क’कराझार,फेब्रुवारि 7: आसाम हादोरसानि सिङाव थानाय क’कराझार पारलियामेन्टारि बियाबखौ आवग्रिनानै लानो थाखाय इंन्डीयान नेलनेल कंग्रेस हादोरारि राजखान्थि दोलोआ साखाफारा जागासिनो दं। जाय बियाबआ सेडियुल ट्रायब अबा ट्रायबेल माहारिफोरनि थिनानै दोन्नाय मोनसे मासि।
क’कराझार टाउननि बिखायाव थानाय रामेन्ड्र नारायन बसुमथारि मिमरियेल भबन आव कंग्रेस दोलोआ जथुमा खुंफुङो, जाय जथुमायाव AICC नि जयेन सेक्रेटारि हरिपल रावात आरो AICC निनो सोद्रोमाफोरजों लोगोसे APCC नि नेहाथारि इमदाद हुसेन बिथांमोनहा बाहागो लायो।
APCC नि सोद्रोमा बिस्वाजित राय, जाय बिथांआ बीटीसी ओनसोलनि सासे बिबानगिरि, बिथांआ खौरांगिरिफोरनि सिगांआव बुङोदि, “देग्लायनि पारलियामेन्टारि बिसायखथिआव कंग्रेस दोलोआ क’कराझार बियाबखौ मोनफिनसिगोन आरो हादोरसायाव गासै मोन 10 MP नि मासिफोरखौ कंग्रेस दोलोआ मोनफिनसिगोन”। बिथांआ बुंबावोदि, AICC नि दैदेनगिरिफोरा कंग्रेसदोलोनि गुदि थाखोसिम लोगो हमनो फैदों आरो सावरायदों। ओनसोलनि सुबुंफोरा बिजेपि दोलोनि बेरेखायै भट होगोन, मानोना बिथांमोनहा थांनाय बिसायखथिनि सिगां खोथा होनायफोरखौ मावफुंनो हायाखै। मिरु सरकार आरो आसाम सरकारनि खुंथायाव थानाय बिजेपि दोलोआ नोगोरारि (सोदांनाय) बिल 2016 आरो सेडियुल ट्रायब (एमेन्डमेन्ट) बिल 2019 खौ लाबोनानै हादोरसायाव जेंना खालामदों आरो गोसोआव गोजोन्नाय गोयै लाबोदों। बिजेपि दोलोआ हिन्दु बांग्लादेसिफोरनि जिउखौ लानानै राजखान्थि गेलेदों” होन्ना बिथांआ बुंबावो।
हादोरसा कंग्रेस दोलोनि गोजौ थाखोनि दैदेनगिरिफोरा नोगोरारि (सोदांनाय) बिल 2019 आरो सेडियुल ट्रायब (एमेन्डमेन्ट) बिल 2019 खौ लानानै सावरायगासिनो दं आरो बिलखौ हेंथा खालामनो हागौ होन्ना बिस्वजित राय बिथांआ बुङो।
फैगौ बिसायखथिआव कंग्रेस दोलोनिफ्राय सोरसासे बिजाथिआ गाखोगोन होन्ना खोरांगिरिफोर सोंथि सोंनायाव बिथां रायआ बुङोदि, कंग्रेस दोलोनि गेदेमा दैदेनगिरिफोर जेरै जामानसिं ब्रम्ह, दुर्गा दास बर’ आरो साबदाराम राभा बिथांमोनहा क’कराझार बियाबनि थाखाय मुं थिसन्नो हागौ। बिथांआ बुंबावोदि गावनोबो बरपेटा नङाब्ला मंगलदै बियाब आव मुं थिसन्नो थाखाय खाबु होनो हागौ।
“दानि क’कराझार बियाबनि MP नब कुमार सारनिया बिथांआबो कंग्रेस दोलोआव मुं थिसन्नो हासिगौ, सावरायनाया सोलिगासिनो दं” होन्ना बिथांआ बुंबावो।
"क’कराझार मेडिकॉल सोलोंसालिखौ माब्लाबानो लुखांनांसिगौमोन नाथाय दासिमबो अन्थायखाम्पाल’ गायसंनानै दोनदों। धुबुरि मेडिकॉल कॉलेजखौबो दासिनबो लुफुंजोबाखै” होन्ना राय बिथांआ बुंबावो।
