क’कराझार,सेप्तेम्बर 24: दुलाराय बर’ फरायसा आफादा मिरु सरकारनाव सोंथि सोंदोंदि, बर’ हारिनि सा 5000 मुंख्लं आरो सा 25,000 निबो बांसिन सोद्रोमाफोरा जोबथेसालिआव थांनांनाया आलादा राज्यो बड’लैन्ड सोरजिनो थोजासे नङा नामा? जुदि थोजासे नङा अब्ला जों मा होबाव नांगोन?
रबिबाराव चिरां जिल्लानि सिङाव थानाय काजलगावनि उदांस्रिनि आलारि प्रेमसिं ब्रम्ह गेलेग्रा फोथाराव दुलाराय बर’ फरायसा आफादनि दैदेन्नायाव भारत सरकारखौ नारसिन्नानै आलादा राज्यो बड’लैन्ड सोरनिनो गेदेरथार सुबुं गौमा लानाय जादों। बे हाबाफारिखौ NDFB(P) आरो PJACBM गुबुन गुबुन सुबुं आफादफोरा हेफाजाब होदोंमोन।
सुबुं गौमानि गेजेरजों दुलाराय बर’ फरायसा आफादनि आफादगिरि प्रमद बर’ बिथांआ थाबैनो आलादा राज्यो सोरजिनो मावथांखि लानांगौ होन्ना सरकारनाव दाबि दैखांनायजों लोगोसे BTC नि बाहेरायाव थानाय बर’ सुबुंफोरनि हा आरो राजखान्थियारि मोन्थायखौ मोन्नांगौ लोगोसे डिमाहासाव आरो कार्बिआंलं जिल्लायाव थानाय बर’फोरनो सेडियूल ट्रायब हाजो ओनसोलनि बिमुंखौ मोन्नांगौ होन्ना गोख्रों रावजों दाबि दैखांदों।
बर’ बिथांआ बुङोदि, “5000 निबो बांसिन बिदा आरो फंबायफोरा आलादा राज्यो दाबिनायाव मुंख्लं जालांबाय, रोजा रोजा आयजोफोरा जिनाहारि खालामजाबाय, सा 25,000 निबो बांसिन बड’लैन्ड बिग्रायारि सोद्रोमाफोरा आयेन बेरेखायै जोबथेसालिआव जोबना दोनजाबाय, थांनाय 40 बोसोर सिगांनिफ्रायनो जों बेफोरबादि इनाय अनागारिफोरखौ फोजोबनो गोजोन आरो अहिंसानि गेजेरजों सोमावसारबोगासिनो दं। आं गाहाय मनट्री आरो नख’र मनट्रीनाव सोंनो लुबैयोदि, बड’लैन्ड राज्यो दाफुंनो थाखाय जों बेसेबां जिउ बावनो नांबावगोन? साबैसे गोजोन मोजां मोनगिरि सोद्रोमाफोरा जोबथेसालिआव थांबावनो नांगोन? भारत संबिजिरनि 2थि आरो 3थि दफाजों मोनबेसे आलादा राज्योआ दाफुंजाखो? बड’लैनेड राज्योखौ मानो दाफुंनो हाया?”
सुबुं गौमा बादिनो आफादगिरि बिथांआ अक्टबर आरो नबेम्बर दानाव फारि फारि सोमावसारनायनि मावथांखिफोर फारियै- राजा लामा होबथानाय, रेल होबथानाय, नबेम्बर दानाव दिल्लीआव गेदेरथार हान्जा सुरनाय, सरकारनि बेरेखा सोमावसारनाय (Civil Disobedience Movement) आरो गुबुन गुबुन। बड’लैन्ड दाबिनि गेजेरजों बिथांआ हा रैखाथि होनाय, राव, हारिमु, आरो सिनायथिफोरखौ रैखा होनांगौनि दाबि दैखांदेरो।
NDFB(P) नि आफादगिरि दिरेन बर’ बिथांआ बुङोदि, गोलाव सम जों हाथियार लानानै सोमावसारदोंमोन, डेमक्रेटिक आयेन आरो भारत सरकारखौ मानिनानै गोलाव सम जानानै थालांनाय बड’लैन्डनि दाबिखौ आयेन बादिलै सुस्रांनो सरकारनि खावलायहरनाय बादियै जों हाथियारखौ दोन्थ’ना रायज्लायनो सिगांदोंमोन नाथाय सरकारा रायज्लायनायखौ साम’ मानबायनायबादि लासै लासै लांनाया दुखुनांथाव। बेजों लोगोसे जेब्ला जोंनि सावरायनाया सोलिगासिनो दं, बे समाव जोंनि सोद्रोमाफोरखौ जिउ जोबजासे जोबथेसालिनि साजा आरो बावैसो NIA नि बिजिरनानै फासिनि साजा फोसावनाया दुखुनांथाव आरो गोसो बायग्लिगोयो होन्ना बिथांआ दुखुजों बुङो। आं सरकारखौ दानि थासारिखौ बुजिनो खावलायो आरो बड’लैन्ड राज्योखौ थाबैनो दाफुंनायासो जेंनाखौ सुस्रांनाय जागोन होन्ना गोख्रों रावजों बिथांआ बुंबावो।
दुलाराय आसाम बेंगलि फेदारेसननि बोसोनगिरि सुसिल दास बिथांआ बुङोदि, आं गासै बिदा फंबायफोरखौ मिथिहोनो लुबैयैदि जाय बिथांमोनहा बे सुबुं गौमायाव बाहागो लादों, जोंनि बेंगलि फेदारेसनआ आलादा राज्यो बड’लैन्डनि दाबिखौ हेफाजाब होयो जि जायगायाव गोग्लैसोनानै थानाय, नाख्रेबजानाय आसामनि सुबुंफोरा जयै आरो गोजोनै थागोन, फै जों बयबो खौसेयै अनागारिफोरजों जुजिनो होन्ना बिथांआ बुंबावो।
दुलाराय आसाम गर्खा सन्मिल नि लेङाइ आफादगिरि माधब चेट्रि बिथांआ बुङोदि, जायनि थाखाय सरकारजों नांगासिनो दं, बे सैथो आरो भारत संबिजिराव लिरनाय दं। गर्खा हारिनि जानानै, आं बड’लैन्ड राज्यो दाबिखौ गोख्रोङै होफाजाब होयो आरो आं भारत सरकारखौ आलादा राज्यो दाफुंनो थाखाय मावथांखि लानो खावलायो होन्ना बिथांआ बुङो।
बे गेदेरथार सुबुं गौमायाव गुबुन गुबुन गेदेमा दैदेनगिरिफोर फारियै- आगुनि MP उरखाव गोरा ब्रम्ह, सानसुमा खुंगुर बौसोमुथियारि, NDFB(P) गाहाय नेहाथारि गबिन्दा बसुमथारि, PJACBM नि गाहाय खन्बेनर राकेस बर’ NDFB(R) नि गाहाय नेहाथारि बि. अन्जालु आरो गुबुन गुबुन।
