गलाघात,फेब्रुवारि 14: सेडियुल ट्रायब ऑर्डार (आमेन्डमेन्ट) बिल 2019 खौ 13 फेब्रुवारिखालि राज्य’ सभानि जोबथा जथुमायाव सोदांनानै आयेन दाफुङैलाय गलाघात जिल्ला दुलाराय टाय अहम फरायसा आफाद (AATASU) आ बुधबाराव हादोरनि गाहाय मंत्री नारेन्ड्र मोडी आरो मिरु सरकारनि ट्रायबेल मंत्री जुयेल अराम बिथांनि मुसुका बानायनानै सावदों।
खौरां मोन्नाय बादिब्ला धर्ना होगिरि बिथांमोनहा मिरु सरकार आरो मिरु सरकारनि ट्रायबेल बिफान्नि मंत्री जुयेल अराम बिथांखौ बायदि बायदि रावजों सोंखारिनायजों लोगोसे गलाघात टाउन आव मुसुका बानायनानै सावदों।
गलाघात जिल्ला AATASU नि सुबुं फोसावदिं नेहाथारि अन्कुराज कनवार बिथांआ रादाब बिबुंसारनि गेजेरजों फोरमायोदि, बिजेपि दोलोआ थांनाय बिसायखथिनि सिगां आसामनि मोन 6 हारिसाफोरनो ट्रायबेल बिमुंनि गनायथि होगोन होन्नानै बुंदोंमोन नाथाय राज्य’ सभानि जथुमायाव मोन 6 हारिनो ट्रायबेल बिमुंनि गनायथि होनो थाखाय सेडियुल ट्रायब (ऑर्डार) आमेन्डमेन्ट बिल 2019 खौ सोदाखै।
सरकारा आसामनि मोन 6 हारिसाफोरखौ नाथ्रोदनानै दोनदों होन्नानै गलाघात जिल्ला दुलाराय टाय अहम फरायसा आफादआ बिजेपि सरकारखौ गोखों रावजों सोंखारियो। फैगौ बिसायखथिआव बिजेपि सरकारा बेनि फिथायखौ मोनगोन होन्नानैबो बिथांमोनहा बुङो।
हादोरनि गाहाय मंत्री नारेन्ड्र मोडी आरो मिरु सरकारनि ट्रायबेल मंत्री जुयेल अराम बिथांमोनि मुसुका सावनाय समाव गलाघात जिल्ला टाय अहम फरायसा आफादनि हारिमु नेहाथारि सुनिल गगय, गालाघात जिल्ला टाय अहम फरायसा आफादनि मावफुं आफादगिरि पंकज गगय, लोगो नेहाथारि गौतम लाहन आरो गलाघात जिल्ला TAYPA आफादनि आफादगिरि बिनय गगय बिथांमोनहा नुजाथिदोंमोन।
