गुवाहाटी,फेब्रुवारि 8: आसाम गोरोबथानि मोनसे फिथाय बादियै फैनाय आसामनि मोननै मुलुग सोलोंसालि, तेजपुर मुलुग सोलोंसालि आरो आसाम मुलुग सोलोंसालिफोराव असमिया रावनि आलादा बिफान गैया। बे बाथ्राखौ जेब्ला ब्रिहस्पथिबाराव एजिपि दोलोनि एम एल ए पबिन्ड्र देका बिथांआ दानि सोलिफुबाय थानाय बिधान सभानि जथुमायाव सोंथि सोङो अब्ला ओंखारो।
बिथांनि सोंथिआव हादोरसा सोलोंथाय बिफान्नि मंत्री सिदार्ता बाटाचार्य बिथांआ फिन्नाय होयोदि, मोन्नैबो मुलुग सोलोंसालिआव असमिया रावनि आयदाखौ फसंनो थाखाय मोन्नैबो सोलोंसालिनि बिबानगिरिफोरजों थाबैनो सावरायनाय जागोन।
देका बिथांआ जथुमायाव बुङोदि, मोन्नैबो मुलुग सोलोंसालिमायाव असमिया आयदानि बिफान गोयैआ दुखुनांथाव, जाय सोलोंसालिआ आसाम गोरोबथायाव सहि होनायनि मोनसे फिथाय। आं बे बाथ्राखौ खौरांगिरिफोरनिफ्रायसो मिथिनो मोनदों। बे मोन्नैबो मुलुग सोलोंसालिमाफोराव असमिया रावनि बिफानखौ फसंनो थाखाय हादोरसा सरकार आरो हादोरसानि सोलोंथाय बिफाना थाबैनो राहा लानांगौ होन्ना बिथांआ दाबि दैखाङो।
बाटाचार्य बिथांआ फिन्नाय होयोदि, मोन्नैबो मुलुग सोलोंमानिफ्राय जों माखासे रिपर्टखौ मोन्नाय जाखाबाय, तेजपुर मुलुग सोलोंसालिफोरबादिआव असमिया रावनि बिफान गैया, आरो बेनि थाखाय जों इउनिभारसिति ग्रान्ट खमिसन (UGC) मावखनिसिम लाइजाम (प्रपजेल) हरनाय जाखाबाय नाथाय दासिम गनायनानै लायाखै। नंगौ, महापुरुस स्रिमन्ट संकरदेबनि मुंआव असमिया रावनि सोलोंथाय मिरु नांगौ, गोजाननिफ्राय सोलोंथाय लानाय एबा Distance Education Mode आवबो असमिया रावखौ सोदेरनानै होनो थाखाय आखायाव लागासिनो दं होन्ना बिथांआ बुंबावो।
“आं गावनो आखायाव लागोन, जाहाथे मोन्नैबो मुलुग सोलोंसालिनि बिबानगिरिफोरा UGC मावखनिसिम गोदानै लाइजाम (प्रपजेल) हरनानै UGC नि गनायथि मोनो आरो असमिया बिफानआ गायसंजायो” होन्ना बिथांआ खोथा होयो।
आसाम मुलुग सोलोंसालिखौ नोजोर होनानै बिथांआ बुङोदि, “दिपु आव थानाय आसाम मुलुग सोलोंसालिआव असमिया रावनि बिफान दं, सिलसर नोगोरमानि साखाथिआव थानाय आसाम मलुग सोलोंसालिआवबो असमिया रावनि बिफानखौ बेखेवनो थाखाय आं खामानिफोरखौ मावलांगोन”।
फारसेथिं आसामनि माखासे मुलुग सोलोंसालिफोराव बर’ रावनि बिफानखौबो दासिमबो बेखेवाखै, गुवाहाटी मुलुग सोलोंसालि, बड’लेन्ड मुलुग सोलोंसालि, डिब्रुगड़ मुलुग सोलोंसालिफोरनि अनगायै आसामनि गुबुन गुबुन मुलुग सोलोंसालिफोराव बर’ रावनि बिफानखौ नुनो मोन्नाय जायाखै। थांनाय 2016 माइथायाव बड’ साहित्य’ सभानि माखासे दैदेनगिरिफोरा आसाम मुलुग सोलोंसालिनि बिबानगिरिफोरजों बेनि सायाव सावरायज्लायदोंमो नाथाय बाथ्राया बेसेबां दावखोदों बेनि सायाव जेबो मिथिनो मोन्नाय जायाखै।
