Guwahati : हादोरनि सा-सानजा दोलो आफादनि जांख्रिखांनायखौ नेवसिनानै दिनै नोगोरारि सोदांनाय बिल गोलाव 12 धन्टा संसदाव दान्थे बिदान्थेनि गेजेरजों मोन 311 भट मोन्नायाव पास जाबाय केब। नाथाय बेनि बेरेखायै मोन 80 ल' भट मोनबाय। मख'जाथावदि दिनै अदेबानि मंग'लबार खालि राज्य सभायाव केबखौ लाबोनाय जागोन। बेबहायबो पास जायोब्ला मिरु केबिनेटा नोगोरारि सोदांनाय बिल जोबथा लामायाव रोखा खालामगोन।
मख'जाथावदि सोंथिनि फिननायाव न'खर बिफाननि मन्थ्रि अमित चाह बिथाङा बुङो दि रहींगियाफोरखौ भारतारि नोगोरारिनि मानदान्दा गनायथि होनाय जाया। जायफोरा नसुङारि हादोर बांलादेश आरो म्यानमारनिफ्राय फैनाय आयेन बेरेखा हाबसनफैग्रा। लोगोसे दाजाबदेरनानै बुंबावो दि दफा नं 371 खौ जेबो खालामनाय जाया। आगोलनि बादि सुबिदा एबा मोनथाय मोनबाय थागोन। बेनि थाखाय सा-सानजा हादोरसानि सिङाव थानाय राज्यो-राजाया गिखांनो नाङा। सा-सानजा हालामनि राज्यो-राजानि राव हारिमु दोहोरोम समाजखान्थिनि रैखाथि (Security) आरो थामोन्था (Existence) बासायनायाव जोंनि सोरखारनि मावनां बिबान होन्ना मन्थ्रि बिथाङा फोरमायो।
नोगोरारि सोदांनाय बिल (Citizenship Amendment Bill) 2019 आ बांलादेश, आफगानिस्तान आरो पाकिस्तानाव दोहोरोमनि बेलायाव हालाय हाफाय थासारिजों भुगिनांनाय आरो खारखोमालांनाय दुखुथिया हिन्दु, सिख, खृष्टान,पार्सिस आरो जैन सुबुं माहारिखौ रैखाथिजों भारतारि नोगोरारिनि मानदान्दा गनायथि होगोन। जाय जाथायखौ हादोरनि बेरेखा राजखान्थि हान्जायाव जिरायनाय भारतीय जातीय कंग्रेस दोलोजों लोगोसे गुबुन गुबुन हान्जाया अ'जद दैखांनायखौ फिन्नाय होनानै बुङो दि गासैखौबो मोन्थाय गथायनाय जागोन। रावनिबो मोनथायाव खहा खालामनो हाया होन्ना रोखा दं।
लोगोसे न'खर बिफाननि मन्थ्रि (Union Home Minister) अमित चाह बिथाङा गाबख्रावना बुङो दि बे बिल थारैनो मुस्लिम बेरेखा नङा, जुदि सोरबा मुस्लिम नोगोरारिया भारतारि नोगोरारिनि मानदान्दा गनायथि मोनथाय आजावनो राजि जायो , अब्ला बिखौ आयेन बादियै बै मानदान्दा होनाय जागोन।
रायखांनो गोनां दि नोगोरारि सोदांनाय बिलनि बादिब्ला 2014 माइथायनि 31 जुलाइ नि काट अफ यार आव मख'नाय बादि आयेन बेरेखायै हाबसनफैग्रा गुबुनारिया भारत हादोराव हाबसनफैदों, बिसोरखौ सोरखारा
थानायनि मोनथाय गथायगोन। लोगोसे सोरनिबा डकुमेन्ट इनकमफ्लिट एबा ट्रेभेल डकुमेन्ट सम फोजोबोब्लाबो भारतारि नोगोरारिनि मानदान्दा गनायथि होनाय जागोन।
बेरा फारसेथिं जाय सा-सानजानि माखासे राज्योआव इन्नार लाइन पार्मिट थानाय जायगायाव आरो गावखुंथाइ हालामाव बे बिलनि मोनबो दानखथाइ गोहोम गोगलैनाय नङा। बे बिलखौ लानानै सा-सानजा हादोरसानि बेरेखा दोलोनि राजखान्थि दैदेनगिरि मोना बेरेखा खालामदों, मैया आसामनि सानै कंग्रेस दोलोनि सांसद गौरब गगै आरो नगाव ल'क सभा बियाबनि एम पि प्रद्युद बरदलै बिथां मोना गोख्रों बेरेखा खालामो। राव, हारिमु दोहोरोम फोजोबस्रांनो हानाय थिरांथाखौ मानिनानै लानो हाया होन्ना हुमखि होयो।
बेराफारसे थिं जाय सा-सानजा फरायसा आफाद नि बान्जायनायाव दुलाराय सा-सानजा 48 धन्टा बन्द' फोसावनायाव राव दोहोरोम सायख'वालासे गासैबो थाखोनि राज्यो-राजाया राजा लामायाव ओंखारफैदों। न' केब, बि जे पि सोरखार ग' बेक, केब मानिनानै लानो हाया बायदि बायदि स्ल'गानजों खुद्रिसारनानै गाबख्राव गाबख्रावना हुंकार होयो। हादोरसानि दाब दाब जायगायाव नोगोरारि सोदांनाय बिल (CAB) खौ पास जानायनि हेंथायै अर जोंब्लावदों, बायदि बायदि दोलो आफादनि बान्जायनायाव जायगायारि राज्यो-राजाजों साफ्रोमबो नोगोरारिया टायार सावनानै सोरखार बेरेखा स्ल'गानजों अख्रांखौ गोमखांहोदों। जेरावथिंबो माथो नोगोरारि सोदांनाय बिलखौ बोखारनायनि स्ल'गान।
