क’कराझार,मार्च 01: क’कराझार जिल्ला पुलिसआ खोमसि फोथायनाय एबा गुबैयै दायना फोथायनायनि सायाव “प्रजेक प्रहारि” नि मुं लानानै “मिसन बिरुबाला”जों लेगोसे सांग्रांथियारि मेल खुंफुङो।
खौरां मोन्नाय बादिब्ला क’कराझार जिल्ला पुलिस, दुलाराय राभा फरायसा आफाद, दुलाराय राभा हादोरारि आफाद, दुलाराय राभा अइजो आफाद, राभा साहित्य’ सभा, दुलाराय बर’ फरायसा आफाद, गार’ फरायसा आफाद आरो राभा नेशनेल लिबारेशन प्रन्ट (प्र-टक) लोगोसेयैनो क’कराझार जिल्लानि सिङाव थानाय काजिगांव पुलिस थानानि बेन्देंनि मदाती बाजारनि साखाथिआव थानाय मदाती गेलेग्रा फोथाराव बुधबारखालि खोमसि फोथायनाय एबा गुबैयै दायना फोथायनायनि सायाव सांग्राथिआरि मेल खुंफुङो।
बे जथुमाखौ पर्बतजरा SDO(C) सतिस ताकुरिया बिथांआ सामलायदोंमोन आरो समाज सिबियारि ड: बिरुबाला राभा, क’कराझार पुलिस बिफान्नि SP राजेन सिंह, पर्बतजरा SDPO दिपक कुमार दास, समाज सिबियारि मुन मुन ब्रम्ह आरो गुबुन गुबुन गेदेमा बिथांमोनहा आलासि महरै बाहागो लादोंमोन होन्ना मिथिनो मोन्नाय जायो।
सांग्रांथियारि मेल खुंफुंनायाव गामियारि ओनसोलफोर फारियै- मदाती पार्ट-III, IV, आरो V , कपाती आरो बोरसिजरा गामिफोरनि गासै 1,200 सो राज्यो राजाफोरा नुजाथिदोंमोन आरो गुबैयै राभा हारिनि सुबुंफोरा बाहागो लादोंमोन। समाज सिबियारि ड: बिरुबाला राभा बिथांआ खोमसि फोथायनायनि सायाव गोथौयै बिबुंथि लाखिनानै राज्यो राजाफोरखौ सांग्रां जाहोनानै गोजांस्रिउ होनो हादोंमोन होन्नाबो खौरां मोन्नाय जायो।
सोलोंथाय गोयै आरो गोन्खोआरि मुलुगाआ जायगा मोनैनि जाहोनाव खोमसि फोथायनाय एबा दायना फोथायनाय जेंनाफोरा बेफोर ओनसोलफोरनि समाजआव सोलिफुगासिनो दं। गुबुन मोनसे जाहोना जाबाय Community Health Centres फोराव मोजां मेडिकॉल ऑफिसार एबा देहा फाहामगिरिफोर गोयैनि थाखाय ओनसोलनि सुबुंफोरा देहायारि बिथिंआव जौगाखांनाय गोयै लोरबां जानानै थादों जायनि जाहोनाव लोमजानाय साजानाय जायोब्ला बिथांमोनहा अजा एबा नायखांग्राफोरनि खाथिआव थांनांगौ जायो। गुबैयै अजाफोरा आयजोफोरनि गेजेराव ओंखारो होन्ना मिथिनो मोन्नाय जायो।
क’कराझार जिल्लायाव गासै मोन 147 मेडिकॉल ऑफिसारफोरनि मासि खालामनानै होनाय जादों नाथाय गासै मोन 46 मासिफोरावल’ मोजां मेडिकॉल ऑफिसारफोरखौ थिसनदों आरो गासै मोन 101 मासिफोरा खालि जानानै दं होन्नाबो खौरां मोनबावनाय जायो।
बेफोर जायगाफोराव खोमसि फोथायनाय एबा दायना फोथायनायफोरखौ फोजोबस्रांनो थाखाय गामियारि ओनसोलपोराव Primary Health Centres गाइसंनाया जोबोद गोनांथि दं। जुदि Primary Health Centres फोरखौ गोथौ गोथौ गामिफोराव गाइसंनानै मोजां देहा फाहामगिरिफोर थिसन्नानै होगोन अब्ला समाजनिफ्राय एसेब्लाबो एबा खोमसि फोथायनायनानै अजा रायनाय, जायना फोथायनायफोरखौ फोजोबस्रांनो हागोन। बेफोरजों लोगोसे गुदि फरायसालिफोरखौ गाइसंनानै होनाया जोबोद गोनांथि दं, जाहाथे उन्दै उन्दै गथ’साफोरा गुदि सोलोंथायखौ लानानै नांगौ गियाफोरखौ मोन्नो हायो।
लामा बानायनाय, दालां लुफुंनायफोरा ओनलसोलफोरखौ जौगाखांनाय लाबोनायनि मोनफा मोनफा इंन्जिन, गोरिबखौ फोजोबस्रांनाय, गामियारिफोरनो सानफ्रोमबोनि जिउ खुंनायाव नांगौ जानाय मुवाफोरा जोगाखांनायनि गुबुन मोनसे जेंना सुस्रांनायनि लामा।
जौगाखांनाय लाबोनो थाखाय“प्रजेक प्राहारि” हाबाफारिआ आसाम पुलिसनि मोनसे मावफारिया, बेनि गेजेरजों पुलिस बिफानआ राज्यो राजाजों थाफानानै लोगोसेयै सुबुं-समाजनि गेजेराव थानाय समाजनि बेरेखा हाबाफारिफोरखौ फोजोबस्रांनाय आरो गुबुनजों गादबनानै दोनजानायफोरखौ बोखांनाय। गुसुङै बुंनो थाङोब्ला समाजनि दावराव दावसि एबा दाङा बाजिफोरखौ बोस्रांनो लानाय आसाम पुलिसनि मोनसे हाबाफारि। प्रजेक प्राहारिनि गेजेजों आसाम पुलिसआ सम सम गामियारि ओनसोलफोराव देहायारि सांग्राथि बादा (Health Camp) खुंबोयो।
