गुवाहाटी,डिसेम्बर 24: थांनाय 30 जुलाइ 2018 आव फोसावजानाय नेशनेल रेजिस्तार अव सीटीजेनसिव (एनआरसी) नि जोबथा आबुं फारिलाइ फोसावनायाव गोबां गोरोन्थि नुजादोंमोन जायनि जाहोनाव गोबां सनदेह’ गोनां सुबुंफोरनि मुंफोरा नुजादोंमोन आरो गोबां थागिबि सुबुंफोरनि मुंफोरा नुजायाखैमोन। बेफोर गोरोन्थि जालांनाय मुंफोरखौ आरो थागिबि नोगोरारिफोरनि मोन्थायखौ रैखाथि होनानै एनआरसीआव गोरोन्थि गोयै खालामफिन्नो थाखाय जौसिन बिरसालिआ मुं थिसनफिन्नो आरो अजद होफिन्नो थाखाय खाबु होदों।
बेनिनो हाबाफारि बादियै जौसिन बिजिरसालिआ आसाम हादोरसानि मोनफ्रोमबो डिपुटी खमिसनारनि मावख’आव मुं थिसनफिन्नाय आरो सनदेह’ गोनां सुबुंनि बेरेखायै अजद होफिन्नाय खामानिफोरखौ मावफुंनो बिथोन हरदोंमोन। बेनिनो मावफारिया बादियै मावफुनानै मिथिनो मोन्नाय जायोदि, गासै 25 लाख सुबुंफोरा मुं थिसनफिनदों आरो सा 600 सुबुंफोराल’ सनदेह’ गोनां सुबुंफोरनि बेरेखायै अजद होदों।
मखनो गोनांदि मुं थिसनफिन्नाय आरो गोरोन्थिआवनो जोबथा आबुं एनआरसीनि आबुं फारिलाइआव नुजानाय सुबुंफोरनि बेरेखायै अजद होनाय खामानिफोरनि थाखाय हादोरनि जौसिन बिजिरसालिआ 31 डिसेम्बर 2018 खौ जोबथा सम होदों। बेफोर खामानिफोरखौ मावनो थाखाय 1 सप्ताल’ सम दंसैलाय जों मिथिनो मोनोदि थांनाय 30 जुलाइ 2018 आव फोसावजानाय जोबथा एनआरसीनि आबुं फारिलाइआव थालांनाय गासै 40 लाख सुबुंफोरनि गेजेराव 25 लाख सुबुंफोराल’ मुं थिसनफिनदों। फारसेथिं सा 600 सुबुंफोराल’ गोरोन्थिआवनो एनआरसीनि फारिलाइआव ओंखारफानाय सुबुंनि बेरेखायै अजद होदों।
हादोरसानि गुबुन गुबुन जिल्लाफोरनिफ्राय खौरां मोन्नाय बादिब्ला दासिमबो एनआरसीआव मुं थिसनफिन्नाय आरो गोरोन्थिआवनो एनआरसीआव मुं ओनखारफानायनि बेरेखायै अजद होफिन्नाय खामानिफोरा सोलिफुगासिनो दं, गिबि सम होनायाव सुबुंफोरा देहायाव नाङाखैमोन नाथाय नैथि खेबनि सम बारायनानै होनायावसो सुबुंफोरनि देहायाव नांदों गुबैयै 15 डिसेम्बर 2018 निफ्रायसो सुबुंफोरा मुं थिसनफिन्नाय आरो अजद होनायाव मुखुब जादों।
गुबुन फारसेथिं मिथिनो मोन्नाय बादिब्ला एनआरसीआव गोरोन्थि जालांनाय मुंफोरखौ सुज्रायनानै लाफिननो थाखाय मोनफ्रोमबो NRC सिबिथाय मिरुफोराव सुफुं बिलाइफोरखौ Offline नि गेजेरजों मावफुंनो थाखाय खाबु होबोगासिनो दं। Offline नि गेजेरजों गाव गावनि मुंखौ सुज्रायनानै लानो थाखाय NRC सिबिथाय मिरुआव थांनानै सुफुं बिलाइखौ सुफुंनानै जमा होनांगौ जायो, नाथाय गोजोन्थाव खौरांआ जाबाय गाव गावनि मुंफोरखौ 5 सान्नि गेजेरावनो Online नि गेजेरजों सुज्रायनानै लानो हागोन।
Online नि गेजेरजों गाव गावनि मुंखौ गोरोन्थि गोयै खालामनो थाखाय NRC नि ऑफिशियेल Website www.nrcassam.nic.in आव थांनानै सुफुं बिलाइखौ सुफुंनानै गोरोन्थि गोयै खालामनानै लानो हागोन होन्ना मिथिनो मोन्नाय जायो।
खौरां मोन्नाय बादिब्ला 30 जुलाइ 2018 आव फोसावनाय NRC नि आबुं फारिलाइआव गोरोन्थि नुजानाय मुंफोरखौ Online नि गेजेरजों गोरोन्थि गोयै खालामनानै लाफिन्नो थाखाय NRC नि बिबानगिरिफोरा 5 डिसेम्बर 2018 निफ्राय बे खाबुखौ होबोदों होन्ना मिथिनो मोनबावनाय जायो नाथाय बेखौ मावफुंनो बेसेबां गोबाव सम होगोन बेनि फार्से NRC नि बिबानगिरिफोरा जेबो मिथिहोथआखै।
