GUWAHATI: हादोरसायाव सोलिफु दाननि गेजेराव बिसायख'थिनि बार नांदों। गाहायै राज्योनि गंब्रै बिधान सभा बियाबाव खुंथाइ गोहोआव थानाय राजखान्थि दोलो भारतीय जनता पार्ति जों लोगोसे गाहाइ बेरेखा राजखान्थि गोहो कंग्रेस आरो ए आइ उ डि एफ नि दैदेनगिरि मावथि मददगिरिनि गोसोयाव बिसायख'थिनि बार नांनायखौ नुनो मोननाय जादों। देग्लाय गंब्रै बिधान सभा बियाबाव गासै सा 6,78,898 भ'ट होगिरि राज्यो-राजाया गावनि राजखान्थियारि मोनथाइखौ रोखा खालामगोन। बे गंब्रै बिधान सभा बियाबाव सा 20 बिजाथिफोरा बिसायख'थियाव गसंथेदों। बे बाइ इलेक्सना फैगो 21 अक्ट'बराव खुंफुं जागोन आरो 24 अक्ट'बराव बिसायख'थि दावहानि फिथायखौ फोसावगोन होनना खौरां बिजोंनि गेजेरजों फोरमाय जादों।
मख'जाथावदि गंब्रै बिधान सभा बियाब (Legislative Assembly Constituency) निफ्राय गसंथेदों बिसोरो फारियै बरपेटा जिल्लानि जनिया बियाबनि थाखाय सा गु बिजाथि, सुनितपुरनि राङापारा बियाबनि थाखाय सा बा, सा ब्रै बिजाथिया करिमगन्जनि राताबारिनिफ्राय आरो सनारि बियाबनि फ्राय सानै बिजाथिया गाखोदों।
रायखांनो गोनां दि बे गंब्रै बिधान सभा बियाब नि थाखाय गासै गं 830 भ'ट सौग्रा मिरु (Polling Station Centre) गायसननाय जागोन। बरपेटा जिल्लानि जनिया बियाबनि थाखाय गासै गं 229 भ'ट सौग्रा मिरु (Polling Station Centre) ,सराइदेउ जिलानि सनारि आरो करिमगन्ज जिलानि राताबारि ( SC) नि थाखाय 202 यै आरो सुनितपुर जिलानि राङापारा बिधान सभा बियाब (Legislative Assembly Constituency) नि थाखाय गं 197 भ'ट सौग्रा मिरु (Polling Station Centre) गायसंनाय जागोन। गुबुन फारसेथिं गुबुन गुबुन राजखान्थियारि बिजिरगिरिफोरनि बादिब्ला खुंफुं जानो गोनां गंब्रै बिधान सभा बियाबाव थोंजोङै राजखान्थियारि बादायलायनायजों मुगा मुगि जुजिगोन। मैखोम माइन'रिटि सुबुं अन्जिमा थानाय बरपेटा जिल्लानि जनिया बियाबाव थोंजोङैनो राज्यो गाहाइ बेरेखा राजखान्थियारि दोलो कंग्रेस आरो ए आइ उ डि एफ नि गेजेरावनो जुजिगोन होनना सम्भावना दं होनना मिजिंथिनाय जादों। आरो गुबुन गंथाम बिधान सभा बियाब फारियै राताबारि, सनारि आरो राङापारायाव थोंजोङैनो भारतीय जनता पार्ति आरो कंग्रेस नि गेजेरावनो गुबै राजखान्थियारि दावहाया नांलायगोन होन्ना खौरां बिजोंजों लोगोसे सरासनस्रा राज्यो-राजानि गेजेराव सावरायज्लाय जादों।
मोनसे मोनथिनो हानाय फोथायथाव सुलुंनि बादिब्ला राज्योनि गिबि मन्थ्रि सर्बानन्द सन'वाल बिथांआ फैगो गावनि दोलोआ सायख'नाय बिजाथिनि मददाव फोसावदिंनाय हाबाफारिखौ जागाय जेनसिगोन। बिसायख'थियाव फोसावदिंनायनि फारिलाया फारियै करिमगन्जनि राताबारिनि थाखाय 14 अक्ट'बर, 15 अक्ट'बराव बरपेटा नि जनिया, सुनितपुरनि राङापारा नि थाखाय 17 अक्ट'बर आरो 18 अक्ट'बराव सराइदेउ नि सनारि बिधान सभा बियाब नि फोसावदिं नि सान थि खालामदों। आसाम प्रदेश भारतीय जनता पार्ति सुंद'यै बि जे पि नि सायखनाय बिजाथिखौ सोरखारनि लोगो राजखान्थि गोहो असम गण परिषद आरो बर'लेण्ड पिपल्स फ्रन्टनि दैदेनगिरि मददगिरिफोराबो मदद खालामगोन होनना बुंथिदों।
मख'जाथावदि दानि साब्रै एम एल ए (Sitting Four MLAs) मोना गावनि बिबानसम जोबस्लाबैयावनो देग्लाय नि एप्रिलाव खुंफुं जालांनाय ल'क सभा बिसायख'थियाव देरहानानै सांसद महरै सायख' जादोंमोन। उनाव बै गंब्रै मासिया उदां (Vacant) जाना दंमोन। सांसद महरै संसदनि दरबाराव आगान सुरलांनाय साब्रै सुबुं थान्दै मोना फारियै सनारीनि बि जे पि नि एम एल ए तपन कुमार गगैया जरहाट ल'क सभा बियाबनिफ्राय, जेराव राङापारनि एम एल ए पल्लब लचन दास तेजपुरनिफ्राय, राटाबारि बियाबनि एम एल ए कृपानाथ माल्लाया करिमगन्ज बियाब निफ्राय, जनिया बियाबनि कंग्रेस एम एल ए आब्दुल खालेका बरपेटा ल'क सभा बियाबनिफ्राय सायख' जादोंमोन।
