क’कराझार,डिसेम्बर 21: बड’लेन्ड जनजाति सुराछा मन्सआ बावैसो सान सिगां गिखांनाय फोरमायदोंदि बर’फोरनि सोमावसारनाय दैदेनगिरि आरो खुंगिरिफ्रा सांग्रां नङाब्ला ट्रायबेलफोरनि थाखाय थिखानाय मासिफोरा ट्राइबेल नङै हारिनि आखायाव थांजोबनो हागौ। मन्सआ एसेमब्लि एबा गाव खुंथायनि बियाबफोराव एस टिनि थिखानाय मासि जेरै- क’कराझार आरो सालाखातिफोरखौ बिदिन्थि होनानै बुंदोंदि, बेफोर सांग्रांथि गोयैनि थाखाय गावनि थिखानाय मासिखौ ट्राइबेल नङै हारिफोरजों सोबख’जानायनि फोरमान।
मन्सनि आफादगिरि जनकलाल बसुमथारिआ बुंदोंदि, माखासे राजखान्थि दैदेनगिरिफोरा गावनि संबिजिदारि राजखान्थि मोन्थायखौ गुबुन ट्राइबेल नङै हारिफोरनो दान होयो बेबादि समाव सोमावसारनाय दैदेनगिरिफोरखौ नंखाय दिगजों लाबोनो नाजादों। ट्राइबेलफोरनि थिखाना लख सभानि मासिखौ दिनै ट्राइबेल नङै सोद्रोमाया सोबख’नानै लाबाय आरो बेबो बर’फ्रानो बिथांखौ बर’ सिनायथि होनायनि थाखाय। बेयो बर’फोरनि सोमावसारनायाव मेनसे गेदेत हेंथा मानोना उन्नि बिसायखथिफोरावबो गुबुन गुबुन एस टीनि थिखानाय बियाबफोराव बर’आरो अबर’ सोखावथाय राजखान्थिजों ट्राइबेलनि मासिखौ आवग्रिबावनो हागौ, होन्नानै बिथांआ दाजाबनानै बुङोदि, सोखावलु गोहोनि होख्रावनाया गोरासिन जानो हागौ मानोना ट्राइबेल बेल्ट आरो ब्लक आरो 6थि फारिलाइनि सिङाव दाजानाय बि टि सि हालामाव बिसोरो गावसोरखौ बांसिन सानखोनि बुंनायजों लोगोसे बांसिनानै आयेन बेरेखायै हाबफैनाय सुबुंफोर।
“नोंसोर नोंसिनि ट्राइबेलनि हा-हु आरो ट्राइबेलनि थिखानाय मासिखौ रैखाथि होनो हायाब्ला आलादा बड’लेन्डनि थाखाय नांनायखौबो लोरबां खालामगोन आरो बायजोनि बेरेखायै हाबखनफैनाय सुबुंफोरनि हब्रानायासो गोख्रोंनिफ्राय गोख्रोंसिन जागोन,” होन्नानै बिथांआ बुङोदि, बेफोरखौ नोजोर होनानै दैदेनगिरिफोरा संबिजिदारि मोन्थाय बादियै हा-हु रैखाथि आरो थिखानाय मासि रैखाथि होनायाव गोख्रों नोजोर होनायजों लोगोसे सांग्रां जानांगोन।
गनायथि होजायै हारिफोरनो माब्लाबाबो गावनि मोन्थायखौ होनो नाङा होन्नानै बिथांआ बुङोदि, होमारोब्ला बिसोरो बर’ आरो ट्राइबेलफोरनि थिखानाय मासिआवबो बेरेखायै थाफैनाय बर’ नङै ट्राइबेल नङै सुबुंफोरनि गोबां गुन बांसिन भट होग्राफोरनि गेजेरजों ट्राइबेलफोरखौ थेर बेथेर खालामनो हागौ। बसुमथारिआ बुङोदि, थांनाय बिसायखथिआव एम पि नब’ कुमार सरनिया गासै बर’ नङै आरो ट्राइबेल नङै सुबुंफोरनि मदतजों गोबां भट लानानै देरहादोंमोन मानोना बिथांआ सासे ट्राइबेल नङै सुबुं। दिनै बिथांआ ट्राइबेल मासिनिफ्राय बर’ नङै आरो ट्राइबेल नङैनि सोद्रोमा बर’फोरा गावनि मोनसेल’ थिखानाय मासिखौ खोमानानै लानांदों।
बेयो बड’लेन्डनि मेनसे गेदेत जेन्नाय होन्नानै बिथांआ बुङोदि, बेयो बेयावनो जोबनानै थांनाय जाथाय नङा नाथाय एसेमब्लि आरो गावखुंथाय बिसायखथिआवबो बेनि दोहौआ बांलांगोन। बेनिखायनो गासै बर’ दैदेनगिरिफोरानो बेनि सायाव सांग्रां जानाया गोनां मानोना सरकारा ट्राइबेल फोरमानलाइखौ ट्राइबेव नङैफोरनो होनायखौ होबथादोंब्लाबो बर’ कछारि बिमुंसानि सोलाइ “कछारि” बिमुं होनानै सरनियाफोरनो एस टिनि फोरमानलाइखौ होबोदों।
ट्राइबेल दैदेनगिरिआ बुंदोंदि, 1886 माइथायाव दाजानाय आसाम लेन्ड एन्ड रिभिनिउ रेगुलेशन एक्टनि 10थि दफा बादियै गासै ट्राइबेल बेल्टआरो ब्लकआव ट्राइबेलनि अनगायै गुबुनफ्रा हा मोन्नो हाया नाथाय माखासे थौले गोसोनि दैदेनगिरि आरो खुंगिरिफ्रा बेफोरखौ नुसेआवबो जेबो राहा लाबोनायखौ नुनो मोनाखै। बिथांआ बुङोदि, सरकारा मा मा गोदान सोलो लादों बेयो गोनां नङा नाथाय सोलोखौ मावफुंनायासो गोनां। सरकारा सोलोखौ मावफुङाखैब्ला गोदान गोदान सोलो लानायाबो ओंथि गैया होन्नानै बिथांआ गासै थागिबि ट्राइबेलफोरखौ गाव गावसोरनि मोन्थायनि फार्से नोजोर लाखिनो आरो ट्राइबेलफोरनि मोन्थाय आरो रैखाथिखौ संबिजिदारी मोन्थाय बादियै मावफुंनो सरकारखौ नारसिन्दों।
अफ्रिखाथला बसुमथारि
