Guwahati : नोगोरारि सोदांफिन्नाय आइनखौ हेंथा होनायनि असिला लानानै माखासे दुथां आखल आखुनि सुबुंआ गोजोन सोमावसारनायखौ दुंहाव एबा गुलुं गुजुं थासारिनि महर होनाय दायनिगिरिनि हेंथायै हादोरसा सोरखारा गासैबो रोखोमनि आयेनारि लामाजों आवगायदों। आसामाव गुबुंले राजखान्थिनि बारहावा गेलेनायाव माखासे सुबुंआ नांथाबदों होन्ना गोख्रों अ'जद दैखांदों आसामनि देहा सावस्रि बिफाननि मन्थ्रि (State Health & Family Welfare Minister ) ड° हिमन्त बिश्व शर्माया।
मख'जाथावदि दिसपुरनि जनता भबनाव खुंफुंनाय मोनसे खौरां मेलनि गेजेरजों समबार खालि मन्थ्रि बिथाङा बुङो दि का नि मुङै अहिंसा जाथायखौ गोसारहोनो थाखाय ससियेल मिडिया फेसबुकखौ दैथायहरग्रा बिजों महरै बाहायदोंमोन। मख'जाथावदि थांनाय 9 डिसेम्बरनिफ्राय ससियेल मिडियानि सायाव गोथौयै नोजोर लाखिनाय जादों। बै समखिनियाव मोन 206 पष्ट सोरांआव फैदों, जाय अहिंसा जाथाय, सोरखार बेरेखा खामानियाव नांथाबनो गोसो दुंहोनाय,समाज बेरेखा खामानियाव लोब्बा थानो थुलुंगाखांहोनाय बादि। माखासे नंखाय बाखाय खौरां फोसावनायनि हेंथायै आयेनारि राहा लानाय जादों। अहिंसा जाथायनि बेलायाव मोन 28 गसर थिसन्नानै सा 10 सुबुंखौ ग्रेप्तार खालामनाय जादोंमोन। बेनि गेजेराव सा 5 खौ जामिनाव उदां खालामनाय जादों आरो सा 5 नि हेंथायै आयेनारि लामाजों सोंलायनाया सोलिगासिनो दं
आसामाव नोगोरारि सोदांनाय आइनखौ लानानै बेरेखा खालामनायनि असिलानि सोलो लानानै दुंहाव थासारि सोमजिहोनायनि आन्दोआव आसाम आरो सा-सानजा हादोरसानि बायजोनि गुबुन गुबुन जायगानिफ्राय फोसावनाय मोन 25 पष्ट सायख'नाय जादों। बेनि अनगायैबो सोरखारि दोहोन सम्फथिफोराव बायग्लिनाय आरो गाज्रि खामानियाव थुलुंगाखांहोनाय खामानियाव नांथाबनायनि थाखाय राज्योआव गासै मोन 288 गसर थिसन्नाय जादों, बे आयदानि सायाव सा 393 सुबुंखौ एरेष्ट खालामनाय जादों।
बेरा फारसेथिं जाय मोनसे राजखान्थि गोहोआ आसामनि साहा बागानफोराव थानाय सरासनस्रा सुबुं समाजखौ गोरोन्थि एबा नंखाय लामाजों खौरां गोसारहोनानै गोसो गिखांहोनाय खोथाखौ मख'लांनानै आरोबाव मन्थ्रि शर्मा बिथाङा बुङो दि जों नुनो मोनदों दि माखासे सुबुं हान्जाया गोजोन आबहावाखौ दुंहाव थासारि सोमजिनायाव बिहोमा होलांदों। राजखान्थियारि नोजोर थांखि सिगाङाव लाखिनानै नंखाय फोसावनायजों साहा बागानफोराव राज्यो-राजाखौ बांलादेशी सुबुंखौ थानो आश्रय होगोन होन्ना गोसो गुदुं खालामदों होन्ना अ'जद दैखाङो।
गुबुन फारसेथिं जाय थांनाय 31 आगष्टआव आसामाव फोसाव जानाय जोबथा हादोरारि नोगोरारि फारिलाइ (Final NRC) खौ मख'लांनानै बुंबावो दि बै खारिथिखौ हादोरसा सोरखारा आजावना लाया होन्ना बुंथियो मन्थ्रि (Minister) ड° हिमन्त बिश्व शर्माया। हादोरारि थाखोआव एन आर सि खौ मावफुंजायोब्ला आसाम हादोरसायाबो बेनि बाहागोदारि महरै हाबसिगोन।
