे गुबुन गुबुन दोलो आफादफोरा लोगो नांनै बानजायनायाव मंगलबार खालाराव बि.ति.चि.(BTC) नि गाहाय बिथांखौ बर बिजों नि फारसे अननाय गैयै नि थाखाय सोंखारिदों आरो नबेम्बर 16 बर बिजों सानि उनाव जुदि महिलारि बिथांआ आसाम सोरखारनिसिम थाखो जिसे आरो जिनै आव बर बिजोंनि सोमोन्दै खोथा दैखांनायखौ फेलें खालामोब्ला एबा सामोल खालामोब्ला लाजिनानांगौनि अनगा जेबो गैया होनना बुदों।
बर' थुनलाइ आफादनि आफादगिरि तरेन बर' आरो गाहाय नेहाथारि प्रसान्त कुमार बसुमतारि बिथांमोननि फोरमायथिनाय बादिब्ला बर' बिजोंआ मोनसे आंगो बिजों महरै 1963 माइथायाव गिबियै गुदि फरायसालिआव हादोरसायाव थिसनजादोंमोन, जाय बर' बिजोंजों गोजौ फरायसालि आरो गेजेरारि गोजौ फरायसालिफोराव दा सोलोंथाय होगासिनो दं, गावहाति मुलुगसोलोंसालि, डिब्रुगर मुलुगसोलोंसालि , चिलचर मुलुगसोलोंसालि, कतन मुलुगसोलोंसालि, आरो बडलेन्ड मुलुगसोलोंसालिफोराव बर बिजोंनि आयदा गोदान भारतारि राव (MIL) महरै थिसनजाबाय। बिसोर बुंबावोदि आसाम सोरखारनि सोलोंथाय बिफाननि सोलोंथाय सामलायगिरया (Director) आ बि.टि.सि नि सोलोंथाय सामलायगिरि (Director) नो एप्रिल दानाव हादोरसायाव जेसेबां बर' बिजोंनि फरायसालि आरो गेजेरारि गोजौ फरायसालि दं बेफोरनि खारिथिफोरखौ बुथुमनानै दैथायहरनो बिथोन होदोंमों, जायनि थाखाय फैगोन सोलोंथाय बोसोरफोराव बर' बिजोंजों थाखो जिनैसिम सोलोंथायखौ होनो हानाय बादि। नाथाय बि.टि.सि (BTC) खुंथाया खारिथिखौ बुथुमना हरनायाखौ फेलें खालामदों, बबेखानि महिलारिआ बर' फरायसाफोरनो इंराजि बिजोंखौसो नागिरो।
महिलारि नि मुगैथाव आखु आरो माखासे बि.पि.एफ. दैदेनगिरिफोरा बर फरायसाफोरनि थाखाय बर बिजोंनि सोलाय थाखो डाइननि उनाव इंराजि बिजों होनायनि खोथाखौ लानानै गोख्रों सोंखारिदों, महिलारिनि सान मावथांखिखौ बर' हान्जाजाया गनायनानै लानो हानाय नङा होनना बर' थुनलाय आफादनि दैदेनगिरिआ फोरमायो। बेखौबो बुंबावोदि बर' बिजोंआ नैथि देरसिन रायजानाय हारिआरि राव आरो 2003 माइथायाव भारतनि संबिजिताव 8 चिदुल्दआव थिसनजाबाय आरो बेयावहाय माब्लाबाबो बर' बिजोंआ थैलांथों बेखौ रावबो हास्थाया होनना फोरमादों।
बर' थुनलाय आफादनि दैदेनगिरिया बर' थुनलाय आफाद आरो बि.टि.सि (BTC) हान्जा मावथिफोरनि गेजेराव आसाम हादोरसायाव गुदि फरायसालिनिफ्राय लानानै जिनै थाखोसिमहालागै बर' बिजोंनि बेसेबां फरायसालिफोर दं बेफोरनि खारिथि बुथुमनायखौ लानानै मोनसे जुनिया लोगो लाज्लाय सावरानाय हाबा फारि लादोंमोनब्लाबो नाथाय महिलारि आरो माखासे बि.पि.एफ (BPF) हान्जानि देदेनगिरिफोरा बेनि सायाव जेबो मावफुंआसै होनना बुंदों।
बेजोंनो लोगोसे दुलाराय बर' फरायसा आफादनि गाहाय नेहाथारि लरेन्स इस्लारि बिथांआबो जायखि जाया बि.टि.सि (BTC) आ बर' बिजोंखौ बोखारनो थांनाय माव बिथांखिआव फरायसा आफादा बेखौ माब्ला बाबो गनायना लानो हाया होनना बुङो। बिथाङा बुंबावो बेयावहाय चिभिल सार्भिस (Civil Service) आनजादनि थाखाय इंराजि बिजोंआ साबगौ, बर' बिजोंआबो गोजौ थाखोआव सहैयोब्ला थारैनो सोनाब बंगफोरनि बादि।
बर' आइजो लिरगिरि गौथुमनि आफादगिरि आरो नेहाथारि, उत्तारा बसुमतारि आरो नेहाथारि धिरजु ज्यति बासुमतारि बिथांमोनाबो बिटिसिआ बर' बिजों बोखारनो थांनयखौ गनायनो हाया होनना फोरमायदों आरो जायफोर दैदेनगिरिफोरा बर' बिजोंखौ जौगाहोनाय खामानिफोराव जेबो मदद होआखै बिसोरनि हेंथायै सोंखारिदों। महिलारिनि माव बिथांखिखौ मावफुंनायाव जों राजि गैया आरो गनायना लानो हाया जाय बर बिजों जौगानायखौ बोख्लायनाय लामाथिं लांनाय मावबिथांखि होनना फोरमायो।
