आगरटला,डिसेम्बर 5: सा-सान्जा ओनसोलाव थानाय ट्रिपुरा हादोरसानि भारतिय’ जनटा पार्टीनि (BJP) खुंथायनि लोगो इन्डिजिनियास पिप्लस प्रन्ट अव ट्रिपुरा (IPFT) राजखान्थि हान्जाया फैगौ मंगलबारनिफ्राय गोबाव सम जालांनाय आलादा ट्रायबेल हादोरसा दाफुंनायनि दाबिखौ लानानै धर्ना होनाय हाबाफारिखौ जागायफिनसिगोन होन्ना IPFT नि दैदेनगिरिफोरा मिथिहोयो।
खौरां मोन्नाय बादिब्ला IPFT आ आलादा ट्रायबेल राज्यो दाफुंनायनि दाबिखौ लानानै धर्ना होनाय हाबाफारि बादियै दिनै (बुधबाराव) ट्रिपुरा ट्रायबेल एरिया औटनमाच डिसट्रिक काउनचिल (TTAADC) ओनसोलाव 12 धन्टा बन्द फोसावदों। आरो फैगौ 11 डिसेम्बरखालि गोदान दिल्लीआ जिरायनानै धर्ना होनायजों लोगोसे हादोरनि गाहाय मनट्री नारेन्ड्र मोडी आरो मिरु सरकारनि नखर मनट्री राजनात सिंह बिथांमोन्नो गोसोखां बिलाइ Memorandum गथायगोन होन्ना IPFT दोलोनि दैदेनगिरिफोरा जोंनिसिम खौरांआव फोरमायहरो।
“IPFT राजखान्थि दोलोजों लोगोसे गुबुन गुबुन मोन 7 दोलोफोराबो आलादा ट्रायबेल राज्यो दाफुंनायनि दाबिखौ लानानै दिनैनि TTAADC ओनसोलफोराव 12 धन्टा बन्द’ फोसावनायखौ हेफाजाब होदों” होन्ना IPFT दोलोनि बुंथिगिरि आरो लेङाइ नेहाथारि मंगल देबार्मा बिथांआ खौरांगिरिफोरनि सिगांआव बुङो।
खौरां मोन्नाय बादिब्ला बिथांमोनि आलादा राज्यो दाफुंनायनि दाबिनि अनगायै गुबुन गुबुन दाबिफोरा जाबाय- ट्रिपुरा हादोरसायाव NRC सोदांनांगौ, नोगोरारि (सोदांनाय) बिल 2016 खौ बोखाना लाफिननांगौ, TTAADC ओनसोलफोराव Inner-Line Permit खौ सोदांनांगौ, ककबरक रावखौ भारत संबिजिरनि 8थि दफायाव थिसननांगौ।
मखनो गोनांदि, IPFT राजखान्थि दोलोआ थांनाय 2009 माइथायनिफ्रायनो TTAADC खौ फोजौखांहोनानै आलादा ट्रायबेल राज्यो दाफुंनानै होनांगौ होन्ना दाबि खालामबोगासिनो दं, जाय ओनसोलाव गासै 10,491 sqkm गुवार जायगा आवग्रिनानै दं आरो गासै 12,16,000 थागिबि ट्रायबेल सुबुंफोरा थाबोगासिनो दं।
गासै सा 9 मेम्बार काउनचिलफोरनि गेजेराव IPFT दोलोनिफ्राय सा 2 मनट्रीफोर दं, बिथांमोनहा जाबाय रिभेनिउ मनट्री नारेन्ड्र चन्ड्र देबार्मा (IPFT President) आरो ट्रायबेल जौगाखां & हाग्रा बिफान्नि मनट्री मिभार कुमार जामाटिया (IPFT General Secretary)।
फारसेथिं ट्रिपुरानि गुबुन ट्रायबेल दोलो- इन्डिजिनियास नेशनेलिस पार्टि अव ट्रिपुरा (INPT) बिथांमोनहाबो आलादा राज्यो दाबिनानै फैगौ 10 डिसेम्बरखालि ट्रिपुरा हादोरसायाव हा लामा आरो रेल लामाफोरखौ होबथागोन होन्ना खौरां मोनबावनाय जायो।
बिथांमोनि आलादा राज्योनि दाबिखौ कंग्रेज आरो कमिउनिस्ट पार्टि अव इन्डिया-(मार्जिस) राजखान्थि दोलोफोरा बेरेखा खालामबोगासिनो दं।
