गुवाहाटी,डिसेम्बर 22: भारतीय’ जनता पार्टी राजखान्थि दोलोनि माइन’रिटि मर्चानि हादोरारि आफादगिरि आबदुल रसिद आन्चारि बिथांआ बुङोदि, भारत संबिजिरनि आयेन बादियै जाय बिथांआ भारत नोगोरारि होन्नानै गाव गावखौनो फोरमान होनो हाया, बे बिथांमोनहा जेरैखिजाया जि जायगानिफ्राय फैदोंमोन बे जायगायाव भारत नागारना थांफिननांगौ, बिथांआ बुंबावदोंदि, बेयाव राव आरो हारिआ फैया।
आबदुल रसिद आन्चारि बिथांआ हादोरसायाव सान्नैनि थाखाय ब्रिहस्पथिबारनिफ्राय दंफैयोमोन। गावनि हादोरसायाव थांफिन्नायनि सिगां सुक्राबारखालि खौरांगिरिफोरनि सिगांआव बुङोदि, आसाम हादोरसायाव एनआरसीखौ भारतनि जौसिन बिजिरसालिनि बिथोन आरो नायनायाव मावफुंगासिनो दं, “गाव गावखौ नोगोरारि होन्नानै फोरमान होनो थाखाय भारत संबिजिराव माखासे आयेनफोर आरो आब्रुथिफोर दं, जाय बिथांमोनहा गावखौनो भारत हादोरनि नोगोरारि होन्ना लानो सानो बे बिथांमोनहा होखानाय आयेन आब्रुथिखौ मानिनानै फोरमान होनांगोन, जाय बिथांमोनहा संबिजिराव होखानाय आयेन बादिया गावखौनो नोगोरारि होन्ना फोराम होनो हाया, बे बिथांमोनहा जाय जायगानिफ्राय फैदोंमोन बे जायगायाव थांफिननांगौ, राव, हारि आरो धोरोमा बेहाय फैया” होन्ना बिथांआ बुंदेरो।
थांनाय 30 जुलाइ 2018 आव फोसावनाय एनआरसीनि आबुं फारिलाइआव नुजायै 40 लाख सुबुंफोरनि आरज बिलाइ गथायनायखौ नोजोर होनानै बिथांआ बुङोदि, “रजिस्ताराव मुं थिसनफिन्नो थाखाय बिथांमोनो थोजासे सम होनाय जादों, एनआरसीखौ भारतनि जौसिन बिजिरसालिनि बिथोन बादियैसो मावफुंनाय जादों”।
जेब्ला खौरांगिरिफोरा नोगोरारि सोदांनाय बिल 2016 नि सोमोन्दै बिथांनाव सोंथि सोङो अब्ला बिथांआ बुंथियोदि, “नायबिजिरनो थाखाय दाफुंजानाय जयेन पारलियामेन्टारि खमिटिआ (JPC) भारतनि पारलियामेन्टआव खौरां एबा रिपर्टखौ गथायाखै, बेनिखायनो बेनि फारसे आं जेबो बुंनो सानाखै, जेब्ला पारलियामेन्टआव रिपर्टखौ गथायगोन अब्ला बेनि फारसे सावरायनाय जागोन” होन्ना बिथांआ बुंलाङो।
जेब्ला रिजिनेल राजखान्थि हान्जा एआइइउडिएफ दोलोनि गाहाय बादारुद्दिन आजमलनि राहुल गान्डीखौ हादोरनि गाहाय मनट्रीनि मासि आवग्रिनायखौ लुबैनायनि फारसे सोंथि सोङो, अब्ला आन्चारि बिथांआ बुङोदि, “आसाम हादोराव बादारुद्दिन आजमलआ कंग्रेसनि बेरेखा जुजिगासिनो दं, नाथाय नेशनेल लेभेलाव कंग्रेस दोलोखौ हेफाजाब होदों, बिथांआ गावनि आयथिंखौ गुबुन जायगायाव दोन्नायनि सिमां नुनायनिफ्राय सिगां गावनि आयथिंखौ गावनि हायावसो दोनग्रोनो नांगोन, बिथांआ बावैसो खुंफुंजानाय पन्चायतनि बिसायखथिआवबो जेनबाय” होन्ना बिथांआ बुंदेरो।
बिथांआ खौरांगिरिफोरनि सिगांआव फोरमायथिना होबावोदि, “माइनरीती मर्चाया गोदान दिल्लीआव 31 जानुवारि 2019 निफ्राय सान्नैनि हाबाफारि लानानै जथुमा खुंफुंगोन, बिजेपि दोलोनि आफादगरि अमित साहाजों लोगोसे दोलोनि गोजौ थाखोनि गोबां दैदेनगिरिफोरबो बाहागो लागोन आरो गुबुन गुबुन हादोरसाफोरनि माइनरीटी मर्चानि सोद्रोमाफोराबो बाहागो लागोन”।
