Guwahati : हादोरसानि सोरबिथिं नोगोरारि सोदांनाय आइननि हेंथायै गोख्रोंनिफ्राय गोख्रोंसिन बेरेखा हाबाफारिया नागारगैयि जासे सोलिगासिनो दं। मैया अदेबानि बृहस्पतिबार खालि दुलाराय आसाम फोरोंगिरि गौथुमनि हांख्रायहरनायाव राज्योनि दाब दाब जायगानि महकुमा, खोन्दो बायदि बायदियाव नोगोरारि सोदांनाय आइननि हेंथायै खुद्रिसारनाय हाबाफारि दिन्थिफुंनाय बादि गुवाहाटी नोगोरमानि सिङाव थानाय गुबुन गुबुन मावख' लांगोनायाव बोखारनायनि बेरेखायै का बेरेखा गारांजों अख्रांखौ गोमखांहोयो। जेराव बै बेरेखा हाबाफारियाव 500 निबो बारा गुदि फरायसालिनि फोरोंगिरि समाजा बाहागो लानानै उनाव हादोरनि गाहाइ मन्थ्रि नरेन्द्र मडि निसिम गांसे लाइजाम गथायनाय जायो।
थिग बिदिनो गुवाहाटी महकुमा गुदि फोरोंगिरि गौथुम (Guwahati Subdivision Primary Teacher Association) नि हांख्रायहरनायाव चान्दमारियाव थानाय शिक्षक भबन मावख' लांगोनायाव नोगोरारि सोदांनाय आइनखौ बेरेखा खालामनानै सोमावसारनाय हाबाफारि दिन्थिफुङो।
बै बेरेखा हाबाफारियाव बाहागो लानाय गुवाहाटी महकुमा गुदि फोरोंगिरि गौथुम (Guwahati Subdivision Primary Teacher Association) नि गाहाइ नेहाथारि (General Secretary ) रातुल चन्द्र गश्वामि बिथाङा गावनि बेखेवजेन्नाय बिबुंथियाव फोरमायो दि आसामनि गुदि फोरोंगिरि गौथुमा नोगोरारि सोदांनाय आइनखौ बेरेखा खालामनानै गथायनाय लाइजामखौ मान दिन्थिनानै हादोरनि गाहाइ मन्थ्रि नरेन्द्र मडि दैदेननाय सोरखारा आजावनानै लानो नांगौ। बेवहाय आसामनि गिबि मन्थ्रि सर्बानन्द सन'वाल दैदेननाय हादोरसा सोरखारनि मोनबो नंखाय खोथाजों सरासनस्रा राज्यो-राजाखौ फोलानायनि गोनांथि गैया। गोबां लाइमोन सुबुंनि अबथिरायै जिउ गोमालांनायनि फिथाय महरै मोन्नाय जारिमिनारि आसाम गोरोबथाखौ फोजोबस्रांनानै नोगोरारि सोदांनाय आइनखौ मानिनानै लाग्रोनो हानाय नङा।
उनाव फोरोंगिरि गौथुमनि सोद्रोमाफोरा थांनाय सप्ताहयाव हादोरसानाङै नोगोरारि सोदांनाय आइनखौ लानानै सोमजिनाय गुलुं गुजुं थासारिनि आन्दोआव रैखाथि गोहोनि गुलियाव गावजानानै अबथिरा मुंख्लं जालांनाय सुबुंफोरखौ गोथौ दुखु फोरमायनायजों बिसोरनि आगोमा जिउआव गोजोन फैथों मिजिंथिनानै मान बावहरनाय जायो।
Also Watch: AASU Rally Against CAA 2019 in Kokrajhar