क’कराझार,फेब्रुवारि 4: कछ राजबंसि हारिनि दोलोआ सेडियुल ट्रायब बिमुंनि दाबिखौ लानानै बीटीसी खुंथायनि गाहाय आरो बड’लेन्ड पिपल्स प्रन्ट राजखान्थि दोलोनि दैदेनगिरि हाग्रामा महिलारि बिथांखौ रबिबाराव लोगो हमो आरो सावरायो।
खौरां मोन्नाय बादिब्ला कछ राजबंसि हारिनि गुबुन गुबुन दोलोफोर फारियै- दुलाराय कछ राजबंसि फरायसा आफाद (AKRSU), कछ राजबंसि साहित्य’ सभा, बीटीएडि कछ राजबंसि सन्मिलनि, सिलाराय सेना आरो कछ राजबंसि महिला समिटिनि दैदेनगिरिफोरा लोगो हमनानै आसामनि मोन 6 हारिसाफोरनो सेडियुल ट्रायब बिमुंनि दाबिखौ सुस्रांनानै होनो खावलायो। लोगोसे बिथांमोनहा सरखारखौ दानि सोलिफुबाय थानाय पारलियामेन्टनि जथुमायावनो सेडियुल ट्रायब बिल 2019 खौ सोदांनो खावलायो।
मखनो गोनांदि, मिरु सरकारनि मावफारिया बादियै आसामनि मोन 6 गुबुन गुबुन गोजौ थाखोनि हारिसाफोरनो सेडियुल ट्रायब बिमुंनि गनायथि होनो थाखाय सेडियुल ट्रायब (आमेन्डमेन्ट) बिल 2019 खौ सोदांनो नागिरनायखौ हादोरसानि ट्रायबेल संघ आरो CCTOA आफादफोरजों लोगोसे गुबुन गुबुन मोन 14 ट्रायबेल माहारिनि आफादफोरा हेंथा होबोगासिनो दं आरो सेडियुल ट्रायब बिल 2019 खौ थाबैनो बोखांना लाफिननांगौ होन्ना दाबि खालामबोगासिनो दं।
दुलाराय कछ राजबंसि फरायसा आफादनि बार्ग आफादगिरि हितेस्वर बर्मन बिथांआ गावसोरनि लोगो हमज्लायनायनि फिथायनि सायाव फोरमायोदि, हाग्रामा महिलारि बिथांआ आसामनि मोन 6 हारिसाफोरनो ST बिमुंनि दाबिखौ जाफुंसार खालामनो आरो ट्रायबेल गनायथि होनो थाखाय हानायमानि नाजागोन आरो हेफाजाब होगोन।
“कछ राजबंसिजों लोगोसे माकासे गुबुन गुबुन हारिसाफोराबो गोबाव समनिफ्रायनो ST दाबि खालामबोगासिनो दं, देग्लाय बोसोराव मिरु सरकारा जोंनि दाबिखौ खोमासुदों, जों सोलिफुबाय थानाय पारलियामेन्टनि जथुमायावनो ट्रायबेल बिल 2019 खौ सोदांनो खावलायो” होन्ना बर्मन बिथांआ बुंबावो।
फारसेथिं CCTOA एबा ट्रायबेल माहारिनि आफादफोरा सरकारखौ हुमखि होयोदि, जुदि आसामनि मोन 6 हारिसाफोरनो ST गनायथि होगोन अब्ला सेडियुल ट्रायब बिल 2019 नि हेंथायै सोमावसारनाया गोख्रोंनिफ्राय गोख्रों जालांगोन।
