हाईद्रावाद,जानुवारि 2: मुस्लिम आयजोफोरनि मोन्थायखौ रैखाथि होनो थाखाय ‘ट्रिपल तालाक’ आयेनखौ बन्द’ खालामनानै गोदान आयेन फोसावफिन्नो थाखाय राज्य’ सभानि जथुमायाव दान्थे बिदान्थे खालामफुबाय थानाय समावनो ऑल इंन्डीया मुस्लिम पार्सनेल लो बोर्डआ (AIMPLB) ‘ट्रिपल तालाक’ आयेनखौ बन्द’ खालामनो मोना होन्ना राज्य’ सभाखौ खावलायहरो।
मिथिनो मोन्नाय बादिब्ला मुस्लिम आयजोफोरखौ जुलिनि उनाव रैखाथि होनाय बिल 2018 खौ सोदांनायनि सिगां आथिखालनि थासारि आरो नायबिजिरनो थाखाय दाफुंजानाय खमिटिनि रिपर्टफोरखौ नायग्रोनांगौ होन्ना दाबि खालामदों।
खौरां मोन्नाय बादिब्ला AIMPLB आ “मुस्लिम आयजोफोरनि थाखाय रैखाथि होनाय बिल 2018” गोदान आयेना “सुबुंमाहारि नङैनि आयेन” आरो “गोरोन्थि” होन्ना फोरमायो। बिथांमोनहा फोरमायबावोदि, गोदान आयेना मुस्लिम आयजोफोरखौ रैखाथि आरो हेफाजाब होनायनि अनगायै मुस्लिम आयजोफोरनि मोन्थायखौ सिफायनानै थेर बेथेर खालामनानै जुलि जानायनि खान्थिखौ बायफ्लेहोगोनसो होन्ना अजद होबावो।
मखनो गोनांदि, ट्रिपल टालाक आयेन, जाय आयेननि गेजेरजों हाबा जाखानाय फिसायआ गावनि आंगो असे बिसिखौ जुदा खालामनो थाखाय ‘ट्रिपल टालाक’ एबा टालाक, टालाक, टालाक होन्नानै गावस्रा होयोमोन आरो भारत हादोरमायाव बे आयेनआ गोबाव समनिफ्रायनो सोलिबोगासिनो दंमोन, गोजोनथाव बाथ्राया जाबाय, बे बिलखौ बेरेखा दोलोफोरा लख सभानि जथुमायाव 4 घन्टा गोख्रोङै दान्थे बिदान्थे जानायनि गेजेरजों थांनाय ब्रिहस्पथिबाराव पास खालामदोंमोन।
गोदानै थिसनजानाय ट्रिपल टालाक बिलनि हेंथायै जाय हाबा जाखानाय फिसय एबा जाय सुबुंआ गावनि देहानि थैजों सोमोन्दो दं, बे बिथांखौ ट्रिपल टालाक बुंनानै गावस्रा होयोब्ला थाम बोसोर जोबथेसालिनि साजा होनायजों लोगोसे जुरिमाना फोनांनाय जागोन। गोदानै थिसनजानाय आयेनआ जुम्मु आरो कास्मिर हादोरसाफोरनि अनगायै गासै भारत हादोरसानि थाखायनो जागोन होन्नानै लख’ सभानि जथुमायाव फोसावनानै होदोंमोन।
जेब्ला मुस्लिम आयजोफोरनि मोन्थाय (Protection of Rights on Marriage) बिल 2018 खौ बेरेखा खालामनाय दोलोफोरनि बिबुंसारफोरखौ लख सभानि जथुमायाव गनायथि होआखौ अब्ला रभि संकर बिथांआ बुङोदि, “ट्रिपल टालाक बिलखौ जेरैखिजाया बन्द’ खालामनो नांगौ आरो गोदान आयेन थिसननांगौ”।
“थांनाय जानुवारि 2018 निफ्राय डिसेम्बर 10 अक्टसिम गासै मोन 477 ‘ट्रिपल टालाक’ आयेननि केसफोरखौ मोन्नाय जादों, आरो थांनाय बुधबार आवबो बेबादिनो हायद्राबादआव बे एखे रोखोमनि केसखौ जों नुनो मोनदों, बेफोरनि थाखायनो गोदान आयेनखौ लाबोनो गोनां जादों” होन्ना बिथांआ बुंबावो। मोन 20 इस्लामिक हादोरफोरा बे बिलनि हेंथायै आयेन फोसावदों आरो बन्द’ खालामदों। मंत्री बिथांआ सोंथि सोङोदि, भारत हादरआ सेकुलार हादोर जानानैबो मानो नांगौबादि आयेन थिसन्नो हाया आरो मानो बे आयेनखौ बन्द’ खालामनो हाया?
माखासे हादोरफोर, जाय हादोरफोराव ‘ट्रिपल टालाक’ बिलखौ बन्द’ खालामनाय जादों, बे हादोरफोरखौ गाहायाव होनाय जाबाय।
1.पाकिस्तान
2.बांग्लादेस
3.टुर्कि
4.चाइप्रास
5.टुनिसिया
6.आल्गेरिया
7.मालाइसियानि सारावाक हादोरसा
8.इरान
9.स्रि लंखा
10.जर्दान
11.इंन्डनेसिया
12.इउनायटेड आरब इमिरेट
13.खाटार
14.सुदान
15.मरक्क
16.इजिप
17.इराक
18.ब्रुनेयी
19.मालाइसिया
