गुवहाटी,डिसेम्बर 22: दुलाराय आसाम फरायसा आफाद आरो सा- सान्जा ओनसोलफोराव थानाय मोन 30 गुबुन गुबुन हारि माहारिनि फरायसा आफादफोरा सुक्रबाराव धर्ना होनानै सुराखौ बायदि बायदि रावजों हुमखि होयो। बिथांमोनहा बुंदोंदि सा-सान्जा ओनसोलफोरा थागिबि सुबुं माहारिफोरनि थाखायसो, राजखान्थिनि सार्थआव भट बेंकनि थाखाय बांग्लादेसिफोरखौ दोनफैनानै आसामखौ बुखावनो हाया।
खौरां मोन्नाय बादिब्ला बिथांमोनहा गोदान दिल्लीनि फारलियामेन्ट हाउसनि लांगोना मोखांआव नोगोरारि (सोदांनाय) बिल 2016 नि बेरेखा खालामनानै धर्ना होयो। दुलाराय आसाम फरायसा आफाद आरो मोन 30 सा- सान्जा ओनसोलनि गुबुन गुबुन फरायसा आफादफोराबो बाहागो लानानै बिलनि हेंथाङै बेरेखा खालामनानै हादोरनाङैनो बिलनि फारसे सांग्रांथि जाहोनो सुक्रबाराव धर्ना होयो। बे मोनसे बाथ्राखौ लानानैनो नर्ट इस्त स्टुडेन्ट अरगेनाइजेशन (NESO) आफादआबो थांनाय बुथबारखालि धर्ना होदोंमोन बेनि उनावनो 48 धन्टा जास्लाबैआवनो गासै मोन 31 आफादफोराबो धर्ना होयो।
“आसाम हादोरा थागिबि सुबुंफोरनि थाखायल’, थागिबि सुबुंफोरा मोनफ्रोमबो बिथिंनि फारसे आसाम हादोराव आवग्रिथाय गोहोखौ मोन्नांगौ, आसाम हादोरसायाव थानाय जायखिजाया जिरादखौनो बांग्लादेस हादोरजों रान्नानै जानो हाया, राजखान्थि हान्जाफोरा गाव गावनि राजखान्थि सार्थआव भट बेंकनि थाखाय बांग्लादेसनिफ्राय फैनानै आयेन बेरेखायै थाफैनाय सुबुंफोरा बारा जाबाय जायनि जाहोनाव थागिबि हारि हारिसाफोरनि थामोन्था, मोन्थाय आरो सिनायथिफोरा गोमालांनो हमदों, नाथाय जों बेफोर साग्लोबनो नागिरनाय गोहोखौ होबथागोन” होन्ना दुलाराय आसाम फरायसा आफादनि गाहाय नेहाथारि लुरिन ज्यती गगय बिथांआ सेंन्टिनेलनि खौरांगिरिनि सिगांआव बुङो।
फारसेथिं धर्ना होनाय हाबाफारिआव, आसु आरो मोन 30 आफादफोरनि दैदेनगिरिफोरा बुङोदि, “मिरु सरकारनि गोहोआव थानाय सरकारा सोनाब बेंगलखौ भारत हादोरनि मोनसे बाहागो होन्नानै साना, बेबादि गोसोनि मानसिफोर दं, बिसोरबादि बिथांमोनहा सा-सान्जा ओनसोलाव थानाय थागिबि सुबुंफोरनि बेरेखायै (injustice) मावबोगासिनो दं,” होन्ना बिथांमोनबा बुङो।
“थागिबि सुबुंफोरनि लुबैनायखौ नेवसिनानै भट बेंकनि थाखायल’ दासान्दि मिरु सरकारा हिन्दु बांग्लादेसिफोरखौ सा-सान्जा ओनसोलफोराव दोनफैनो नागिरदों, जाय गोहोआ सान्जा ओनसोलनि बेरेखा, बे गोहोखौ फोजोबस्रांनो जों खौसेथि दं” होन्नानै दैदेनगिरिफोरा बुङो।
बुधबाराव नर्ट इस्ट स्टुडेन्ट अरगेनाइजेसन (NESO) एबा सा-सान्जा फरायसा आफादआबो बुंदोंमोनदि, सा-सान्जा ओनसोला आयेन बेरेखायै हाबफैनाय बांग्लादेसिफोरखौ दोन्नोथाखाय दाखोरबारि नङा, NESO नि गाहाय सामुयेल जायरोवा आरो गाहाय नेहाथारि सिनाम प्रकास सिंह बिथांमोनहा बुङोदि, “जुदि मिरु सरकारा नोगोरारि सोदांनाय बिल 2016 खौ सा-सान्जा ओनसोलफोराव सोदांगोन अब्ला बिथांमोनहा जोंब्लावनाय अरखौ नुनो मोनगोन”
