तामुलपुर,फेब्रुवारि 16: बीटीसी खुंथायनि गाहाय आरो बड’लेन्ड पिपल्स प्रन्ट (बीपीएफ) राजखान्थि दोलोनि दैदेनगिरि हाग्रामा महिलारि बिथांआ सनिबाराव बुङोदि, जम्मु आरो काश्मीर हादोरसानि सिङाव थानाय पुलवामा गाग्लोबनायनि फिन्नायखौ होनो थाखाय आरो हादोर सिबिनो थाखाय बीटीसी ओनसोलनिफ्राय सा 500 सो बर’ लाइमोनफोरखौ दैथायहरनो हागोन, जुदि गोनांथि जायोब्ला।
थांनाय 14 फेब्रुवारि 2019 आव जुम्मु आरो काश्मीरनि पुलवामा जिल्लायाव जाइस-इ-महामद उदखारि हान्जानि गाग्लोबनायाव गासै सा 40 निबो बांसिन सीआरपीएफ रौनिया हान्जानि सोद्रोमाफोरा जिउ खोमानो गोनां जादोंमोन। बे गाग्लोबनायानो थांनाय 5 बोसोरनि गेजेराव बयनिख्रुयबो देरसिन भारत हादोराव उदखारिफोरनि गाग्लोबनाय।
“जों जोहोलावफोरनि सायाव गाग्लोबनायखौ आं गोख्रों रावजों सोंखारियो, आरो उदखारिफोरनि बेफोरबादि मुगैथाव गाग्लोबनायखौ आं दुखु फोरमायो, जुदि भारत सरकारा खाबु होगोन अब्ला उदखारिफोरनि हेंथायै नांनो आरो फोजोबनो सा 500 सो बर’ लाइमोनफोरखौ काश्मीराव दैथायहरनो साखाफारा” होन्ना महिलारि बिथांआ बुङो।
मनेस्वर बसुमथारि, जाय बिथांआ आसाम हादोरसानि बीटीसी ओनसोलनि सिङाव थानाय बाक्सा जिल्ला तामुलपुर कलबारिनि गामिनि थागिरि, बिथांआबो सीआरपीएफ रौनिया हान्जानि सासे, जाय बिथांआबो पुलवामा जिल्लायाव उदखारिफोरनि मुगैथाव गाग्लोबनायजों गावनि आगोमा जिउखौ हादोरनि थाखाय बावनो गोनां जादों। 16 फेब्रुवारि 2019 आव हाग्रामा महिलारि बिथांआ मुंख्लं मनेस्वर बसुमथारिनि न’आव थांनानै बे बाथ्राखौ बुङो।
“जों मुंख्लंनि नखरफोरजों लोगोसे दं, जाथाया गासै मुलुगखौनो सोमोनांहोदों। बसुमथारि बिथांनि मुंख्लं जानाया हादोराव गोबां खहा जानानै थालांबाय, भारतीय’ आर्मिआ जाथायनि फिन्नायखौ हरनांसिगौ, आर्मिफोरा गोख्रों राहा लानांसिगौ, जाहाथे मुंख्लंफोरनि जिउमाया गोजोम मोनो” होन्ना बिथांआ दाजाबदेरो।
बसुमथारि बिथांखौ हादोसानाङैनो गावनि आंगो गामिआव बिदाय होगोन। बिथांनि मुंख्लं जानायाव थालांनाय माखासे सोलेनि अंगफोरखौ बिरखंजों दिल्लीनिफ्राय गुवाहाटी LGBI बिरखं बाग्रायाव लाबोगोन आरो बेलासेनि 6 रिंगाया मोनफैगोन।
मनेस्वर बसुमथारि बिथांनि फिसाज्ला धनन्जय बसुमथारि बिथांआ खोरांगिरिफोरनि सिगांआव उदखारि हान्जानि बेरेखा गोख्रों राहा लानांगौ आरो पाकिस्तान हादोराव सार्जिकॉल स्ट्राइक होनांगौ होन्ना बुङो।
