Guwahati : आसाम प्रदेश कंग्रेस कमिटि सुंद'यै ए पि सि सि गागि दैदेनगिरिनि गेजेराव सोलिबाय थानाय गुलुं गुजुं थासारि जोबथारनानै थाङाखै। बे राजखान्थियारि थासारिया सान बारलांनायाव गाज्रि गाज्रिसिन जाबोनो हमदों। दोलोनि सासे दैदेनगिरिया गुबुन सासे दैदेनगिरिखौ दोलोनि लोरबां राजखान्थियारि थामोन्था आरो गुबुन बिथिंनि सायाव गोख्रोंङै गोखा गोखा रावजों सोंखारिनाय नुनो मोननाय जादों। गाहायै आसामनि गाहाइ बेरेखा राजखान्थि दोलो कंग्रेस दोलोनि थिरांथा लानायखौ गोख्रों सोंखारिनाय सोलिबाय थादों। कंग्रेस ललिजलेसार पार्टि सुंदयै (Congress Legislature Party) नि दैदेनगिरि देबब्रत सइकीया बिथाङा दोलोनि सिङाव मोनबो आइन आब्रुथि सामलायजाया जासे सोलिबाय गुदुं गुसुं थासारि नोजोर लाखिनानै मिरु समिटिनि खाथियाव नुजाथिनायनि खोथा। बे थांखियै कंग्रेस ललिजलेसार पार्टि सुंदयै (Congress Legislature Party) नि दैदेनगिरि देबब्रत सइकीया बिथाङा बुङो दि दोलोनि सा जिनै एम एल ए (Legislator) मोना आंनि हेंथायै लाबोनाय गोख्रों अ'जदनि सायाव हाइ कामान्ड अदेबानि दुलाराय भारत कंग्रेस कमिटि (All India Congress Committee) नि मिथिहरबावगोन।
आसाम प्रदेश कंग्रेस कमिटि (Assam Pradesh Congress Committee) निफ्राय मोननाय मोनसे फोथायथाव खौरांनि बादिब्ला आसाम बिधान सभानि सावराय जथुमाव गावनि बिबुंथि एबा गोरा थिरांथा लानायाव फेलें जादों। हादोरसानि गाहाइ बेरेखा राजखान्थि हान्जा महरै आसाम कंग्रेसनि सा 12 एम एल ए मोना सिबसागर जिलानि नाजिरा बिधान सभा बियाबनि एम एल ए देबब्रत सइकीया बिथांखौ कंग्रेस ललिजलेसार पार्टि सुंदयै (Congress Legislature Party) नि दैदेनगिरि मासिनिफ्राय बोख्लायनायनि थाखाय दासिमाव बै एम एल ए मोना मिरु कंग्रेस कमिटिसिम लाइजाम (Letter) दैथायहरदों।
बेजों लोगोसे गुबुन मोनसे सुलुंनिफ्राय मोनथिनो मोननाय खौरांनि बादिब्ला सि एल पि दैदेनगिरिया लोरबां थिरांथा लानायनि अ'जद दैखांनानै माखासे गोजोन गैयि कंग्रेसनि एम एल ए थान्दै हान्जा (Congress MLA Delegation) या हादोरनि राजथावनि गोदान दिल्लीआव सोहैदों, नाथाय बिसोरो मिरु दैदेनगिरि (High Command) निफ्राय आयदाखौ दैखांनो गनायथि (Appointment) मोनाखै होन्ना मोन्थिनो मोननाय जादों।
लोगोसे एम एल ए मोना आसाम कंग्रेसनि बिबानाव थानाय दैदेनगिरि (Observer) आरो दुलाराय भारत कंग्रेस दोलो (AICC) नि गाहाइ नेहाथारि (General Secretary) हरीश रावान बिथांनि गेजेरजों मिरु आफादसिम गोजोन गैयि एबा दैदेनगिरि बोख्लायनायनि अ'जद दैखांनाय लाइजाम गथायदों। कंग्रेस ललिजलेसार पार्टि
(CLP) नि दैदेनगिरि देबब्रत सइकीया बिथांआ बिधान सभानि गेजेराव जेंना जेंगोनाखौ गोख्रों राव एबा थिरांथा लानायाव फेलें जानाय आरो बिथांआ आसाम बिधान सभानि जथुम्मा सोलिबाय थानाय समाव बिनि लोगो एम एल ए मोनखौ गोबां बिफाननि गोब्राब खामानि रान्ना गालांङो होन्ना बुंथिदों। सा जिनै एम एल ए मोना बिथां सइकीयानि हेंथायै मिरु कंग्रेस कमिटिखौ 12 रिंगायाव अ'जद लाइ हरगोन होन्ना खौरां बिजोंजों फोरमाय जादों।
