सिलचर,जानुवारि 5: हादोरनि गाहाय मंत्री नारेन्ड्र मोडी बिथांआ आसाम हादोरसानि सिङाव थानाय सिलचर नोगोरमायाव फैनानै नोगोरारि सोदांनाय बिल 2016 आ गोजौ फारसे थार लामाजों थांगासिनो दं होन्ना बुङो।
गाहाय मंत्री नारेन्ड्र मोडी बिथांआ सिलचर नोगोरमानि साखाथिआव थानाय राम नोगोर आव बिसायखथिनि सांग्रांथिनि मेल बादियै सुबुं गौमायाव बुंथियोदि, बिथांनि खुंथायाव थानाय समाव रावखौबो गारनानै थाङा, बिथांआ नोगोरारि सोदांनाय बिल 2016 खौ नोजोर होनानै बुङोदि, “नोगोरारि बिल, जाय बिलआ हादोरसानि लाख लाख सुबुंफोरनि जिउजों लोब्बा दं, बे बिलखौ हादोरसायाव सोदांनो नाजानाया जौगालांगासिनो दं आरो थार लामाजों थांगासिनो दं”। “भारत-पाकिस्तान आलादा जानायनि उनाव फुगिनांनायनि दैदेनगिरिफोरा फोथायोदि, बिथांमोनि जेंनाखै सुस्रांनानै होनांगौ, नाथाय बे जेंनाया सुस्रांजायाखैमोन” होन्ना मोडी बिथांआ बुंङो।
गोलाव सम नायबिजिरनानै आरो खस्त खालामनानै नोगोरारि सोदांनाय बिल 2016 खौ बिथांनि खुंथायाव थानाय सरकारापारलियामेन्टनि जथुमायाव दिन्थिफुंनो साखाफारा जाबाय, होन्ना गाहाय मंत्रीआ बुङो। “नोगोरारि बिलआ गोबाव समनि पार्टिसननि दैदेनगिरिफोरनि जेंना मोन” होन्ना बिथांआ बुङो। “नोगोरारि बिलखौ लानानै रावनिबो गोसोआव गोनो गोथो सान्नांगै गैला, मानोना बिलआ पारलियामेन्टआव थिसनजासिगोन” बिथांआ बुङो। बिथांआ दैदेनगिरिफोरनि मुंखौ मख’आखैब्लाबो कंग्रेस दोलोखौ सोंखारिनानै बुङोदि, आसामनि सुबुंफोरखौ रैखाथि होनायनि मुंङाव, कंग्रेस दोलोआ भट बेंकनि थाखायल’ राजखान्थि गेलेबोगासिनो दं। आसाम हादोरसाया जिय’ग्रापिकेल सम्पथिल’ नङा नाथाय जोबनो गोयै सम्पथिफोर (Resources) दं, 60 बोसोर कंग्रेसनि खुंथायाव थानाय समाव आसामनि थाखाय जेबो जौगाखां हाबा मावफुङाखै होन्ना बिथांआ बुंबावो।
मोडी बिथांआ बुङोदि, आसाम हादोरसानि बेंगलि हिन्दुफोरा NRC नि खामानिफोरखौ मावफुनाय समाव गोबां जेंना आरो खर’ गुदुं खालामदोंमोन, जाय खामानिखौ बयनिबो हेफाजाबजोंसो मावफुंनो हायो”। बे समावनो बेफोर जेंनाफोरखौ सौसिलांनायनि थाखाय बिथांआ हादोरसानि गिबि मंत्री सर्बानन्द सनवाल आरो बिथांनि ऑफिसियेल सुबुंफोरखौ साबायखर होयो। NRC खामानिफोरखौ गोरलैयैनो मावफुंनो थाखाय बिथांआ जौसिन बिसिरसालिखौबो माखासे फोरमानबिलाइफोरखौ गोरलै खालामनानै होनो खावलायहरदों होन्ना बिथांआ बुंथिनानै होबावो।
आसाम एकर्डखौ थांनाय 1985 माइथायावनो सहि होदोंमोनब्लाबो बेनि 6थि दफायाव थानाय गोनां आयेनआ लेखा बिलाइआवल’ बाबोबाय थादों, नाथाय NDA खुंथायआ गोहोआव फैनानै आरो आसाम हादोरसायाव सर्बानन्द सनवाल फैनानै गोनां आयेनखौ सोदांनो गोख्रोङै नाजागासिनो दं। आसाम एकर्डनि 6थि दफाखौ सोदांनो थाखाय गोजौ थाखोनि खमिटि दाफुंनानै आरो सोफ्रोमबो दैदेनगिरिफोरखौ लाफानानै सावरायनानै सोदांनो थाखाय थांगासिनो दं। बेयो असमिया माहारिफोरनि सिनायथि आरो हारिमुखौ रैखाथि होनो गोनां होन्ना बिथांआ बुंबावो।
“Act East, Act Fast सोदोआ आंनि खुंथायनि मोनसे मन्ट्, सा-सान्जा हादोरसाखौ जेब्लासिम जौगाहोनो हाया, अब्लासिम भारत हादोरआ जौगाया”होन्ना बिथांआ बुङो।
