गुवाहाटी,फेब्रुवारि 13: पारलियामेन्टनि राज्य’ सभानि जथुमायाव नोगोरारि बिल 2019 खौ दिनै एबा जोबथा जथुमायाव सोदांनानै गोदान आयेन दाफुंजायैखौ नोजोर होनानै दुलाराय आसाम फरायसा आफाद एबा जाय आफादआ आसाम आरो सा-सान्जा ओनसोलफोराव बिलखौ हेंथा खालामबोगासिनो दं, बिथांमोनहा बुङोदि, राज्य’ सभानि जथुमायाव सोदांजायैआ गासै आसाम आरो सा-सान्जा ओनसोलफोराव थानाय सुबुं माहारिनि मोनसे जारिमिनारि देरहासारनाय।
नेशनेल डेमक्रेटिक एलाइन्स (NDA) दोलोजों दैदेनजानाय सरकारनि 18थि राज्य’ सभानि जोबथा जथुमाखौ जथुमानि गाहाय एम भेनकायाह नायडु बिथांआ दिनै (13 फेब्रुवारि 2019) फोजोब्बाय।
नोगोरारि सोदांनाय बिल 2019 नि बेरेखायै मेंनाय आरो जिरायनाय गोया जासे बायदि रोखोमनि हाबाफारि लानानै धर्ना होबोनानै दिनै सरकारनि हेंथायै आसाम आरो सा-सान्जा ओनसोलनि सुबुं माहारिया देरहासार जाबाय, बेयो आसाम आरो सा-सान्जा ओनसोलफोराव थानाय सुबुं माहारिफोरनि देरहासारनाय, मानोना नोगोरारि सोदांनाय बिल 2019 आ राज्य’ सभानि जथुमायाव सोदांजायासै होन्नानै दुलाराय आसाम फरायसा आफादनि गाहाय नेहाथारि लरिनज्यती गगय बिथांआ बुङो।
आसामनि गुबुन गुबुन दोलोफोरजों लोगोसे फरायसा आफाद आरो समाजआरि आफादफोराबो नोगोरारि सोदांनाय बिल 2016 नि हेंथायै धर्ना होबोगासिनो दं। बिथांमोनहा बुंदोंदि, नोगोरारि सोदांनाय बिल 2016 आ आसाम आरो सा-सान्जा ओनसोलफोराव बांसिनै गोहोम गोग्लैगोन आरो ओनसोलफोराव थानाय सुबुं सानखोआ सोलाइलांनानै ओसोलाव थानाय थागिबि सुबुंफोरनि राव, हारिमु आरो थुनलाइफोरा गोमालांगोन। बेफोरजों लोगोसे बिथांमोनहा बुंबावोदि, नोगोरारि सोदांनाय बिल 2016 आ 1985 माइथायव भारत सरकार, आसाम सरकार आरो आसाम फरायसा आफादनि गेजेराव जानाय जारिमिनारि गोरोबथाखौ सिफायगोन। बिथांमोनहा बुंबावदोंमोनदि, जुदि नोगोरारि बिल 2016 आ पारलियामेन्टनि जथुमायाव सोदांजागोन अब्ला आसाम आरो सा-सान्जा ओनसोलफोराव गोख्रोंनिफ्राय गोख्रोंसिन जालांगोन आरो बेनि दायनिगिरिआ सरकारआनो जानांगोन।
“नोगोरारि बिल 2016 खौ हेंथा खालामनाय जोंनि अलखद समाव हेफाजाब होनायनि थाखाय जनता दल, सिभ सेना, बिजु जनता दल हादोरारि राजखान्थि हान्जाफोरजों लोगोसे ओनसोलनि दोलोफोरखौ जों साबायख जासियो” होन्ना गगय बिथांआ बुंबावो।
मखनो गोनांदि नोगोरारि सोदांनाय बिल 2016 आ थांनाय 8 जानुवारि 2019 आव सोदांजाबायमोन नाथाय राज्य’ सभानि 18थि जोबथा जथुमायाव सावरायैलाय नोगोरारि सोदांनाय बिल 2019 आ आयेन दाफुंजायासै।
नोगोरारि सोदांनाय बिल 2016 खौ सोदांनानै 1955 माइथायनि नोगोरारि आयेनखौ मिरु सरकारखौ दैदेन्नाय नेशनेल डेमक्रेटिक एलाइन्स राजखान्थि दोलोआ पाकिस्तान, आपगानिस्ता आरो बांग्लादेस हादोरफोरनिफ्राय आयेन बेरेखायै थाफैनाय हिन्दु, सिक, बुद्दिस, जैयन, पारसिस आरो क्रिस्टानफोरखौ नोगोरारि थामोन्था होनानै संबिजिरारि मोन्थायखौ होनो थांगासिनो दंमोन।
