क’कराझार,जानुवारि 7: बड’लेन्ड हालामाव देरायारि फाहामथायनि खाबु, सुबिदा, आरो इसेल’ रांआवनो मोन्नो हानायबादि खालामनो थाखाय हादोरसानि गिबि मंत्री सर्बानन्द सनवाल बिथांआ हाबाफारि बादियै रबिबारखालि क’कराझार आव मेडिकॉल कॉलेज काम देहा फाहामसालि लुफुंनो अन्थाय खाम्पाखौ गायसंबाय।
खौरां मोन्नाय बादिब्ला क’कराझार मेडिकॉल कॉलेजआव गासै मोन 500 बिसिनाफोर थागोन आरो बोसोरफ्रोमबो सा 100 फरायसाफोरा MBBS दिग्रिनि थाखाय मुं थिसन्नो हागोन। बे मेडिकॉल कॉलेजखौ गासै 81.75 बिगा गुवार हायाव गायसंगोन आरो बेखौ हादोरसानि गासै 382.70 कौटी रां बाहायनानै 30 दान एबा 3 बोसोरावनो लुफुंनानै फोजोबोगोन होन्ना मिथिनो मोनबावनाय जायो।
अन्थाय खाम्पा गायसंनाय हाबाफारिआव हादोरसानि गिबि मंत्री सर्बानन्द सनवाल बिथांआ बुङोदि, BTAD ओनसोलाव गोबाव समनिफ्रायनो मेडिकॉल कॉलेज गायसंनो दाबि खालाबोबाय थानाया जाफुंबाय।
सनवाल बिथांआ बुंबावोदि, “बीटीसी हालामनि सिङाव गोदानै लुफुंजानो लागा मेडिकॉल कॉलेजआ गोदान मुगानि गोनखोआरि मुवाफोरखौ बाहायनानै गुबैयै BTAD आव थानाय सुबुंफोरखौ मेडिकॉनि फोरोंथाय होगोन आरो गिबि खेबनि थाखाय बीटीसीनि जारिमिनाव थासिगोन”। बिथांआ बुंबावोदि, “BTAD ओनसोलाव जौगाखांनाया गोख्रैयै जागासिनो दं, बेफोरो बीटीसी खुंथायनि गोख्रों दैदेन्नाय आरो नाजानायाव जादों”। लोगोसे बिथांआ बीटीसी खुंथायनि गाहाय हाग्रामा महिलारि बिथांखौ BTAD ओनसोलखौ सोलायनाय आरो जौगाखांनायनि मोनसे मिरु खालामनो हादों होन्ना गोजोनग्लायनाय जासियो। “मोनसे समाव गोजोन हासथायनानै हिंसायारि जाथाय सोमजिहोनाय सुबुंआ दिनै BTAD ओनसोलाव गोजोन आरो खौसेथि लाबोनायनि मोनसे बिदिन्थि जानानै थाबाय” होन्ना सनवाल बिथांआ हाग्रमा महिलारिखौ बाखोनायो।
गिबि मंत्री बिथांआ बुंबावोदि, आसाम हादोरसाया मोनसे जायगा, जाय हादोरसायाव गोबां गुबुन गुबुन हारि-माहारिफोरा गोबाव समनिफ्रायनो गोजोनै राज्यो जाबोगासिनो दं। बराक भेलि, ब्रम्हपुत्र भेलि, हाजो आरो आयेन जेरावखि थाया मानो जिंगा सिनांगौनि बाथ्रा गैया सरकारा बिथांमोनि थाखाय रैखाथि, खौसेथि आरो गोजोन लाबोनो नाजागासिनो दं होन्ना बिथांआ बुङोदि, “जेरैखि जायाब्लाबो हादोरसानि थागिबि सुबुं आरो हारि माहारिफोरनि लुबैनायबादि खामानिफोरखौ मावलांगोन आरो रैखाथि होगोन”।
देहायारि आरो नखर बिफान्नि मंत्री ड: हिमान्ट बिस्व सर्मा बिथांआ अन्थाय खाम्पा गायसंनाय हाबाफारिआव बुङोदि, आसाम हादोरसानि सिङाव बिजेपि, बीपीएफ आरो एजिपि लोगोसेयै खुंथायाव थानायफोरनि जयै नाजानायाव क’कराझार जिल्लायाव मेडिकॉल कॉलेज गायसंनाया जौगाखां हाबा मावनायाव देहायारि बिथिंआव मोनसे दाजाबदेरनाय होन्ना बिथांआ बुङो। बिथांआ बुंबावोदि, मेडिकॉल कॉलेजजों लोगोसे सिरिसेयैनो केन्चार देहा फाहामसालि, बिमा आरो गथ’सा देहा फाहामसालिफोरखौबो गायसंगोन होन्ना खौथा होबावो। आसाम माला स्किमनि गेजेरजों BTAD ओनसोलाव गोदान गोदान दालांफोरबो लुफुंगोन होन्न खोथा होबावो।
बीटीसी खुंथायनि गाहाय हाग्रामा महिलारि बिथांआ BTAD ओनसोलाव माखासे जौगाखां हाबा मावफुंलांनायफोरखौ सुंदयै फोरमायथिनानै होयो। Sports Academy आरो इंन्जिनियारिं कॉलेजफोरखौबो BTAD ओनसोलाव गायसंनाय जागोन होन्ना बिथां हाग्रामाया बुङो।
समाज जौगाखां बिफान्नि मंत्री प्रमिला रानि ब्रम्ह, हान्थामेला बिफान्नि मंत्री चन्डन ब्रम्ह, बीटीसी खुंथायनि डिपुटी गाहाय खाम्पा बरगयारि, MP बिस्वजित दैमारि, बड’ साहित्य सभानि आफादगिरि टरेन बर’आरो गाहाय नेहाथारि प्रसान्त बरगयारि, देहा आरो नखर बिफान्नि प्रन्चिपाल सेक्रटारि समिर कुमार सिंहा आरो माखासे गुबुन गुबुन मानगोनां बिथांमोनहा बे हाबाफारिआव नुजातिदोंमोन।
